Ölkə futbolu
Baş məşqçilərin final şərhi
IV Caspian Cup beynəlxalq turnirinin İran və Türkiyə yığmal…
IV Caspian Cup beynəlxalq turnirinin İran və Türkiyə yığmaları arasında keçirilmiş final oyunundan sonra hər iki komandanın baş məşqçisi fikirlərini açıqlayıb. Futbolinfo.az sizi həmin açıqlamalarla tanış edir.
Mehmet Hacıoğlu (Türkiyə yığmasının baş məşqçisi): “Belə turnirlərdə iştirak futbolçuların təcrübə toplaması baxımından çox əhəmiyyətlidi. Əlbəttə, mübarizə aparan tərəflərdən biri olaraq biz də birinci yeri tutmaq istərdik, amma komandanın təcrübə əldə etməsi daha önəmlidi. Bir neçə ay sonra Avropa çempionatının seçmə mərhələsində çıxış edəcəyik. Düşünürəm ki, buradakı oyunlar futbolçularımız üçün faydalı oldu. Turnirin təşkilatçılığı barədə yalnız xoş sözlər deyə bilərəm. İştirakçılara gəlincə, bir neçə daha iddialı komandanın burada çıxış etməsi turnirə əlavə rəng qatardı”.
Mustafa Qənbərpur (İran yığmasının baş məşqçisi): “Bir müddət sonra Asiya Futbol Konfederasiyasının təşkilatçılığı ilə keçiriləcək rəsmi turnirdə çıxış edəcəyik. Bu baxımdan, "Caspian Cup"da iştirakımız bizim üçün müsbət haldı. Əlbəttə, yarışın qalibi olduğumuz üçün sevinirik. Turnir yüksək səviyyədə təşkil olunmuşdu. Dəvətə və qonaqpərvərliyə görə minnətdarlığımı bildirirəm. Növbəti illərdə turnirin oyunlarının 80 dəqiqə deyil, 90 dəqiqə olmasını, yaxud əvəzetmələrin sayının azaldılmasını təklif edərdim. Belə olarsa, oyunlarda əlavə vaxt itkisinin qarşısı alınar”. (AFFA)