Müsahibə
“Təsnifat mərhələləri artıq “Qarabağ”a dar gəlir”
2017-2019-cu illərdə Azərbaycanda “Qarabağ”ın formasını geyinmiş, bugünlərdə Polşanın II liqa komandası“Kotviça Kolobjeq”lə müqavilə imzalayan Yakub Jezniçakın futbolinfo.az saytına müsahibəsi
– Ötən mövsüm Polşa Ekstraklasasında çıxış edən Plotsk “Visla”sını tərk edərək, II Liqa təmsilçisi “Kotviça Kolobjeq” klubuna keçməyə sizi nə vadar etdi?
– Bunun bir neçə səbəbi var idi. Ən vacibi başməşqçinin məni şəxsən istəməsi, zəng vurması idi. Klub prezienti ilə görüşümdə də tələblər üst-üstə düşdü. Onların çox yaxşı layihələri var. Hədəfləri əvvəlcə I liqaya, daha sonra isə Ekstraklasaya yüksəlməkdir. Mən də karyeramın sonlarında qarşısına məqsəd qoyan bir komandaya kömək etmək istədim.
– Başqa təklifiniz yox idi?
– Həm Ekstraklasa, həm də I Liqadan təklifim var idi. Hətta ölkə xaricindən də zəng edənlər olurdu.
– Səmimi cavab verin: təklif göndərənlər arasında Azərbaycan klubu var idi?
– Tam səmimi cavab verirəm: var idi. Bir neçə klub Azərbaycana qayıtmağımı istəmişdi. Amma onların arasında “Qarabağ” yox idi. Premyer Liqanın nisbətən zəif komandalarından maraqlananlar oldu. Sadəcə, mənə dedilər ki, digər oyunçularla da danışıq aparmalıdırlar. Yəni Azərbaycana qayıdıb-qayıtmayacağımı dəqiqləşdirmək üçün gözləməli idim.
– Siz də gözləməyi yox, “Kotviça Kolobjeq”ə keçməyi üstün tutdunuz?
– Xeyr, bir müddət gözlədim. Hətta “Kotviça Kolobjeq”lə də bu barədə razılaşmışdım. Onlarla müqaviləni bu üzdən bir müddət yubatdıq.
– Artıq 37 yaşınız var. Maraqlıdır, karyeranızı nə vaxt bitirməyi planlaşdırırsınız?
– Açığı, əvvəllər futboldan daha tez gedəcəyimi düşünürdüm. Konkret tarix müəyyənləşdirməmişəm. İlk dəfə Ekstraklasadan aşağı liqada çıxış edəcəyəm. Məni siyahıdan silənləri yanıltmaq maraqlı olacaq. Hələ də özümü hazır sayıram və futbol oynamaqdan ilk gündəki kimi həzz alıram.
– Keçmiş komandanız “Qarabağ” və Polşa çempionu “Rakuv” Çempionlar Liqasının I təsnifat mərhələsini keçsələr, növbəti raundda rəqib olacaqlar. Bu mümkün cütlük barədə nə deyə bilərsiniz?
– “Qarabağ” xüsusi oyun fəlsəfəsinə sahib çox güclü komandadır. Zəngin Avropa təcrübələri var. Məncə, avrokuboklarda təsnifat mərhələləri artıq “Qarabağ”a dar gəlir. Rəqibin kimliyindən asılı olmayaraq, topla oynamağı, diqtə etməyi sevirlər. Bu komandanın ildən-ilə böyüdüyünü görmək çətin deyil. Bu səbəbdən “Rakuv”un işi çox çətin olacaq. Püşkatmada onlara mümkün potensial rəqiblərdən ən güclüsü düşdü. Ancaq istənilən halda “Rakuv”un avrokuboklarla bağlı hədəfi böyükdürsə, heç bir rəqibdən çəkinməməlidir.
– Ümumiyyətlə, “Qarabağ”ı izləyirsiniz, onların hazırkı durumundan məlumatınız var?
– Bəli, tez-tez “Qarabağ”ın oyunlarına baxıram. Əsasən avrokubok matçlarını izləyirəm. Komanda uzun illərdir Avropa arenasında mütəmadi çıxış edir. Artıq qruplardan sonrakı pley-offa qədər irəliləyə bilirlər. Bu da “Qarabağ”ın gücündən xəbər verir. Mənim vaxtımda Çempionlar Liqasının qrupunda çıxış etmişdik. Həmin vaxtdan bəri heyətdə radikal dəyişikliklər olmayıb. Əsasən əcnəbilər dəyişdirilib. Yerlilərin çoxu ilə çiyin-çiyinə oynamışam.
ABBAS