Premyer-liqa
"Bakı" siyasətini dəyişir: Bahalı transfer olmayacaq!
"Bakı"nın heç bir klubda olmayan futbol akademiyas?…
"Bakı"nın heç bir klubda olmayan futbol akademiyası var. Elə çempionatın gedişində, son 1 ayda Milinko Pantiç 1995-96-cı il təvəllüdlü 15 yetirməmizi meydana buraxaraq burada yetişən gənclərə güvəndiyini göstərdi. İndi də əsas heyətdə oynaması üçün onları təlim-məşq toplanışına aparmağı planlaşdırır" – bu sözləri Futbolinfo.az saytına açıqlamasında "Bakı"nın icraçı direktoru Yaşar Seyidov deyib.
Seyidov paytaxt klubunun transfer bazarında susqun olmasına bu cür aydınlıq gətirib: "Çox transferə ehtiyacımız olmayacaq. Çünki bu cür akademiyamız və yetişdirdiyimiz futbolçular var. Digər komandalar ona görə transfer edir ki, onların ehtiyacı var. Lakin "Bakı"nın buna ehtiyacı yoxdu, bizim öz yetirməmiz çoxdu. Bu gün akademiyamızdakı uşaqlara digər klublardan təkliflər gəlir, lakin vermirik. Hazırda bizim əsas heyətimizdə oynaya biləcək 10-15 nəfər layiqli yetirməmiz var. Baş məşqçi hazırda İspaniyadadı. Mən isə onun tapşırıqları əsasında əsas heyətdə oynayacaq futbolçuların işi ilə məşğulam. Hətta ad da çəkə bilərəm. Elxan Əhmədov, Vadim Abdullayev, Şəhriyar Əliyev, Namiq Ələsgərov, Vüqar Mustafayev, Rüstəm Rüstəmli, Aydın Mustafazadə, Sənan Bayramzadə, Təyyar Məmmədov, Mətin Əlisoy, Ülvi Süleymanov, Elşən Rzazadə, Tural Qürbətov və bir neçə gənc futbolçu bizim əsas heyətə oynamalı futbolçularımızdı. Pantiç gənclərə daha çox üstünlük verir. Bu səbəbdən "Bakı" klubunun tutduğu yol düzgün yoldu. Bahalı transfer gətirməkdənsə, öz akademiyamızın yetirmələrinə şans verir. Futbol adamı kimi inanıram ki, Azərbaycan milli komandasının uğuru buradan keçir".
Bundan başqa klub rəsmisi "Bakı"nın maliyyə problemləri səbəbindən transfer etməməsi ilə bağlı yayılan xəbərlərə də münasibət bildirib: "Bu maliyyə problemi ilə əlaqədar deyil. Mən rəhbərliyə dəfələrlə müraciət etmişəm ki, akademiyanın uşaqları oynamalıdı. Yəni, "Bakı" öz siyasətini dəyişməlidi. Əsas heyətdə legionerlərə deyil, yerli futbolçulara, gənclərə daha çox şans verilməlidi. Biz bu gün o fikirdəyik ki, yetişdirdiyimiz futbolçular əsas heyətə cəlb olunmalı və öz sözlərini deməlidi. Ümumiyyətlə, bahalı transferlərdən qaçmalıyıq. "Bakı"nın bugünkü siyasəti Azərbaycan futbolunun gələcəyi üçün düşünülmüş bir işdi. Klub prezidenti Hafiz Məmmədovun "Atletiko" ilə apardığı uğurlu anlaşmanın nəticəsidi ki, kubok Bakıya gəlmişdi. "Atletiko" Bakıya gələndə Hafiz müəllim yox idi, ancaq onun idarəçiliyində çalışanlar həmin tədbirdə idi. Ona görə də Hafiz müəllimin tədbirdə olmama səbəbini maliyyə ilə bağlamaq düzgün deyil".
Klubda maliyyə böhranının olmadığını deyən, gənc yerli futbolçulara şans verilməyin vacibliyindən danışan icraçı direktor jurnalistlərdən də dəstək gözlədiklərini bildirdi: "Jurnalistlər də "Bakı" klubuna dəstək verməlidi. Çox vaxt jurnalistləri başa düşə bilmirəm. Əgər bu gün biz öz gənclərimizə, akademiyamızın yetişdirdiyi futbolçulara önəm veririksə, futbolu az-çox bilən insanlar, idman jurnalistləri bizə dəstək verməlidi. Deməlidilər ki, "Bakı" bunu elədi, digər klublar da eləsin. Kubokun finalında "Neftçi"nin gənc futbolçusu Samir Məsimov qol vurdu. Bunun nəyi pisdi ki? Onlar milli komandanı gücləndirəcək. Hər şeyi maliyyə ilə bağlamaq olmaz".
Sonda isə Seyidov intizamsızlığa görə "Bakı"dan "Simurq"a göndərilən, indi isə icarə müddəti bitdiyi üçün geri dönən Mindauqas Kalonasın gələcək taleyindən danışıb: "Komanda toplaşanda Kalonas haqda da bir qərar veriləcək. Mən indi bununla bağlı heç nə deyə bilmərəm. Bunun üçün Pantiçin komanda ilə bir araya gəlməsi lazımdı. Bundan sonra klub prezidenti Hafiz Məmmədovla Pantiç arasında görüş olacaq və son qərar veriləcək".
RÖVŞƏN ƏHLİMANOĞLU