Ölkə futbolu
“Səbail” 2024-də bütün xalları hakimlərdən hədiyyə alıb: son turda da “Araz-Naxçıvan”ın haqqı yeyildi
Bu mövsüm “Zirə” və “Sabah” qədər hakim səhvinə məruz qalan başqa komanda tapa bilməzsiz. Bu cütlüyə qarşı edilənlərin səhv yox, aşkar qərəz olduğu hamıya bəllidir. Paytaxt klublarını sıradan çıxarmaq, hədəfdən yayındırmaq üçün hər şey ediblər. Bir ara “Turan Tovuz” da hakimlərdən aldığı ardıcıl zərbələrdən çox xal itirdi. Qərblilər qərəz üzündən itirdiyi xalları toplasaydı, indi aşkar fərqlə 2-ci pillədə möhkəmlənmişdi.
Misli Premyer Liqasında hakimlərin qəzəbinə düçar olmayan, əksinə, daim onlardan yardım görən komandalar da var. Maraqlıdır ki, hər ikisinin rəhbər heyəti vaxtilə AFFA-da işləyən və ya qurumun ali rəhbərliyi ilə həmişə təmasda, əlbir olan insanlardır. Onların bu klublara hansı yolla gəldiyi də kimsəyə sirr deyil. Söhbət “Sumqayıt”la “Səbail”dən gedir.
Araşdırılsa, hakimlərin bu komandalara yardımının kökündə himayədarın (oxu: Elxan Məmmədovun) tapşırığını da tapmaq olar, sözügedən klubların rəhbərlərinin AFFA-dakı dostlarıyla çoxillik münasibətlərin izini də.
Son turda hakim səhvindən sonra xal qazanan “Səbail”ə edilən yardımları yada salmaqda fayda var. Təkcə 2024-cü ildəki matçlarda “dənizçilər”in məhz hakimlərin sayəsində xallar qazandığı aşkar görünür.
Statistika heç vaxt aldatmır. “Səbail” yeni ildə 7 matç keçirib, onlardan 4-də uduzub. Qalan 3 matçın hamısında isə bu komandanın lehinə qərarlar var.
Kubokda hakimlər “Zirə”yə hər iki matçda məğlubiyyətə mane ola bilməyib. Bəlkə də həmin oyunlarda da hoqqa çıxarardılar, lakin o ərəfədə hakimlərlə bağlı qalmaqallar ciddi əks-səda doğurduğundan, bu riskə getmədilər. Çempionatda “Zirə”n səhv fitlər hesabına büdrədən Bayıl təmsilçisi, kubokda eyni yardımı görmədi və darmadağın oldu.
20-ci turda “Turan Tovuz”la matç da istisna olmadı. AFFA rəhbərliyinin işə qarışması, baş katib Sərxan Hacıyevin Tovuza yollanması hakimlərə ədalətli idarəçilikdən başqa çıxış yolu qoymadı və qərblilər qonaqlara göz açmağa imkan vermədilər. Ardınca “Qarabağ” da “Səbail”i məğlub etdi.
“Səbail”in uduzmadığı 3 oyun var və hamısında hakimlər baş rolda olublar. Faktiki olaraq qazanılan 5 xalın hamısının üzərinə kölgə düşüb.
Xatırlayaq:
* 19-cu turda “Səbail”in “Zirə” ilə oyunu qolsuz başa çatdı. Matçın sonlarında qonaqların yüzfaizli penaltisi verilmədi. Səhv o qədər bariz idi ki, baş hakim Fərid Hacıyev mövsümün sonunadək cəzalandı. Amma itirən “Zirə”, qazanan “Səbail” oldu.
* 22-ci turda Qəbələdə “Kəpəz”ə qonaq olan “dənizçilər” 4:1 hesablı qələbəyə sevindi. İlk baxışdan nəticə mübahisəyə əlyeri qoymur. Lakin oyunu izləyənlər həlledici anlarda hakimlərin etdikləri səhvlərin gəncəlilərin özünə gəlməsinə imkan vermədiyini xatırlayır. Rüfət Abdullazadənin qapı önündə həndbol oynamasına göz yumuldu, penalti təyin edilmədi. Daha bir neçə epizodda “Kəpəz”ə qarşı səhvlər oldu və nominal meydan sahiblərinə “mütləq uduzmalısız” mesajı verildi. Görüşdən sonra gəncəlilər bəyanat yaydı, lakin nə fayda?
* 23-cü turda “Səbail” “Araz-Naxçıvan”la görüşdə növbəti hədiyyəni aldı. Qonaqların ilk topu buraxıb geridönüş etdiyi matçda penaltisi verilmədi, üstəlik, “Səbail” yekun nəticəni (2:2) qayda pozuntusundan sonra vurduqları qolla müəyyənləşdirdi. Belə ki, 61-ci dəqiqədəki epizodun başlanğıcında naxçıvanlıların yarımmüdafiəçisi Miço Kuzmanoviçə qarşı sarı vərəqəlik qayda pozuntusu reallaşdı, baş hakim Kamran Əliyev isə oyunu davam etdirdi və Aleksandr Ramalinqom qol vurdu. Bu anı VAR-da əyləşən Rəşad Əhmədovla Eyyub İbrahimov da görməzdən gəldi. Halbuki eyni turda oxşar epizoda görə “Zirə”nin qolu haqlı olaraq ləğv edilmişdi.
İndi kimsə “Səbail”ə hakimlərin yardım etmədiyinə dair bircə fakt göstərsin, saytımızda ona tribuna verək. Hakimlərin 2024-cü ildə qərəzli olmadığı bütün matçlarda “dənizçlər” darmadağın olub, bütün səhvlər isə bu komandanın xeyrinə edilib.
AFFA prezidenti Rövnəq Abdullayevin oğlu üçün yaratdığı (özü etiraf edib – red.), sonradan Elxan Məmmədovun ələ keçirdiyi klubun Azərbaycan futboluna hansı faydası dəyib ki, ona bu qədər yardım edilir? Bir yığma üzvü yetişdirməyən, heç bir yetirməsi olmayan, AFFA-nın nəzdindəki bazada məskunlaşan, yalnız əcnəbi transferləri ilə büdcə dağıdan “Səbail” kimə lazımdır? Elxan Məmmədovun kölgəsi altındadır deyə mütləq onu yuxarı pillələrəmi dartmalıdırlar?
“Səbail”in hesabından hakimlərin yardımı ilə qazanılan 5 xalı çıxsaq, komanda indi autsayderlər qrupunda idi. “Kəpəz”in əlindən alınan xalları da nəzərə alsaq, “dənizçilər” ötən mövsümdə olduğu kimi, canı ilə əlləşməli idi.
VÜSAL MAHMUDOV