“Samir Abasov əsl kişidir, nə düşündüyünü adamın üzünə deyir”

“Sumqayıt” klubunun yarımmüdafiəçisi Oktavio Mantekanın futbolinfo.az saytına müsahibəsi

– Misli Premyer Liqasının 25-ci turunda gözlənilmədən öz meydanınızda “Kəpəz”ə uduzdunuz. Məğlubiyyətin səbəbini nədə görürsünüz?

– Meydana 3 xal üçün çıxmışdıq. Oyunun vacibliyini dərk edirdik. Amma futbol belədir. Rəqib də 11 nəfərlə çıxış edir və bu o deməkdir ki, onların da yaxşı nəticə əldə etmək şansları var. Təəssüf ki, bu oyunda istəyimizə çata bilmədik.

– Son məğlubiyyətdən sonra ikinci pilləni tərk etdiniz. Hazırda bu yer uğrunda gərgin mübarizə gedir. Sizcə, “Sumqayıt” rəqabətdən qalib ayrılaraq, mövsümü ikinci yerdə bitirə biləcək?

– Biz ancaq qarşıdakı oyuna köklənirik. Belə də olmalıdır. Mövsümün sonunu düşünmədən növbəti matça çıxmaq lazımdır. Əgər hər turda maksimum sayda xal toplaya bilsək, mövsümün sonunda hədəfimizə çatmış olacağıq.

– Növbəti turda ikinci pillənin hazırkı sakini “Səbail”lə qarşılaşacaqsınız. Bu oyunda hansı nəticəyə ümid edirsiniz?

– Bizi çətin görüş gözləyir. Çünki təbii örtüklü meydanda oynamayacağıq. Bizdən fərqli, rəqib süni örtükdə oynamağa alışıb. Oyuna, meydana bacardığımız qədər tez uyğunlaşmalıyıq. “Səbail”lə qarşılaşma bizim üçün 6 xallıq matçdır. Ümid edirik ki, yaxşı oyunla və müsbət nəticə ilə azarkeşlərimizi sevindirəcəyik.

– Zədədən qayıtdıqdan sonra son 2 turda ikinci hissədə meydana daxil olmusunuz. Tam formanızı bərpa etmək və əsas heyətə düşmək üçün sizə nə qədər vaxt lazımdır?

– Mən oynamağa hazıram. Məşqlərimi normal qaydada davam etdirirəm. Məsələ burasındadır ki, baş məşqçinin əsas heyətdə şans verdiyi hər bir futbolçu özünü yaxşı tərəfdən göstərir. Buna görə də öz fürsətimi gözləməliyəm.

– Baş məşqçi Samir Abasovla da bağlı fikriniz maraqlıdır. Onunla işləmək sizin üçün rahatdır? Baş məşqçidə ən çox hansı xüsusiyyəti bəyənirsiniz?

– Samir Abasovla birgə işləmək çox xoşuma gəlir. O, əsl kişidir, nə düşündüyünü adamın üzünə deyir. Futbolda bu cür qalmaq, bunu bacarmaq çox çətindir. Baş məşqçimizin bizdən tələb etdiklərini səhvsiz yerinə yetirməyə çalışırıq. Samir Abasov Azərbaycanın ən yaxşı məşqçilərindən biridir.

– Yeni stadionunuzda açılış matçında azarkeşlər tribunaları tam doldurmuşdular. Ancaq sonrakı ev oyunlarında bu hal təkrarlanmır. Bunun səbəbini nədə görürsünüz?

– Yeni stadionumuzdakı açılış oyunu möhtəşəm atmosferlə yadda qaldı. Unudulmaz gün idi. Sonrakı ev oyunlarımızda eyni halın təkrarlanmamasının səbəbini bilmirəm. Əsas odur ki, stadiona gələn azarkeşlər bütün görüşlərdə mahnı oxuyurlar və bizi dəstəkləyirlər. Saylarından asılı olmayaraq, gələn insanlar sonadək əllərindən gələni edirlər.

– Azərbaycan çempionatının səviyyəsi sizi qane edir? Misli Premyer Liqasında sizinlə eyni mövqedə çıxış edən futbolçulardan kimlərin oyununu bəyənirsiniz?

– Çox rəqabətli çempionatdır. Turnir cədvəlinə baxsanız, hamının praktiki olaraq eyni xalı var və qarşıdakı turlarda hər şey ola bilər. Mənim mövqeyimdə çıxış edən futbolçulara gəlincə, 3 nəfəri bəyənirəm. Biri komanda yoldaşım Masaki Murata, digərləri isə “Qarabağ”dan Marko Yankoviç və “Neftçi”dən Emin Mahmudovdur.

ABBAS