Volkan Üstlə yenə ikiaylıq müqavilə bağlandı – 3-cü dəfə

“CBC Sport”un direktoru Volkan Üst yeni müqavilə bağlayıb. Türkiyəli idarəçi daha iki ay telekanala rəhbərlik edəcək.

Futbolinfo.az xəbər verir ki, “CBC Sport”da islahatlar yenə yubanır. Bir müddət öncə kanalda müəyyən dəyişikliklər edildi, bəzi kadrlar işdən azad olundu. Tezliklə yeni rəhbərin təyin olanacağı gözlənilirdi. Lakin bir sıra məsələlər həll olunmadığı və layiqli namizəd tapılmadığı üçün proses yubanır.

Bir neçə gün öncə isə Volkan Üstlə yeni müqavilə rəsmiləşib. 2016-cı ildən “CBC Sport”a rəhbərlik edən bu şəxs hər dəfə bitən müqaviləsini bir illik yeniləyirdisə, 2023-cü ildən başlayaraq, iki aydan bir yeni anlaşmaya imza atır. Öncə yanvar və fevral, ardınca mart və aprel üçün müqavilə bağlayan Üst, indi də iyunun sonunadək postunda qalacağını qətiləşdirib. Hansısa qurumun rəhbəri ilə belə qısamüddətli müqavilə – həm də 3-cü dəfə – onun tezliklə yola salınacağını göstərir.

Hər halda, lazımlı kadra belə aşağılayıcı təklif edilməz və öz bacarığına arxayın olan adam da təklifə razılaşmaz. Hadisələrin gedişi göstərir ki, Volkan bəyin gedişi sadəcə, zaman məsələsidir, layiqli namizəd tapılan kimi yola salınacaq.