Müsahibə
Son mövsümün "ən"ləri
Topaz Premyer Liqasının 2013/2014 mövsümü başa &cced…
Topaz Premyer Liqasının 2013/2014 mövsümü başa çatdı. "Qarabağ" 21 ildən sonra çempionluq həsrətinə son qoydu. "İnter" üçün gümüş medallar yad olmasa da, "Qəbələ"nin qazandığı bürünc medal tarixində əldə etdiyi ən böyük uğurdu. Uzun marafonda sabit və qeyri-sabit oyun sərgiləyənlərlə yanaşı, komandaların etdikləri uğurlu və uğursuz transferləri də oldu. Bunda başqa daha əvvəllər yüksək performansları ilə yadda qalan futbolçular, cari mövsümdə onlardan gözlənilən oyunu sərgiləmədilər. Futbolinfo.az saytı olaraq, başa çatan mövsümün "ən"lərinin siyahısını hazırladıq.
Ən yaxşı baş məşqçi – Qurban Qurbanov (Qarabağ): 2008-ci ildən bu yana "Qarabağ"da çalışan Qurban Qurbanov 6 ildən sonra çəkdiyi əziyyətin qarşılığını gördü. Cari mövsümü çempion kimi başa vuran Qurbanovun komandası sərgilədiyi oyunla göz oxşadı. O, bu postda ilk medalını qazanmaqla yanaşı, Çempionlar Liqasına vəsiqə qazanan ən gənc yerli baş məşqçi kimi tarixə düşdü. Ən yaxşı məşqçi kimi "İnter"in çalışdırıcı Kaxaber Sxadadzeni də seçə bilərdik. Ancaq gürcü çalışdırıcının lazımsız transferlərə ehtiyac duyması və mövsümə uğursuz başlaması qızıl medalların qazanılmasına mane oldu.
Ən pis baş məşqçi – Güvənc Kurtar (Rəvan). Türkiyədə başçılıq etdiyi komandanı aşağı diviziona düşürməklə ad çıxaran Güvənc Kurtar bu "uğuru" Azərbaycanda da təkrarladı. "Rəvan"da baş verən ardıcıl məşqçi istefalarından sonra qış fasiləsində komandanın "sükanı arxası"na keçən türk çalışdırıcı öz şəxsi uğurlarını artırmaq naminə Premyer Liqa oyunlarını kuboka qurban verməklə "aslanlar"ın 1-ci diviziona yurvarlanmasında böyük pay sahibi oldu. Ona görə də mövsümün ən pis məşqçisinin Kurtarın olduğunu əminliklə demək olar.
Ən yaxşı qapıçı – İbrahim Şehiç (Qarabağ). Oktyabr ayında "Manisaspor"dan azad agent kimi transfer olunan Şehiç çox keçmədi ki, Miro Varvodiçin komandadan göndərilməsinə, Fərhad Vəliyevin isə ehtiyatda qalmasına səbəb oldu. Meydana çıxdığı oyunlarda inamlı təsir bağışlayan qapıçı 100 faizlik qol epizodları zamanı komandasının əsas xilaskarına çevrilməklə əsas heyətə layiq olduğunu sübut etdi. Təcrübəli qapıçı "Qarabağ"ın mövsüm ərzində qapısında gördüyü 22 qoldan yalnız 12-də "pay sahibidi". İstənilən halda bosniyalı qapıçının Ağdam klubunun çempion olmasında əməyi böyükdü.
Ən pis qapıçı – Orxan Sadıqlı (Xəzər Lənkəran). Gənc qapıçı mövsüm ərzində elə də sabit oyun sərgiləmədi. Əksər matçlarda buraxdığı kobud səhvlər komandasının məğlub olmasına gətirib çıxardı. Bundan başqa komandada layiqli əvəzedici qapıçının olmaması Sadıqlının öz üzərində çalışmamasına gətirib çıxardı. Düzdü, qapıçının ara-sıra möhtəşəm qurtarışları da oldu. Ancaq bu, onun buraxdığı səhvlərdən çox deyildi.
Ən yaxşı müdafiəçi – Karlos Kardoso (Neftçi). Braziliyalı müdafiəçinin "Neftçi"nin arxa xəttinin "dirəy"i olduğunu desək, yanılmarıq. Onun cəza səbəbi ilə olmadığı oyunlarda "Neftçi"nin müdafiəsində olan boşluqları açıq-aşkar sezmək olurdu. Aqressiyası və əzmli oyunu, hərdən də irəli atılaraq qol vurmaq qabiliyyətini nümayiş etdirməsi onu ən yaxşı müdafiəçi seçməmizə səbəb oldu.
Ən pis müdafiəçi – Elnur Allahverdiyev (Qəbələ). Azərbaycanın ən intizamsız futbolçularından olan Allahverdiyev əksər matçlarda komandasını pis vəziyyətdə qoydu. İntizamsızlığı, hakimlərə qarşı aqresiyyası, o cümlədən də komanda yoldaşlarına qarşı xoş olmayan münasibəti istər-istəməz "Qəbələ"nin oyununa da öz mənfi təsirini göstərdi. "Harda aş, orada baş" olan Elnurun "qırmızı-qaralar"a xeyirindən çox ziyanının dəydiyini demək olar. Etdiyi səhvlərdən sonra peşmanlıq hissi keçirməsi belə, onun ən pis müdafiəçi kimi seçməyimizə yetmədi.
Ən yaxşı yarımmüdafiəçi – Reynaldo (Qarabağ). Braziliyalı yarımmüdafiəçi ölkəmizə gələn ən güclü legionerlədən biri, bəlkə də birincisidi. Komandasının çempion olması üçün 22 qol vuran futbolçu mövsümü major notlarla başa vurdu. Cari çempionatın bombardiri həm də Avropa Liqasında vurduğu 5 qolla komandasının pley-offa qədər yüksəlməsinə səbəb olmuşdu. Onun gözəl oyunu hətta milli komandamıza cəlb olunması barədə söz-söhbətlərə də rəvac verib. Hər hansı bir komandanın heyətində Reynaldo kimi futbolçu varsa, deməli, həmin klub matça 1:0 öndə başlayır.
Ən pis yarımmüdafiəçi – Elvin Məmmədov (Bakı). "Zolaqlılar"ın yarımmüdafiəçisi mövsümü uğursuz başa vurdu. O, əvvəlki mövsümlərdən fərqli, bu çempionatda sahib olduğu performansı tam olaraq ortaya qoya bilmədi. Millimizin üzvünün qeyri-sabit oyunu sözsüz ki, "Bakı"nın da çıxışına öz mənfi təsirini göstərdi. Halbuki zamanında Məmmədov mövqeyinin ən güclülərindən biri idi.
Ən yaxşı hücumçu – Daniel Subotiç (Qəbələ). "Qəbələ"nin konkret oyun sisteminin olmaması "radarlar"ın bütün hücumlarının Daniel Subotiçin üzərində qurulması ilə nəticələndi. Onun yoxluğunda isə komanda hücumda diqqətçəkən dərəcədə "dişsiz" görünürdü. Bitirici və qüvvətli vuruşları sayəsində komandasının dadına çatan isveçrəli "Qəbələ"nin uğur qazanmasında ən böyük pay sahibi olanlardandı. Cari mövsümdə vurduğu 11 qolun demək olar ki, əksəriyyəti futbolçunun fərdi usatalığının göstəricisidi.
Ən pis hücumçu – Nikolas Gelaşvili (Qarabağ). Bəh-bəhlə komandaya cəlb olunan gürcü forvard ona bəslənilən ümidləri doğrultmadı. Qurban Qurbanov ona Avroliqa matçlarında şans versə də, o qol epizodlarını boşa verməklə azarkeşləri çılğına çevirdi. Onun qol vurmasına möcüzə kimi baxanlar, bunun 7 dəfə şahidi oldu. Qış fasiləsində ciddi zədələnən gürcü forvad özünə gələndə isə artıq "Qarabağ" çempionluğu qeyd edirdi.
Ən uğurlu transfer – Çumbinyo (Qarabağ). Brazilyalı yarımmüdafiəçi "Qarabağ"ın uğur qazanmasında ən çox pay sahibi olanlardan biridi. Dəqiq ötürmələri, müdafiəçilərin başını gicəlləndirən driblinqləri, o cümlədən də cərimə zərbəsindən vurduğu mükəmməl qollar onun səviyyəsinin yüksək olmasından xəbər verirdi. Mövsüm ərzində 8 qol vurdu, məhsuldar ötürmələri ilə yadda qaldı. Maraq üçün qeyd edək ki, "Qarabağ"ın yarımmüdafiə xəttində çıxış edən Çumbinyo, Reynaldo və Leroy Corcun ümumilikdə məhsuldarlığı (39) "Simurq", AZAL, "Sumqayıt" və "Rəvan"ın vurduğu qolların sayından çoxdu.
Ən uğursuz transfer – Jaba Dvali (Qarabağ). Gürcüstanlı futbolçu ölkəmizdə ancaq "Qarabağ"ın avtobusu ilə oyunlara gedib-gəlməklə məşğul oldu. Qurban Qurbanov ona çox az şans verdi. Ancaq meydana çıxdığı oyunlarda da legioner kimi təsir bağışlamadı. Bu da təsadüfi deyil ki, mövsüm başa çatan kimi onunla icarə müddəti uzadılmadı. Düzdü, Ulrix Kopolonqonu da bu nominasiyaya layiq görə bilərdik. Ancaq onun Avroliqa matçında "Piast"ın qapısına vurduğu qol, "Qarabağ"ın mərhələ adlamasına kömək etdiyi üçün, qaradərili futbolçunun işinə yaradı. Eyni zamanda, uğursuz transferlərə digər klublardan da xeyli namizədlər vardı. Lakin hər nominasiyaya yalnız bir futbolçu layiq görüldüyündən, biz də daha çox üzdə olan çempion komandanın "ən uğursuzunu" seçmək məcburiyyətində qaldıq.
Mövsümün kəşfi – Müşviq Teymurov (Qəbələ). Gənc müdafiəçi "Qəbələ"nin futbol akademiyasının yetirməsidi. O, cari mövsümdə"qırmızı-qaralı" forma ilə meydana çıxdığı oyunlarda böyük gələcək vəd etdi. Müdafiənin sağında çıxış edən Teymurov 35-ci turda əsas komandanın heyətində qol hesabını da açdı. "Bakı" ilə Avroliqaya vəsiqə uğrunda vacib qarşılaşmada baxımlı qola imza atan Müşviq öz üzərində çalışsa, gələcəkdə əsas milli komandanın üzvlərindən birinə çevrilə bilər.
Mövsümün itkisi – Əfran İsmayılov (Bakı). "Qarabağ"dan ayrıldıqdan sonra "Bakı"da əvvəlki oyunundan uzaq düşən Əfran İsmayılov heç də ondan gözlənilən oyunu sərgiləmir. Yarımmüdafiəçi 8 qol vursa da, mövsüm onun üçün bir qədər uğursuz alındı. İsmayılovun tez-tez zədələnməsi və bundan sonra qeyri-sabit oyun sərgiləməsi onun mövsümü uğursuz başa vurmasına səbəb oldu.
EMİN SƏFƏROV