“Sumqayıt” niyə cəzalanmadı?

Elxan Məmmədov futboldan hər nə qədər bixəbər, Azərbaycanı sevməyən biri olsa da, rəhbər kimi eyni sözləri demək olmaz. AFFA-nın icraçı vitse-prezidenti şəxsi maraqlarını təmin etmək baxımından yaxşı idarəçidi, məqsədlərinə çatmaq üçün hər cür siyasi gedişi bacarır. Hiyləgərdi, kabinet oyunlarında ustadı, niyyətinə çatmaq metodlarını mükəmməl bilir.

“Qarabağ” ın yarımmüdafiəçisi Uroş Matiçin cəzalandırılması məsələsində o, bu bacarıqlarını bir daha göstərdi. Zamanlama, narazı, şikayətçi görünən kütləyə xoş gəlmək fürsəti dəyərləndirildi. Düzdü, texniki səhv buraxdı, meydanda olmayan birinə verilən cəza gülünc göründü. Keçmiş matçlara yox, məhz futbolçunun forma geymədiyi qarşılaşmaya görə cəza kəsmək Məmmədovu ifşa etdi.

Bununla belə, Elxan bəy birbaşa rəhbərlik etdiyi olayda sanki xəbərsiz kimi görünməyə çalışır ki, bu da idarəçilik bacarığıdı. Cəzanı verən İntizam Komitəsidi, sanksiya Reşəkar Futbol Liqasının Əsasnaməsinə görə tətbiq edilib və olayda imzası olan PFL prezidenti Ramin Musayevin qohumu Eldəniz Musayevdi. Məmmədovun “Qarabağ”a psixoloji basqı üçün kabinetdən verdiyi tapşırıq qərarda görünmür, lakin işin başında onun olduğunu hamı bilir.

“Sumqayıt” – “Qarabağ” oyununun AFFA nümayəndəsi Eldəniz bəy Matiçlə bağlı qeydləri sonradan əlavə edib. Oyunun protokolunda heç nə yazılmayıb, yalnız sonradan nümayəndə raportda Uroşla bağlı qeydlər edib. Meydanda görmədiyi, formasının necə olduğunu bilmədiyi serblə bağlı qeydlər onun sifarişlə bu addımı atmasının sübutudu.

Eldəniz bəy öncəki turlarda daha iki dəfə “Qarabağ”ın oyunlarına təyinat alıb, lakin gözləri məhz indi açılıb. Amma yox, açılmayıb, məcbur açıblar. Musayev gözüaçıq adam olsaydı, elə son turdakı digər qüsurları da görərdi. Və ədalətli adam olsaydı, “Sumqayıt” İntizam Komitəsi tərəfindən cərimələnməliydi.

Matçdan çəkilmiş fotolara baxanda Eldəniz bəyin qüsurlarını siz də aydın görərsiz. “Sumqayıt”ın ehtiyat oyunçular skamyasına diqqət edin: futbolçular yanaşı əyləşib, tribunada deyillər. Halbuki koronavirus pandemiyasına görə təlimatlarda ehtiyat oyunçuların tribunada əyləşməsi barədə tələb var, sosial məsafə qorunmalıdı. Deyək ki, Sumqayıt stadionunda belə şərait yoxdu, amma bu o demək deyil ki, futbolçular bir-birinin ağzına girməlidi. Onların arasında minimum bir oturacaq boş saxlanmalıdı. Amma meydan sahibləri bunu təmin etməyiblər, ev yiyəsi kimi hər iki komanda üçün bu şərait yaradılmalıydı, üstəlik, özləri şəxsən əməl etməliydilər. Ancaq və lakin…

AFFA İntizam Komitəsi Matiçi mətbuatda yazılan haqlı iradlara görə cəzalandırdığını bildirir. Qəbil edirik, o zaman “Sumqayıt”ın ehtiyat oyunçularına baxın və bu komandanı da cəzalandırın. Gözləyirik…

FƏRİD