Müsahibə
Canluka Zambrotta: "Bu, tək Azərbaycan üçün yox, bütün region üçün böyük iş olar"
İtaliya millisinin sabiq müdafiəçisi Canluka Zambrotta b…
İtaliya millisinin sabiq müdafiəçisi Canluka Zambrotta bu gün keçirilən Beynəlxalq Futbol Könüllülüyü Forumunun səfiri kimi iştirak edib. Futbolinfo.az saytının məlumatına görə, “Yuventus”, “Barselona” və “Milan”ın sabiq sol cinah müdafiəçisi brifinqdə jurnalistləri maraqlandıran sualları cavablandırıb.
– Yəqin ki, Bakını gəzmək imkanınız olub. Şəhərimiz sizə necə təsir bağışladı?
– Dünən axşam bura gəlmişik. Öncə Dənizkənarı Bulvarda gəzmək imkanımız olub. Ordan çox müsbət enerji aldım. Bakı Neapola çox oxşayır. Çünki ikisi də dəniz kənarında oxşar mənzərəyə sahibdir. Şəhərinizin bu gözəlliyindən çox məmnun qaldım.
– Azərbaycan yığması növbəti Avropa çempionatının seçmə mərhələsində İtaliya ilə eyni qrupa düşüb. Millimiz İtaliyadan xal almaq üçün nə etməlidir?
– 2004-cü il Avropa çempionatında da bir qrupda idik. Artıq komandalarımız 2 dəfə qarşılaşıb. Həmin matçlar bizim üçün asan keçməmişdi. İtaliya yığmasına bu görüşlərdə çətinliklər hiss etdirə bilmişdiniz. Ona görə də deyə bilərəm ki, Azərbaycan yığması heç də zəif deyil. Bu dəfə hər 2 komanda arasında gərgin mübarizə gedəcək.
– Bakıdakı qarşılaşmadan yadınızda nə qalıb?
– Həmin vaxt mən yox idim. Onda Bakıya gəlməmişdim. Amma mən həmin görüşün videoyazısına baxmışdım. Yadımdadır ki, birinci avtoqol qeydə alınmışdı. Daha sonra Alessandro del Pyero fərqlənmişdi. Bu qolları vurmaq bizə heç də asan başa gəlməmişdi.
– Xarici ölkələrdə azərbaycanlılarla italyanların xaraktercə oxşar millət olduğunu düşünürlər. Artıq bir gündür burdasınız. Siz bu baxımdan necə fikirləşirsiniz?
– Az müddət ərzində burda olsam da, artıq Bakının İtaliyanın cənubu ilə oxşarlığını hiss etdim. Bulvarda gəzdiyim zaman gördüyüm insanların zahiri baxımdan italyanlara bənzədiyini deyə bilərəm. Heyf ki hələ çox sayda azərbaycanlı görməmişəm. Bu gün görək necə olacaq.
– Bakı Avro-2020-yə namizəd şəhərlərdən biridir. Azərbaycanın qitə birinciliyində meydan sahibi olmağını istəyərdiniz?
– Düşünürəm ki, bu, tək Azərbaycan üçün yox, region üçün böyük iş olar. Çünki belə bir çempionatı keçirməyə Bakının imkanları var. Artıq bunu öz gözlərimlə görmüşəm. Bu mümkün olacaq bir şeydir.
– Dünya çempionatında İtaliyanın şanslarını dəyərləndirərdiniz. Dünya çempionu olan İtaliya ilə indiki arasında hansı fərqlər var?
– İtaliyanın finala çıxması üçün böyük imkanları var. İndiki ilə o vaxtkı arasında elə böyük fərq görmürəm. Ola bilər ki, hazırda kağız üzərində o komanda daha güclü görünür. Ancaq budəfəki komandanın kollektiv oyun baxımından daha yüksək nəticə qazanmaq imkanı böyükdür. Tək qalib gəlmək yox, kollektiv şəkildə bunu etmək əsas məsələdir. Forumdakı çıxışımda dediyim kimi, belə yarışlarda əsas məsələ qrup halında yaxşı mübarizə aparmaqdır. (apasport.az)