“Saman çöpü”ndən yapışarkən…

Daha Roberto Bordin yoxdu, amma yenə bərbad “Neftçi” var. Bu gün komanda “Sumqayıt” qarşısında bəlkə də mövsümün ən zəif oyununu sərgilədu. Düzdü, Voislav Stankoviçin qırmızı vərəqə almasının da bunda rolu oldu. Amma hətta bunadək də qonaqlar daha yaxşı təsir bağışlayırdı.

Premyer Liqanın ikinci yarısı turnir cədvəlində yerdəyişmə ilə başladı. “Zirə” “Sabah”la ev oyununda qazandığı qələbə sayəsində 4-cü pilləyə yüksəldi. Qışda xeyli yeni transfer edən, onlardan 5-ni bu gün meydana buraxan “qartallar”ın baş məşqçisi Zaur Həşimov seçimində yanılmadığını göstərdi. Döyüşkən komanda yaratmış gənc çalışdırıcı istədiyini ala bildi.

Hər hissədə bir qol vuran meydan sahibləri ilk yarıda bir qədər əziyyət çəkdi. Elə fasilədən sonra da “Sabah” meydanda üstün görünürdü. Gəl ki, daha səliqəli oynayan və fürsətləri dəyərləndirən “Zirə” istəyinə çatdı. Komandada debüt matçına çıxan gənc Rauf Hüseynli Həşimovun limitlə bağlı narahatlığına imkan verməyəcək. Ən azı bugünkü çıxışı belə deməyə imkan verir. Ali Sisey də müdafiədəki inamlı oyunu ilə alqış qazandı.

“Sabah” avrokubok zonasından xeyli uzaq düşdü. Əsas rəqiblərindən biri ilə dueldə məğlubiyyət vəziyyəti qəlizləşdirdi. Paytaxt klubu xeyli yeni transfer edib, heyət əhəmiyyətli şəkildə güclənib, lakin nəticələr məyus edir. Jelko Sopiç xüsusilə qol vəziyyətlərindən istifadədəki problemə çarə qıla bilmir. Bəlkə də zamanla komandanın oyunu düzələcək, futbolçular bir-birinə uyğunlaşdıqdan sonra fərqli “Sabah” görəcəyik, amma zaman gedir, xal fərqi artır, mövsüm sona yaxınlaşır.

Turun ikinci matçı “Sumqayıt”ın 4-cü pilləni itirməsi ilə nəticələnsə də, qonaqlar bir xalı qənimət saymalıdı. İkinci yerdəki “Neftçi”yə uduzmamaq Ayxan Abbasovun yetirmələrinin aktivinə yazılmalıdı. Müdafiə xəttindəki itkilərə, eləcə də əsas oyunçulardan Vüqar Mustafayevin yoxluğuna rəğmən, qazanılan xal çox qiymətlidi. Növbəti turda “Zirə”ylə ev oyununun əhəmiyyəti indi daha da artmış oldu.

“Neftçi” oyuna yaxşı başladı. Qonaqların həyəcanı, ardıcıl səhvlər bakılıların asan qələbəsinə ümid verirdi. Lakin 10-12 dəqiqəlik təzyiqdən çıxan “Sumqayıt” özünü ev sahibi kimi aparmağa başladı. Bir neçə təhlükəli hücum fayda verməsə də, fasilə ərəfəsində vəziyyət dəyişdi. Camaləddin Xocaniyazovun diaqonal ötürməsindən sonra Mehdi Şərifi irəli atıldı, Stankoviç onu yalnız kobudluqla dayandıra bildi. Qırmızı vərəqə azmış kimi, təyin olunan cərimə zərbəsindən sonra “Sumqayıt” hesabı da açdı.

Fasilədən sonra oynayan və qol vuran komandalar fərqli idi. Boş qapıya fərqlənə bilməyən, dirəyin möhkəmliyini “yoxlayan” “Sumqayıt” böyük hesabla qalib gəlməli olduğu matçda özü top buraxdı. Oyuna sonradan daxil olan Baqali Dabo oyundankənar vəziyyətdən fərqlənsə də, qol hesaba alındı. Amma xal itkisinə görə qonaqlar hakimlərdən çox özünü qınamalıdı. Çünki saysız-hesabsız qol vəziyyətlərini boşa verməyin cəzası elə bu olmalıydı.

“Neftçi”də böyük məyusluq var. Fasilədən sonrakı ilk tur olduğundan bəlkə də komandaların durumuna qiymət vermək üçün tezdi. Üstəlik, “ağ-qaralar” bir hissəni azlıqda keçirdi. Amma bugünkü matç bakılıların çempionata hazır olmadığını göstərdi. Komandada sanki inamsızlıq, xaos var. Məşqçilərlə oyunçular arasında ünsiyyət qaydasında deyil, Füzuli Məmmədovun belə iddialı komandaya layiq sükançı olmamasını hamı başa düşür.

Oyunun sonlarında futbolçuların bir-birinin üstünə qışqırması intizamsızlığın nümunəsi idi. Bu azmış kimi onlar məşqçinin canfəşanlığına baxmayaraq, azarkeşlərlə sağollaşmağa da yollanmadı. Kapitan Emin Mahmudov Məmmədovun israrına baxmayaraq, paltardəyişmə otağına yollanarkən məşqçinin gücü “özün bilərsən” deməyə çatdı. Dabo da eyni hərəkəti etdi.

Bəli, Bordin “Neftçi”dən göndərilməsi üçün hər şey etmişdi. Xüsusilə kubokda “Sumqayıt”a məğlubiyətdən sonra başqa yol yox idi. Lakin onu əvəz edən sabiq köməkçisi də eyni komandanı – bu dəfə çempionatda – yenə bilmədi. Bəlkə də yeni məşqçi gətirmək üçün maliyyə yoxdu, bununla belə, Bakı klubunun Füzulinin çiyinlərinə ağır gələcəyi indidən bəllidi. Məmmədov nə o xarizmaya, nə bacarığa malik birisi deyil.

Oyundan sonrakı mənzərə qəribə idi. “Neftçi” ev matçında xal itirdiyinə görə təəssüflənməli olduğu halda, sumqayıtlılar daha pərişan görünürdü. 10 nəfərlə qalan rəqibin əldən çıxmasına görə göz yaşı axıdanlar da var idi.

Stankoviç qırmızı vərəqəyə görə növbəti turda “Qarabağ”la vacib matçı da buraxacaq. Bu itki “Neftçi” üçün daha qorxuducudu. Bəlkə də rəhbərlik indi Kiril Petrovun göndərilməsinə görə məyusdu. Büdcə çatışmazlığı başadüşüləndi. Klub yalnız Saman Nərimancahanı transfer edib ki, onu da böyük qazanc saya bilmərik. Yeni oyunçular almaq üçün maliyyə ayrılmadığından bakılılar “saman çöpü”ndən asılı qaldı. İranlı yarımmüdafiəçinin isə komandanı gücləndirdiyini deyə bilməyəcəyik. Amma o da var ki, yenilməsi mümkün olmayan rəqib ümumiyyətlə, transfer etməyən “Sumqayıt” idi. Bu səbəbdən Samanla kifayətlənmək də bəhanə olmamalıdı.

FƏRİD