Müsahibə
Danilo Dias: "Prezident məni buraxmaq istəmirdi"
“Qarabağ”ın yeni transferi Danilo Diasın futbolinfo.az …
“Qarabağ”ın yeni transferi Danilo Diasın futbolinfo.az saytına müsahibəsi
– Öncə Azərbaycana gəlişiniz və ölkəmiz haqqında təəssüratlarınızı bilmək istərdik…
– Bakıya mayın 28-də gəlmişəm. Əslində bu səfər çox ani alındı. “Qarabağ”la danışıqlar aparırdıq. Əsas məqsədim bu klub haqqında daha dərin məlumat öyrənmək idi. Gəldim, hər şeyi öz gözlərimlə gördüm. Xoşuma gəldi. Ona görə də müqavilə bağladım. Azərbaycana gələrkən buradakı insanlar tərəfindən çox xoş qarşılandım. Bakı şəhəri çox xoşuma gəldi. Sadəcə, bir az mətbəxlə bağlı problem oldu. Fərqli yeməklər var idi.
– “Qarabağ” qış “transfer pəncərəsi” zamanı da sizi heyətinə qatmaq istəyirdi. O zaman keçidiniz niyə alınmadı?
– Əslində o zaman da bura gələ bilərdim. Amma həmin vaxtı hər şey məndən asılı deyildi. Çünki “Maritimo” ilə 6 aylıq müqaviləm qalırdı. Prezident də məni buraxmaq istəmirdi. Nəhayət, hər şey geridə qaldı. Sevinirəm ki, bu transfer baş tutdu.
– Azərbaycan və “Qarabağ” haqqında bura gəlməzdən öncə nəsə bilirdiz?
– Əlbəttə, məlumatım var idi. İnternetdə ölkəniz haqqında məlumatlar oxumuşam. “Qarabağ” klubunun da sizin üçün əziz olan bir adı daşıdığını bilirəm. Ermənilər Azərbaycanın Qarabağ bölgəsini işğal ediblər. İnsanları şəhid ediblər. Bunları bilirəm. Komanda haqqında da bilirəm ki, 1987-ci ildən bəri iki dəfə çempion olub. Son çempionluğu da məhz bu mövsümün sonunda qazanıblar.
– “Qarabağ”da 3 braziliyalı futbolçu var. Onları tanıyırdız?
– Bəli. Riçard Almeydanı yaxşı tanıyırdım. Onunla Portuqaliyada üz-üzə gəlmişdik. “Qarabağ”dan təklif gələn kimi, onunla əlaqə saxladım. Bütün məlumatları mənə dedi. Ancaq xoş sözlər danışdı.
– Azərbaycanda braziliyalı futbolçu çoxdu. Onlardan kimlərlə münasibətiniz var? Başqa hansı klublarımızı tanıyırsız?
– “Neftçi” və “Qəbələ” haqqında məlumatım var. Onların ikisini də tanıyıram. Orada oynayan bir-iki futbolçu var ki, onlar haqqında məlumatım var.
– Sizin mövqeyinizlə bağlı bəzi mübahisələr var. Bəzi yerlərdə hücumçu, bəzi yerlərdə yarımmüdafiəçi kimi göstərilirsiz…
– Yarımmüdafiənin hər tərəfində oynamağı bacarıram. Amma ən çox xoşuma gələn ikinci hücumçu kimi çıxış etməkdi. Hücumda oynamağı da bacarıram.
– Avrokuboklar təcrübənizdən istifadə edib ÇL-də “Qarabağ”a xeyir verə biləcəksiz?
– Komandaya kömək etmək üçün gəlmişəm. İndi elə bir komandadayam ki, biz ÇL-in təsnifat mərhələsində oynayacağıq. Qrupda oynamaq üçün hər şey etməliyik. Allah bizə kömək olacaq.
– Müqavilə imzalayarkən ən diqqət çəkən məqamlardan biri müsəlmanlar kimi dua etməyiniz idi…
– Müsəlman deyiləm. Amma bu dinə heyranam. Mən Allaha hər zaman şükür edirəm.
– Belə bir məlumat var ki, “Maritimo”nun prezidenti Karlos Pereyra sizi klubda saxlamaq istəyib və buna görə də transfer vərəqənizi verməyib. Deyib ki, müqavilənin başa çatdığı son gün gəlib ala bilərsiz…
– Düzdü, transfer vərəqəm hələ də gəlməyib. Çünki mənim iyunun 30-na qədər “Maritimo” ilə müqaviləm var. Onlarla müqaviləmi yeniləmədoyim üçün vaxtın bitməsini gözləməliyəm. Ondan sonra sərbəst futbolçu sayıla bilərəm. Karlos Pereyra “Qarabağ”a “Maritimo” ilə mənim aramda hər şeyin bitdiyinə aid sənəd təqdim edəcək.
EMİN SƏFƏROV