Xankəndi filialı açıldı

“Unibank”ın Azərbaycan çempionatına sponsorluq etdiyi vaxtlar idi. “Qarabağ”ın ev matçlarında, xüsusilə avrokubok oyunlarında bir banner stadionları bəzəyirdi: “Xankəndi filialının açılması arzusu ilə” (təqdim etdiyimiz videoda 9-cu saniyədə və 1 dəqiqə 44-cü saniyəyə diqqət – müəl.)…

İndi “Unibank”a Xankəndidə filial açmağın qismət olacağına ümid edirik. Məhz həmin şüara, ümidlərin yaşadılmasına görə o bank bu şərəfə layiqdir. İllər sonra “Qarabağ” işğaldan xilas edilmiş doğma şəhərimizə qayıdırsa, bu gün futbol ictimaiyyətinin ən önəmli simaları, jurnalistlər, azarkeşlər futbol bayramında iştirak üçün yola çıxıbsa, kaş o bank da yada salınaydı.

***

Bu gün Xankəndi şəhərində tarixi futbol oyunu keçiriləcək. “Qarabağ” Azərbaycan kubokunun 1/8 final mərhələsindəki oyununu adını daşıdığı bölgənin mərkəzi şəhərlərindən olan Xankəndidə reallaşdıracaq. Rəqib işğal altındakı torpaqlarımızı azad edən Azərbaycan ordusunun mənsub olduğu Müdafiə Nazirliyinin komandası MOİK olacaq.

Bəlkə də püşk atılanda kimsə bu ssenarini təsəvvür etməzdi. Amma həqiqət anıdır. Müzəffər Ali Baş Komandanın ad günü ərəfəsində bütün simvollar eyni məkanda bir araya gəlir.

Futbolda adlı-sanlı rəqibindən zəif olan MOİK-in, deməli, Azərbaycan ordusunun təmsilçisinin məğlub olacağı ehtimalı böyükdür. Xankəndidə uduzmaq hərbçilərimizə yaraşmayacaq. Lakin futbol meydanında məğlub olmaq olar. Döyüş meydanında düşmən üzərində müzəffər olan ordunun təmsilçisi futbolda sıradan ada yox, azad etdiyi bölgənin simvolu olan, o bölgənin adını yaşatmaqla yaddan çıxmağa qoymayan komandaya uduzacaq.

Bu, 30 illik, 366 aylıq fasilədən sonra Qarabağ bölgəsinin işğaldan azad edilən hissəsində ilk rəsmi oyun olacaq. Komandalarımız bunadək son dəfə işğal altına düşmüş torpaqlarda 1993-cü il mayın 12-də meydana çıxmış, Azərbaycan kubokunun yarımfinalında “Qarabağ”la “Turan” (Tovuz) görüşmüşdü. Ağdamın “İmarət” stadionunda keçirilmiş həmin matçda “Qarabağ” Yaşar Hüseynovun qolu sayəsində 1:0 hesabı ilə qələbə qazanmışdı.

Bu oyundan 2 ay sonra Ağdam işğal edilmiş, “Qarabağ” rəqiblərini müxtəlif illərdə Mingəçevir, Sumqayıt və Bakıda qəbul etmişdi. Və indi yenə kubok oyunu üçün o bölgəyə qayıdırıq.

Düzdür, 2009-10-cu illərdə “Qarabağ” Azərbaycan çempionatı və kubokunda bir neçə ev oyununu Ağdamın işğala məruz qalmayan Quzanlı qəsəbəsində keçirib. Lakin bugünkü matç işğal altında olmuş torpaqlarımızda reallaşacaq ilk oyundur.

Qalibinin 1/4 finalda “Sabah”a rəqib olacağı bugünkü oyun saat 14:00-da başlanacaq. Qarşılaşma öncəsi bir sıra tədbirlər keçirilməsi planlaşdırılır. Oyunu minlərlə tamaşaçının stadiondan canlı izləyəcəyi gözlənilir. Eyni zamanda, rəsmən açıqlanmasa da, dövlət rəhbərliynin də Xankəndidə olacağı haqda məlumatlar var.

Artıq arenada bütün işlər tamamlanıb. Stadionda yeni oturacaqlar quraşdırılıb, qapı arxasında tribunalardan birinin üzərində böyük hərflərlə “Qarabağ Azərbaycandır”, digərinə isə “Xankəndi” sözləri yazılıb.

***

Xankəndidə yeni filialımızı açırıq. Azərbaycan futbolunun filialını… Hələlik bir oyunluq, lakin növbəti illərdə bu şəhərin də futbol komandası olacaq, şəhərdə məckunlaşacaq əhali Xankəndi təmsilçisinin azarkeşinə çevriləcək.

VÜSAL MAHMUDOV