Müsahibə
"Neftçi"nin baş məşqçisi: "Qəbələ" üçün də yarımfinala çıxmaq son həddi"
Qəbələdə təşkil olunan 3-cü "Qəbələ Kuboku"nda…
Qəbələdə təşkil olunan 3-cü "Qəbələ Kuboku"nda iştirak edən "Neftçi" klubunun 15 yaşadək futbolçulardan ibarət komandasının baş məşqçisi Ramin Həbibov Belçika "Anderlext"i ilə oyundan (0:1) sonra jurnalistlərin suallarını cavablandırdı. Futbolinfo.az sizi həmin açıqlamalarla tanış edir.
– Turnir haqqında fikirlərinizi bilmək istərdik…
– Mən özüm də əvvəllər belə turnirlərdə çıxış etmişəm. U-14, U-15, U-16, U-17 yığmamızla bərabər çoxsaylı beynəlxalq turnirlərdə oynamışam. Hətta əsas millidə də iki oyun keçirmişəm. "Qəbələ" rəhbərliyinə təşəkkürümü bildirirəm ki, belə bir turnir təşkil ediblər. Həm şəraitinə, həm səviyyəsinə görə, çox yaxşıdı. Uşaqların bu turnirdə öyrənəcəyi çox şey var. Elə mən özüm də məşqçi kimi bəzi səhvlərimi gördüm, dərslər çıxardım. Məsələn, "Lokomotiv"lə oyunda müdafiəni güclü etmək əvəzinə komandanın hücuma atılmasını istədim. Nəticədə əks-hücumlarda iki qol buraxdıq. Belə turnirlə nə qədər çox təşkil olunsa, bir o qədər yaxşıdı. Məmnuniyyətlə də gəlib iştirak edərik.
– Rəhbərlik etdiyiniz komanda bu turnirdə heç də yaxşı çıxış etmir. Bu, nə ilə əlaqədardı?
– Son oyunda yaxşı çıxış etmədiyimizi etiraf edirəm. "Anderlext" bizdən çox üstün idi. Gördüyümüz çatışmazlıqlar üzərində də çalışacağıq. Amma elə məqamlar var ki, bu, təkcə "Neftçi"nin yox, Azərbaycan futbolunun problemidi. Futbolçularımız çox texnikalıdılar. Bu texnikanın sahibi olan futbolçu gərək topla gözüyümülü davrana, fikirləşməyə, sürətli oyun sərgiləyə. Məsələn, "Anderlext" çox sürətli oyun sərgiləyirdi və bizim onlardan öyrənəcəyimiz məqamlar yetərincədi. Mənə elə gəlir ki, turnirə dəvət olunan komandalar arasında ən güclüsü elə "Anderlext"di.
– Bəs əvvəlki oyunlarda məğlubiyyətə nə səbəb oldu?
– İlk iki oyunda da qol vəziyyətlərindən istifadə edə bilmədik. Hücumçunun olmaması, uşaqların işinə səhlənkar yanaşması və sair amillər sonda məğlubiyyətlə nəticələndi. Bunlar hələ uşaqdılar. Bu komanda ilk dəfədi ki, belə beynəlxalq turnirdə çıxış edir. Düzdü, bəzi xarici komandalara qarşı oyunlarımız olub. Amma turnir baxımından ilk belə sınağımız idi.
– "Qəbələ"dən nə gözləyirsiz?
– Bir Azərbaycan klubu kimi, onların da bu turnirdə ən yaxşılardan olmasını istərdim. Amma yaralı yerlərimizi hamımız bilirik. Bu çatışmazlıqları da aradan qaldırmaq üçün hər birimiz əl-ələ verməliyik. Söhbət sadəcə, sürətli futbol oynaya bilməməkdən getmir. Bütövlükdə, futbolçularımız hər bir göstəricidə super olmalıdılar ki, yaxşı komandalarımız da olsun.
– Deməli, "Qəbələ" üçün də yarımfinala yüksəlməyi son hədd hesab edirsiz?
– Demək olar.
– Dediz ki, "Neftçi" üçün bu turnirdə iştirak böyük təcrübədi. Rəhbərlik qarşısında belə bir məsələ qaldıracaqsız ki, komandanızı xaricə tez-tez yollasın, ya da klub özü belə turnirlər təşkil etsin?
– Əlbəttə. Bildiyiniz kimi, AFFA bu yaxınlarda "Neftçi" klubuna yeni idman direktoru göndərib. Hollandiyalı mütəxəssis bu sahədə 30 illik iş təcrübəsinə malikdi. İnanıram ki, onun klubun uşaq futbolunun inkişafına böyük töhfəsi olacaq. Ondan da nələrsə öyrənməyə çalışırıq. Mənimlə birgə çalışan Həbib Ağayevlə birgə "Ayaks"ın düşərgəsinə təcrübəyə getməyi də planlaşdırmışıq. Məşqçilərimiz savadlı, biz daha çox şey bilsək, Azərbaycan futbolu da bir o qədər tez yüksələr. Yaxşı uşaqlarımız çoxdu. Onları bir araya gətirdikdə isə, yığma komandalarımıza böyük fayda vermiş olacağıq.
PƏRVİZ ELTÜRK, Qəbələ
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq