Stankoviç çempionluqdan danışmaq istəmir: “2 oyun yaxşı oynayırıq, sonra isə…”

Azərbaycan Premyer Liqasının 17-ci turunda “Zirə”yə 0:1 hesabı ilə uduzan “Neftçi”nin müdafiəçisi Voyislav Stankoviçin futbolinfo.az saytına müsahibəsi

• “Zirə”yə yenə qalib gələ bilmədiniz…
• Bu mövsüm “Zirə” bizim üçün uyğun olmayan rəqibdir. 5 dəfə üz-üzə gəlsək də, qalibiyyətimiz yoxdur, hətta qol belə vura bilməmişik. Bunun səbəbini bilmirəm. Yaxşı analizlər edib irəli getmək lazımdır.
• Matçdan sonra baş məşqçi Samir Abasov bildirdi ki, bizə vurulan qola baxanda əvvəlcədən müdafiəçilərə demişdim ki, belə epizoddan fərqlənə bilərlər. Həqiqətən belə idi?
• Bəli, oyundan əvvəl baş məşqçi bildirmişdi ki, rəqib bizə belə qol vura bilər. Ehtiyatlı olmağımızı tapşırdı. Çünki “Zirə” həqiqətən belə epizodlardan yararlanmağı bacarır. Lakin biz yenə də həmin epizodda düzgün oynamadıq və baş məşqçi dediyi kimi davrana bilmədik, qol buraxdıq. Əlbəttə ki, əgər bu cür epizodlara konsentrasiya ola bilmirsənsə…Halbuki çalışdırıcı tapşırır bu cür epizodları və futbolçular da nə etmək lazım olduğunu bilirdi. Lakin nəticədə uduzduq. Demək ki, nəsə uyğun gəlmir. Nəyisə dəyişmək lazımdır.
• Müdafiə planında səhv etdiniz, lakin komanda qol vurmaqda əziyyət çəkir. Bunun səbəbini nədə görürsən?
• Dediyim kimi bu mövsüm “Zirə”ni uda bilmirik. 5 matçdan sonra onlara qalib gələ bilməmişiksə, deməli rəqib bizə qarşı necə oynamalı olduğunu anlayır, vəssalam. Kubokda da onlara məğlub olduq.
• Bəlkə kubokdakı məğlubiyyətdən sonra üzərinizdə psixoloji təzyiq var idi?
• Fikrimcə, peşəkar komandada heç bir basqı, təzyiq olmamalıdır. Bəlkə də hansısa komanda yoldaşlarımda təzyiq var idi. Amma onların da bu cür olduğunu düşünmürəm. Biz peşəkarıq və hər matça 100 faiz hazır vəziyyətdə çıxmalıyıq. Maksimum gücümüzü meydanda qoyub futbolumuzu oynamaq lazımdır. Yalnız bu halda ən yaxşı olmaq mümkündür. Oyunlarda qalib gəlmək, xallar yığmaq lazımdır. Biz isə 1-2 oyun yaxşı çıxış edirik, amma digər matçda zəif təsir bağışlayırıq. Hər qarşılaşmada 100 faiz olmuruq sanki, maksimum güclə oynamırıq. Ona görə də səhvlərimiz üzərində ciddi işləməliyik.
• Çempionluq şanslarını neçə faizlə dəyərləndirərsən?
• Bu barədə danışmaq lazım deyil. Sadəcə qarşıdakı matça baxmalıyıq və hazırlaşmalıyıq. Çempionluq haqqında yalnız sonda – mayda danışa bilərik. Biz “Qarabağ”dan öndə idik, amma indi xallarımız eynidir. Ona görə də sadəcə növbəti oyun haqqında düşünməliyik. Yalnız bu cür irəliləyə bilərik. Birinci yer haqqında danışmaq üçün çox tezdir.
• “Qarabağ”la matçda qırmızı vərəqə alsan da, çox narazı görünürdün. Etirazın nəyə idi?
• Bəli, hakimdən razı deyildim. Mənə qırmızı vərəqə verməsi yanlış qərar idi. Hakim orada sarı vərəqəlik cərimə gördü, lakin mən onunla razı deyiləm. Sarı vərəqəlik epizod deyildi. Amma nə etmək olar ki? Meydanda referi qərar verir. 100 faiz əminəm ki, doğru deyildi.

AĞA