“Sumqayıt”ın gözlənilən enişi

Daha bərabərgüclü komandalar yoxdu, Premyer Liqada hamı eyni səviyyəli deyil, aşkar güclü, ortababar və zəiflər mövcuddu. Ötən mövsüm az qala bütün komandalar bir-birini yenəcək gücdə idisə, indi matçlardan əvvəl favoritləri müəyyənləşdirmək asandı. Düzdü, bəzən sürprizlər olur, amma daha çox proqnozlaşdırılan nəticələrə şahidlik edirik.

“Zirə”nin Sumqayıtda rahat qələbə qazanacağı əvvəlcədən ehtimal edilirdi. “Sumqayıt” indi əvvəlki komanda deyil və güman ki, sonacan aytsayderlər qrupunda yer alacaq. Bürünc medal qazandıqdan sonra vacib olan güclənmə dalğasına rəhbərlik tərəfindən layiq bilinməyən kollektivdə hazırkı düşüş gözlənilən idi və təəəssüf ki, reallaşır.

Qonaqlar isə dünənki qələbə sayəsində ciddi xal fərqi yaratdı. Liderlər qrupunda möhkəmlənən “qartallar” Ayxan Abbasovun yetirmələrindən ikiqat çox xal toplayıb. Turun bu gün baş tutacaq bağlanış matçının nəticəsindən asılı olaraq, “Zirə” ikinci pillədə qala bilər, ən azı “üçlük”də olacağı isə dəqiqdi.

Mövsümə əla başlayan “Sumqayıt”ın heyət yetərsizliyi əvvəl-axır özünü göstərməliydi. Aparıcı oyunçuların eyni vaxtda sıradan çıxmasıyla böhran böyüdü və dünən Ayxan Abbasov məhz bu səbəbdən hətta ənənəvi taktiki düzülüşündən imtina etdi. Müdafiədə və dayaq bölgəsində oyunçu çatışmazlığı üzündən “Zirə”yə qarşı fərqli oynamaq riski fayda vermədi. Bu azmış kimi matçın startına Höccət Haqverdinin penaltiyə səbəbkar olmasıyla ümidlər puç oldu.

Cari mövsümdə bütün matçlarda qol vuran “Zirə” yarım saatın tamımanda matçın taleyini həll etmişdi. Rəqibin əskiklərindən ustalıqla yararlanan, oyun intizamından qopmayan, top saxlamaqla kompakt hücumlar təşkil edən qəsəbə təmsilçisi istəsəydi, daha çox qol vurardı. Amma 3 xala yetəcək qədər fərqlənməyi lazım bilən qonaqlar tempi aşağı saldı, fiziki gücünü qorumağı lazım bildi. Bundan cəsarətlənən meydan sahiblərinin ikinci hissədə nisbətən özünə gəlməsinin başqa səbəbi yox idi. Coşqun Diniyevin təkbaşına təşkil etdiyi 3-cü qol bütün suallara aydınlıq gətirdi.

“Səbail”, “Keşlə” və “Sumqayıt” – autsayderlərin hamısı turu xalsız başa vurdu. Bu komandalar qarşıdakı turlarda qış fasiləsinə son pillədə getməmək üçün qiyabi mübarizə aparacaq. “Sabah” da çox uzaqda deyil, amma paytaxt təmsilçisi nisbətən özünə gəlib, üstəlik, potensialı ilk “dördlüy”ə yaxınlaşmağa imkan verir, nəinki aşağı enməyə.

FƏRİD