Trossardın taleyi prezidentdən asılıdır

Leandro Trossard ətrafında qeyri-müəyyənlik davam edir. “Brayton”dan elə bu yanvarda ayrılmağa çalışan belçikalı yarımmüdafiəçiylə bağlı yekun qərarı klub prezidenti Toni Blum verəcək.

Futbolinfo.az xəbər verir ki, “Brayton”un əsas heyət üzvlərindən olan futbolçunun qəfil ayrılığı baş məşqçi ilə münasibətlərə görədir. Roberto de Zerbi ilə münasibətləri korlanan belçikalı, ötən həftə təkbaşına məşq edib, son iki matçın heyətinə daxil edilməyib. O, məşqçi ilə dalaşdığı üçün burada qalmağı mənasız hesab edir.

Komanda yaxşı çıxış etdiyindən, rəhbərlik italiyalı çalışdırıcıdan razıdır. Həm də hər hansı münaqişədə futbolçuları müdafiə etməyi lazım bilmirlər. Oyunçu getmək istəyirsə, onu satmaq da problem deyil. Ben Uayt, Yves Bissuma, Mark Kukurella kimi futbolçuları yüksək qiymətə satan “Brayton”un çıxışnda eniş baş verməyib. Ona görə Trossardın gedişi də qorxulu deyil.

Leandronun müqaviləsi yayda bitəcək, lakin klub istəsə, anlaşmanı daha bir il uzada bilər. Ona görə də “Brayton” rəhbərliyi endirimə getməyəcək, futbolçunu istəyənlər yüksək transfer haqqı ödəməlidir.