Müsahibə
Əsgər Abdullayev: "Elə bir komanda qurmaq istəyirəm ki…"
Futbol üzrə Azərbaycan 1-ci divizionunda vaxtından öncə …
Futbol üzrə Azərbaycan 1-ci divizionunda vaxtından öncə ölkə çempionu adını qazanaraq, Premyer Liqada mübarizə aparmaq şansı əldə edən "Araz Naxçıvan"ın baş məşqçisi Əsgər Abdullayevin futbolinfo.az saytına müsahibəsi
– Öncə çempionluq haqda fikirlərinizi öyrənək…
– Məqsədimiz çempion olmaq, güclülər dəstəsinə çıxmaq idi və buna da nail olduq. Bilirik ki, güclülər dəstəsində asan olmayacaq. Buna baxmayaraq, çalışacağıq ki, layiqli çıxış edək.
– Ümumiyyətlə 30 turluq marafon necə keçdi?
– Bu marafon heç də asan olmadı. Əlbəttə ki, həyacanlı günlərimiz oldu. Çalışırdıq ki, hər bir rəqibi dəyərləndirək və onlarla hesablaşaq. Bundan əlavə hər bir oyuna son matç kimi çıxırdıq. Bu amalla da istəyimizə nail olduq. Rəqibləri reytinqlərə bölmək heç də yaxşı nəticələnmir. Ən əsas öz oyunumuz idi və bunu da bacardıq.
– Təbii ki, futbol söz-söhbətlərlə doludu. Siz də təsdiqləyərsiz ki, komandanızın çempionluğunda hakimlərin köməyi olduğu xəbərləri dolaşırdı…
– Kim necə düşünmək qabiliyyətinə malikdisə, elə də danışır. Hər halda "Araz Naxçıvan" 1-ci dəstədə layiqli rəqib idi və hər bir komanda ilə futbol oynamağı bacarırdı. Düşünürəm ki, bu söz-söhbətlər "Simurq"la, "Xəzər Lənkəran"la oyundan sonra aradan götürüldü. İnsan eşitdiyinə deyil, gördüyünə inanmalıdı. Əgər "Araz Naxçıvan" kubokda da mərhələ keçirsə, bunu müzakirə etmək olmaz. Mən kimsənin dalınca danışmağı xoşlamıram. Amma kubok oyunları elə söhbətlərin aradan qalxması üçün böyük amil idi.
– "Araz Naxçıvan"ın hazırkı heyəti Premyer Liqa üçün ideal deyil. Komandanı hansı dəyişikliklər gözləyir?
– Hər halda bu yaxınlarda açıqlayacağıq. Layiqli çıxış etməyimiz üçün ən azından heyətə 5-6 futbolçu cəlb etməliyik. Güclülər dəstəsi səviyyə baxımından diviziondan fərqlidi. Biz də istəyirik ki, Premyer Liqada layiqli çıxış edək.
– Artıq hansı mövqeni gücləndirmək lazım olduğunu dəqiqləşdirmisiz?
– Mənə elə gəlir ki, hər bir mövqedə oyunçuya ehtiyacımız var. Düzdü, hər mövqedə oyunçularımız var, lakin bir də lider futbolçu olmalıdı. İnanıram ki, bunu da həyata keçirəcəyik.
– Sizin transfer siyasətiniz necə olacaq? Üstünlük yerli, yoxsa legioner futbolçulara veriləcək?
– Komandaya kim xeyir verə biləcəksə, həmin futbolçunu cəlb etməyə çalışacağıq. Çox istərdik ki, yerli futbolçulara üstünlük verək. Amma onlar olmadıqdan sonra yəqin ki, legionerlər də cəlb olunacaq.
– Özünüzü Premyer Liqanın hansı komandası ilə mübarizə aparacaq gücdə görürsünüz?
– 10 komandanın arasında seçim etsək ki, buna uduzacağıq, o birisini udacağıq, o zaman bizim elitaya çıxmağımıza ehtiyac yoxdu. Əsas odu ki, hər bir rəqibi dəyərləndirək. Elə bir komanda düzəltmək istəyirəm ki, Premyer Liqaya rəng qatan komanda olsun, sürünənlər dəstəsində olmasın. Yəni güclülər dəstəsinə layiq olan bir komanda yaratmağa çalışacam. Təbii ki, bu asan iş deyil, amma mümkünsüz də deyil.
RÖVŞƏN ƏHLİMANOĞLU