Müsahibə
Qara Qarayev: "Hələ də çempion olduğumuza inana bilmirəm"
Futbol üzrə Azərbaycan yığmasının və "Qarabağ"?…
Futbol üzrə Azərbaycan yığmasının və "Qarabağ"ın yarımmüdafiəçisi Qara Qarayevin futbolinfo.az saytına müsahibəsi
– Çempion olmaq necə hissdi?
– Hələ də çempion olduğumuza inana bilmirəm. Elə bilirəm ki, yuxuduyam. O qədər sevincliyəm ki… Bu, elə bir hissdi ki, bunu sözlə ifadə etmək mümkün deyil. Bura ilk dəfə gələndə "Qarabağ"la çempion olmaq xəyalım idim. Elə o vaxtdan arzum idi ki, əsas komandada oynayım və çempion olum. Şükürlər olsun ki, bu arzuma da çatdım.
– Çempionluq sevincini ilk kimlə paylaşdız?
– Yanımda olan adamlara sarıldım. Bu yola komanda yoşdaşlarımla, məşqçilərimizlə birgə çıxığığımız üçün öncə bu sevinci onlarla paylaşdım.
– Bu yolda sizə əlavə motivasiya verən hansı amil oldu?
– 21 il idi ki,"Qarabağ" çempion olmurdu. Bu, komanda üçün çox uzun müddətdi. Qarabağın işğalından sonra bu sevinci yaşamamış bir komanda idi. Movsüm başlayanda elə heyətimiz var idi ki, butün heyət nəticə qazanmaq istəyirdi. Çempion olmağın vacibliyini dərk edirdik. Komandada elə bir adam yox idi ki, çempion olmaq istəməsin. Bu da bizə əlavə güc veirdi.
– "Qarabağ" 1993-cü ildə kuboku alanda Ağdamın işğalı stadionda elan olunmuşdu. Bu dəfə çempionluğunuzu rəsmiləşdirən günün səhəri Şuşanın işğal tarixinə düşdü. Bu ayın 17-də isə Laçının işğal tarixində qızıl medallara yiyələnəcəksiz. Sizcə, bütün bunlar təsadüfdü?
– Fikrimcə, bu yaxşı təsadüfdü. Bir qarabağlı kimi Şuşanın işğal günündən öncə çempion olmaq haradasa 1-2 saatlıq qəm-kədəri unutdurur. Ancaq bu hər zaman 1-2 saatlıq olmamalıdı. İnşallah, vaxt gələcək Şuşada, Laçında, Ağdamda çıxış edib, azarkeşlərimizi Qarabağda sevindirəcəyik.