Yankoviç tətilə əla əhvalda getmək istəyir: “Hər komanda şansından istifadə etməyə çalışır”

“Qarabağ”ın yarımmüdafiəçisi Marko Yankoviç futbolinfo.az saytına müsahibə verib. O, komandasının İsveçin “Hakken” klubuna 2:1 hesabı ilə qalib gəldiyi görüşdən, Avropa Liqasındakı növbəti matçlardan və qış fasiləsinə qədər keçirəcəkləri oyunlardan danışıb.

– Tarixi matça çıxdınız və tarixi yazdınız. Özünü necə hiss edirsən?

– Təbii ki, hər kəs fəxr etməlidir, hər kəs bu cür nəticədən sonra sevinməlidir. Bu, ölkə futbolu üçün böyük hadisədir. Biz Azərbaycan futbolu üçün çox yaxşı hadisəyə səbəb olduq.

– Qrup mərhələsinin püşkü atılanda hər kəs “Qarabağ”ın bu qrupdan çıxacağına inanırdı. Çünki iki rəqib tam olaraq komandaya uyğun idi. Həmin vaxt sizdə də eyni hisslər var idi?

– Yəqin ki, klubdan kənar insanlar vəziyyəti yaxşı başa düşmürlər. Düşdüyümüz hər hansı bir qrupda indiki kimi yenə də inanar və mübarizə aparardıq. Lakin biz qrupumuzdakı bütün komandaların, xüsusən “Bayer”in gücünü çox yaxşı bilirdik.

– Qrupdakı hansı oyun sizin üçün ağır oldu? Məsələn, səfərdə “Molde”yə qarşı keçirdiyiniz oyun daha çətin idi?

– Bütün oyunlarımız ağır və gərgin idi. Məsələn, son oyun çox çətin keçdi. Qırmızı vərəqədən sonra ağır oldu. Amma “Mölde” ilə matçın da çətin və gərgin keçdiyi ilə razıyam.

– Növbəti mərhələdə hansı rəqibi seçərdiz? Məsələn, azarkeşlər 1/8 finala getmək üçün ən uyğun komandanın “Yanq Boyz” olduğunu düşünür…

– Bu fikirlə razılaşmıram. Belə turnirlərdə oynayan istənilən komanda çətindir. Onlar niyə buralarda olduqlarını göstərirlər. Ola bilər ki, adına görə digərlərindən məşhur olmaması bu fikirləri yaradır. Amma inanın ki, asan deyil. Hər komanda öz şansını istifadə edərək irəli getmək, uğur qazanmaq istəyir.

– Bu cür qələbələr daha böyük iştah yaradır? Məsələn, 1/8, 1/4 final haqqında düşünürsünüz?

– Çox uzağa getmək istəmirəm. Oyundan oyuna daha yaxşı olmalıyıq. Növbəti matçları düşünüb oynamalıyıq.

– Qarşıda “Neftçi” ilə oyun var. Tarixi qələbə motivasiyanızı daha çox artırıb?

– Biz peşəkarıq, rahat olmağı, ancaq bayram etməyi fikirləşməməliyik. Çünki turnir cədvəli sıxdır, qrafik ağırdır. “Neftçi” ilə oyuna qələbə üçün çıxacağıq, necə ki, digər matçlara çıxırıq. Bundan sonrakı bütün oyunlara ciddi yanaşmalıyıq ki, bayram tətilinə yüksək əhval-ruhiyyədə gedək.

FƏRİD