Müsahibə
Kamran Quliyev: "9-cu yer bizim üçün uğur sayılmayacaq"
"Sumqayıt"ın prezidenti Kamran Quliyevin futbolinfo.az say…
"Sumqayıt"ın prezidenti Kamran Quliyevin futbolinfo.az saytına müsahibəsi
– Mövsüm bitib, amma "Sumqayıt" hələ də transfer etməyə tələsmir…
– Biz futbolçularla danışıqlar aparırıq. Digər klublar da eyni zamanda həmin futbolçularla danışıqlar aparır. Söhbət reallaşsın, "tutdu qatıq, tutmadı ayran" söhbəti olmasın. Biz gözləyirik ki, hər hansı bir rəsmi razılaşma olsun, ondan sonra bəyan edək. Müxtəlif mövqelər üzrə axtarışımızı davam etdiririk. Təxminən 10-a yaxın futbolçuyla danışıqlar aparırıq.
– Danışıq apardıqlarınız 1-ci divizionda çıxış edənlərdi, yoxsa elitada mübarizə aparan futbolçulardı?
– Təbii ki, Premyer Liqada oynayan futbolçulardı.
– Məlum məsələdi ki, "Sumqayıt" digər klublarla müqayisədə futbolçuya istənilən məbləği təklif etməkdə çətinlik çəkir. Bu, hər hansı futbolçunun keçidində çətinlik yaradır?
– Bilirəm. Buna baxmayaraq biz elitadan futbolçu götürmək niyyətindəyik. Əsas futbolçunun göstərdiyi oyuna baxırıq. Elə ola bilər ki, 1-ci diviziondan da transferlər edək. Bildiyiniz kimi qış transfer dönəmində icarə əsasənda "Bakı"dan, "Qəbələ"dən də futbolçu gətirmişdik. Onlar da öz klublarında daha çox maaş alırdı. Amma biz futbolçulara şərait yaradırıq ki, oyunlarını sərgiləsinlər. Aparıcı klubların oyunçuları ilə danışıqlar aparırıq. Futbolçular aşağı qiymətə çəkinmədən "Sumqayıt"da çıxış edə bilir.
– Bəs icarədə olan futbolçuların taleyi necə olacaq?
– Danışıqlar gedir. Tərzin Cahangirov və Rəhman Hacıyevlə yola davam etmək niyyətindəyik.
– Aqil Məmmədovla müqavilə müddətini artırmısız. İnanırsız ki, Aqil müəllim növbəti mövsüm klubu daha yuxarı pillələrə daşıyacaq?
– Bəli, davam edəcəyik. Bizim transfer siyasətimizə müəyyən məhdudiyyətlər qoyulub, legioner futbolçu ala bilmirik. Aqil Məmmədovun Premyer Liqada təcrübəsi olmasa belə, biz yenə də əsas liqada qala bildik.
– Deməli Aqil Məmmədovun rolu böyükdü…
– Bəli, Bəli. Aqil müəllim Premyer Liqada çıxış edəndən sonra az müddətdə baş məşqçi postuna gəldi. Onun təcrübəsinin azlığı zaman-zaman özünü gostərirdi. Amma qarşısına zamanla daha çox hədəflər qoyulacaq. Siz baxın, biz 2010/11 mövsümünü 12-ci pillədə başa vurmuşduq. Sonra 2011/12 mövsümünü 10-cu pillədə tamamladıq. Sonra da gördüyünüz kimi son mövsümü 9-cu pillədə bitirdik. Amma artıq 9-cu pillə bizim üçün uğur sayıla bilməz.
– Samir Abasov artıq karyerasını başa vurub. O, bildirmişdi ki, razılıq əldə olunsa, "Sumqayıt"da məşqçi kimi fəaliyyət göstərə bilər. Sizin fikriniz necədi?
– Abasov hələ bizim kapitanımızdı. Zədə almışdı. Buna görə karyerasını bitirəcək. Ondan sonra AFFA tərəfindən məşqçi kursları keçirələcək və o, bu kurslara qatılacaq. Bu, onun özündən də aslıdı. Biz Samirin həmin kursları uğurla başa vurmasını gözləyirik. Daha sonra bizim klubda öz işini davam etdirəcək.
– Yay təlim-məşq toplanışını Türkiyədə keçirəcəksiz. Bildiyimizə görə, Aqil Məmmədov minimum 3 yoldaşlıq görüşü keçirmək istəyir…
– Siz o məlumatı hardan götürmüsüzsə, dəqiq deyil. Biz ya şərqi avropada, ya da Türkiyədə hazırlıq keçəcəyik. O işlər məni maraqlandırmır. Mənə maraqlı olan baş məşqçimizə işləmək üçün istədiyi şəraiti yaratmaqdı. Daha bilmirəm 4 klubla, ya 5 klubla yoldaşlıq oyunu keçirəcək. Siz klub saytında sonuncu xəbəri gördünüz?
– Bəli, elə bu haqda da fikirləriniz öyrənmək istərdim. Ceyhun Sultanov sizin keçmiş futbolçunuz olub…
– Bəli, Ceyhun bizim keçmiş futbolçumuz olub, eyni zamanda o Premyer Liqada böyük klubların əksəriyyətində oynayıb. Hazırda klubda yeni vəzifə açılıb, o da həmin vəzifəyə gəlib. İnanıram ki, Ceyhun kluba fayda verəcək, daha uğurlu olacaq. Artıq bununla bağlı sualları onun özündən soruşsanız, daha yaxşı olar. Təbii ki, mən də ünsiyyətdə olacam. Onun gəlişi ilə mətbuata heç bir məhdudiyyət qoymuram. Amma yenə də deyirəm, bununla bağlı digər sualları onun özündən soruşsaz, daha yaxşı olar.
– Ümumiyyətlə Ceyhunun işinin öhdəsindən layiqincə gələcəyinə inanırsız?
– Təbii ki, Ceyhun layiqincə öz işini görəcək.
RÖVŞƏN ƏHLİMANOĞLU