Ölkə futbolu
Yeni AFFA prezidenti bəllidir: bəs, “Neftçi” kimə tapşırılacaq?
Yeni AFFA prezidentinin adı bəlli olmaq üzrədir. Qeyri-adi bir şey baş verməsə, Rövşən Nəcəf Növbəti Hesabat-Seçki Konfransında bu posta yeganə namizəd olacaq.
Düzdür, rəsmi açıqlama yoxdur. Amma proseslər digər iddialıların arxa plana düşdüyünü, Nəcəfin bir addım önə çıxdığını göstərir.
Onun namizəd olması üçün heç bir hüquqi əngəl yoxdur. Rövşən bəy 2022-ci ilin dekabrından “Neftçi”nin rəhbəri olduğu üçün minimum “bir illik futbol fəaliyyəti” kriteriyasına uyğun gəlir. Onun SOCAR-a da rəhbərlik etdiyini nəzərə alsaq, əsas namizəd olması başadüşüləndir. Çünki az qala bütün futbol təsərrüfatı maliyyəsini neft şirkətindən alır, məhz buradan qidalanır.
Əslində, Rövşən bəy “Neftçi”yə göndəriləndə onun AFFA prezidentliyi üçün hazırlandığı bəlli idi. Sadəcə, klubda fəaliyyəti qənaətbəxş olmadı. Hətta klubun büdcəsinin əhəmiyyətli dərəcədə artırılması da işə yaramadı. Futboldakı naşılıq üzündən səhv seçimlər acınacaqlı vəziyyətə səbəb oldu. AFFA-da eyni səhvlər təkrarlanmasa, bu dəfə iş bacarılqlı insanlara, əal mütəxəssislərə tapşırılsa və düzgün istiqamət seçilsə, Nəcəfin uğurlu olması mümkündür.
Fuad Musayev, Ramiz Mirzəyev, Rövnəq Abdullayev – bu günə qədər bütün AFFA prezidentləri “Neftçi”dən seçilib. Ona görə də “Neftçi”yə rəhbər gələn, eyni zamanda güclü maliyyə dayaqları etibar edilən şəxsin bir gün AFFA-da görünməsi realdır. Nəsəfin sələflərindən bircə fərqi klubdakı uğursuz işidir. Çünki əvvəlki rəhbərlər hamısı paytaxt klubunda ən azı ölkə daxilində müəyyən uğur qazandıqdan sonra ölkə futboluna rəhbərliyə gətirilib.
Rövşən bəyin yeganə namizəd olması AFFA prezidenti seçiləcəyi deməkdir. Belədə ortaya növbəti sual çıxır: bəs, “Neftçi”nin taleyi necə olacaq? Klubun büdcəsi böyük, nəticələri qeyri-qənaətbəxşdir. Üstəlik, son vaxtlar klubda maliyyə problemləri də yaşanır, iki aydır ödəmələr yubanır. Nəcəf mütləq bu məsələləri yoluna qoymalı, daha sonra özünə xələf seçməlidir.
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı