Müsahibə
Yaşar Seyidov: "İlk növbədə "Bakı"nın maraqları təmin olunmalıdı"
"Bakı"nın vitse-prezidenti Yaşar Seyidovun futbolinfo.az …
"Bakı"nın vitse-prezidenti Yaşar Seyidovun futbolinfo.az saytına müsahibəsi
– Futbolçuların maaşının verilməsi məsələsi nə yerdə qaldı?
– Futbolçuların maaşlarının bir hissəsi verilib. Bir hissəsi qalıb, o da yavaş-yavaş ödəniləcək.
– Komandadan kimləri göndərilməsi nəzərdə tutulub?
– Komandamızda müqaviləsi bitən və hələ də davam edən futbolçular var. Bununla bağlı baş məşqçimiz Milinko Pantiçlə klub prezidenti Hafiz Məmmədov görüşməlidi. Ondan sonra kiminlə tamam, kiminlə davam olacağına dair qərar qəbul olunacaq. Ona görə də bu haqda fikir söyləmək hələlik çətindi.
– Bu görüşün gecikməsinə səbəb nədi ki?
– Hafiz müəllim ölkə xaricindədi. Baş məşqçi isə bu gün yola düşüb. Çempionlar Liqasının finalına görə Hafiz müəllimin başı qarışıq oldu. Yaxın günlərdə bütün məsələlərə aydınlıq gələcək.
– Rauf Əliyevin maaş almadığına görə komandadan ayrılması gündəmə gəlib. Bu, nə dərəcədə düzgün xəbərdi?
– Bu, düzün xəbər deyil. Bizim Raufla heç bir problemimiz yoxdu. Onun hələ bizimlə bu ilin dekabr ayının sonuna qədər müqavləsi var.
– "Bakı"dan getməsi müzakirə mövzusu deyil?
– İstənilən klub bir futbolçunun digər komandaya keçməsi üçün problem yaratmır. Ona görə də klubla istənilən futbolçu ortaq məxrəcə gəlib, gedə də, gələ də bilər. O cümlədən də Rauf Əliyev. Biz ortaq məxrəcə gələcəyik, buna görə də heç bir problem olmayacaq.
– Rauf Əliyevə görə sizə hansısa klubdan rəsmi müraciət olunub?
– Xeyr, bizə heç bir klubdan müraciət olunmayıb. Ola bilsin ki, bəzi menecerlər buna münasibət bildirsin. Ancaq bugünə qədər heç bir klub onun transferi üçün bizə müraciət etməyib.
– Bəs Cavid Hüseynovla bağlı?
– Onun da bizimlə hələ müqaviləsi var. Rauf kimi, Cavidə görə də bizə rəsmi müraciət olunmayıb. Yenə də deyirəm, istənilən futbolçu istənilən komandaya gedə bilər. Bu, futbolun qaydasıdı. Ancaq bu, qarşılıqlı razılaşmalar əsasında olmalıdı. Misal üçün Kamran Ağayevin transferi kimi. Futbolçu getmək istəsə, gedəcək, qalmaq istəsə, qalacaq. Buna görə futbolçuya heç bir problem yaradılmayacaq. Onların hər ikisi millimizin üzvüdü. Buna görə də onların hansı kluba keçməsində problem yoxdu. Ancaq ilk növbədə "Bakı"nın maraqları təmin olunmalıdı.
– Maliyyə problemlərinə görə "Bakı" futbol klubun bazasının satışa çıxarılması da iddia olunur…
– Bu cür yanlış xəbərləri mətbuatda yazanlar "Bakı"nı istəməyən adamlardı. Onları məyus etmək istəyirəm ki, "Bakı" klubu var, olub, bundan sonra da daim ölkə çempionatında yüksək yerlər uğurunda mübarizə aparacaq. Onun bazasının qiyməti yoxdu. Satışa çıxarılmır.
EMİN SƏFƏROV