Toni Kroos: “UEFA və FİFA-nın kuklaları olmuşuq”

“Real”ın yarımmüdafiəçisi Toni Kroos Avropa Superliqası ideyasının ən fəal dəstəkçilərindəndir. O, çıxış etdiyi klubun prezidenti Florentino Peresin liderliyi ilə həyata keçirilməsi planlaşdırılan yeni yarışın reallaşmasını arzulayır.

Təcrübəli alman futbolçu gec-tez bu yarışın keçiriləcəyinə əmindir: “Mən inanıram ki, Avropa Superliqası layihəsini görəcəyik. Çox həyəcanlıyam və əminəm ki, artıq bir sıra klublar bu barədə qərarını dəyişdirəcək. Hətta əminəm ki, bu layihə futbol adına böyük üstünlük verəcək. UEFA-nın futbol azarkeşləri adına hər hansı bir səmərəsinin olmadığını və Avropa Superliqası layihəsində hər hansı klubu xaric etmək kimi planın yer almadığını görərsiniz. Bu, klubların özlərinin idarə edəcəyi bir idman müsabiqəsidir, açıq bir turnirdir. Ən əsası isə bu layihə UEFA tərəfindən idarə edilməyəcək, çünki bu klubların bunun üçün UEFA-ya ehtiyacı yoxdur”.

Kroos futbola olan hisslərin tükənmək üzrə olduğunu düşünür: “Bundan daha əvvəl bəhs etsək də, Superliqa layihəsi bu məsələdə geridönüş yarada bilər. Görə biləcəyimiz oyunlar üçün daha çox hisslər və daha çox həyəcan yaranacaq. Biz oyunçular da UEFA və FİFA-nın kuklaları olmuşuq. Onlar özlərindən Millətlər Liqası kimi mənasız turnir yaradıblar. UEFA-nın heç kimin ehtiyacı olmayan Millətlər Liqasını yaratması niyə sorğulanmır? Gəlin, özümüzü aldatmayaq. Bir çox insan “Real” – “Mançester Siti” görüşlərini izləməyi daha üstün tutar”.