Müsahibə
"Qəbələ"nin 2-3 üzvünü komandamda görmək istərdim"
Belçikanın "Anderlext" klubunun 15 yaşadək futbol&…
Belçikanın "Anderlext" klubunun 15 yaşadək futbolçulardan ibarət komandasının baş məşqçisi Stefan Stassin "Qəbələ Kuboku"nun final oyunu çərçivəsində Türkiyə "Fənərbağça"sına qarşı keçirilmiş oyundan (3:0) sonra fikirlərini bölüşüb. Futbolinfo.az xəbər verir ki, belçikalı mütəxəssis öncə turniri dəyərləndirib:
– Əvvəllər belə bir turnirin keçirilməsindən xəbərsiz idim. Təxminən üç ay öncə "Qəbələ Kuboku"nda iştirak etmək təklifi aldıq. Bura gələndən sonra isə Qəbələdə hər şeyin çox yüksək səviyyədə olduğunu gördüm. İnfrastruktur, stadionlar, turnirin təşkilatçılığı, bir sözlə, hər şey çox yüksək səviyyədəydi. Çox şadıq ki, belə bir turnirin iştirakçısı olduq. Bu turnirin qalibi olmağımız isə ikiqat sevinc bəxş edir.
– Belə bir nəticə qazanacağınızı gözləyirdinizmi?
– Mən komandama güvənirdim. Çünki yaxşı futbol sərgiləməyi bacaran komandamız var. Amma öncədən çempion olacağımızı gözləmirdik. Ən azından ona görə ki, digər iştirakçılar da güclü komandalar idi və onların da qələbə qazanması istisna deyildi. Elə finaldakı rəqibimiz "Fənərbağça" da güclü komandaydı. Türkiyə təmsilçisi xüsusilə fiziki hazırlığına görə çox seçilirdi. Amma buna baxmayaraq, bizim uşaqlar bu gün daha yaxşı futbol sərgiləməyi və çempion olmağı bacardılar.
– "Qəbələ"nin çıxışını necə qiymətləndirə bilərsiz?
– "Qəbələ" də yaxşı komandadı. Biz onlara da qarşı oynadıq. Həmin qarşılaşmadan öncə yetirmələrimə tapşırmışdım ki, "Qəbələ"nin oyununu izləsinlər. Hamımız bu komandanın oyununa baxmışdıq. Bizə qarşı ilk hissəni çox yaxşı səviyyədə keçirdilər. Yaxşı oyunçulardan ibarət komandadı. Sadəcə, ikinci yarıda bir qədər zəif çıxış etdilər və 5-6 dəqiqə ərzində iki qol vuraraq, qalib gəldik.
– "Anderlext" il ərzində neçə belə turnirdə iştirak edir?
– Səhv etmirəmsə, bu il artıq üçüncü beynəlxalq turnirdə iştirak edirdik. Əvvəlki iki turnirdə üçüncü olmuşduq. Bu dəfə isə finala vəsiqə qazandıq, həlledici oyunda qalib gəldik. Komandamın oyununa bələd olduğum üçün yaxşı nəticəyə ümidliydim. Şadam ki, buna nail olduq.
– Akademiyanız bir ildə əsas komandaya neçə futbolçu verə bilir?
– "Anderlext"in futbol akademiyası Avropada ən yaxşılardan sayılır. Ötən mövsüm 3-4 oyunçumuz əsas komandada çıxış etmək şansı qazandı. Bu il də dörd futbolçumuz birinci komandaya dəvət olunacaq. Çünki akademiya çoxlu futbolçular yetişdirir.
– "Qəbələ"də elə bir futbolçu diqqətinizi çəkdi ki, onu komandanızda görmək istəyəsiz?
– "Qəbələ"nin futbol akademiyası yeni yaradılıb. Amma burada necə yaxşı işlərin görüldüyü dərhal sezilir. U-15 komandasının heyətində 2-3 yaxşı futbolçu gördüm. Təbii ki, onların komandamıza gəlməsinə icazə versələr, məmnuniyyətlə sıralarımızda görmək istərdik. Məncə, 3-4 il sonra "Qəbələ"nin futbol akademiyasında daha güclü futbolçular görə biləcəksiz.
PƏRVİZ ELTÜRK, Qəbələ