Premyer-liqa
Oğuz Çətinə inam yoxdu
10 illiyində əlləri havada qalan "Xəzər Lənkəran" art…
10 illiyində əlləri havada qalan "Xəzər Lənkəran" artıq yeni baş məşqçisinə qovuşdu. Klub tərəfindən namizədlər siyahısında Mirça Rednikin də adının olması bildirilsə də, baş məşqçi kimi yeni, ancaq məşqçi kimi lənkəranlılara tanış olan Oğuz Çətin komandanın “sükanı arxasına” keçdi. Mustafa Dənizli ilə əl-ələ versə də, uğur qazana bilməyən Çətin indi Dənizlisiz çalışacaq. Hər kəs tanınmış və uğurları olan bir mütəxəssisin baş məşqçi postuna gətiriləcəyini düşünərkən məhz Çətinin bu vəzifəyə təyin olması maraq doğurur. Bəs qələm əhli necə düşünür, Oğuz Çətin doğru seçimdimi?
Mahir Rüstəmli (Futbol+): "Mənim üçün qiymətləndirmək çətindi. Düzgün olub-olmamağını deyə bilmərəm. Amma əgər Oğuz Çətini seçəcəkdilərsə, bunu əvvəlcədən demək lazım idi. Bir aydı söz-söhbət gəzir ki, kim gələcək. Sonra deyirlər ki, Çətin qalacaq. Məncə, klub öz azarkeşlərinə və futbol ictimaiyyətinə münasibətdə qeyri-səmimi addım atdı. Bunu əvvəlcədən bəyan etmək olardı. Tam inanmıram ki, "Xəzər Lənkəran" Çətinlə əsas hədəfinə çatsın".
Rəşad Ergün (Komanda): "Mövsümün sonundakı oyunlarda "Xəzər Lənkəran"la qazandığı nəticələri nəzərə alsaq, normal seçim olduğunu demək olar. Hər halda, komandanı tanıyır, rəhbərliklə, azarkeşlərlə necə dil tapmalı olduğunu bilir. Məncə, bundan sonrası üçün "Xəzər Lənkəran" ya yerli məşqçiylə işləməli idi, ya da elə Oğuz Çətin səviyyəsində olan əcnəbi mütəxəssislə. Zaman göstərdi ki, Toşak, Dənizli səviyyəsində olan məşhurlar bizim ölkədə baş çıxara bilmir. İndi bundan sonra ona ümid etmək olar ki, Çətin lənkəranlılar üçün "İnter"in Kaxaber Tsxadadzesi olacaq".
Əli Sahib (Fanat.az): "Düzgün seçim olub-olmamağını yeni mövsümün ortalarında və ya sonunda görəcəyik. Ancaq Çətin "Xəzər Lənkəran"da köməkçi məşqçi idi. Yəni iki məşqçi tandemi xeyir verə bilmədisə, Oğuz çətin ki, bunu tək bacara bilər. Uğur qazanacağına inanmıram, amma uğur arzu edirəm. Dənizlinin bacarmadığını Oğuz necə bacaracaq – bax, bu, maraqlıdı. Hər halda bütün müəllimlərin tələbələrindən gizlətdikləri var. İnanmağım gəlmir ki, müəllimin bacarmadığını tələbə etsin. Mənə elə gəlir ki, pis olacaq, yaxşı olmayacaq. Düzdü, Çətin Dənizlinin yoxluğunda qələbə qazanmışdı. Amma Azərbaycanda şahidi olmuşuq ki, baş məşqçi gedir və köməkçisi uğur qazanır. Hər kəsdən qabaq klubdakı ab-havanı futbolçular yaxşı bilir. Bu səbəbdən futbolçular da baş məşqçinin gedişinə "kömək" olur və köməkçinin gözündə qalxmaq üçün şans axtarırlar. Belə demək mümkündüsə, meydana çıxıb otu yeyirlər. Həmin futbolçular Çətinlə qələbə qazanmışdı, amma Dənizli ilə bu, alınmadı. Con Toşakın, Dənizlinin Azərbaycanda nəticə verə bilməməsi absurddu və buna tutarlı arqument gətirmək olmur. Azərbaycanda məşqçi işləmək üçün hər tərəfdə gözün olmalıdı ki, irəlini də görəsən, torba tikəni də. Ancaq Toşak və Dənizli kimi məşqçilər yalnız irəli baxır. "Xəzər Lənkəran" və "Bakı" kimi komandalar uğur qazanmaq üçün komandanı dağıtmalıdı. Onlar aşağı dəstəyə düşüb, yenidən komanda yaratmalıdılar".
Saleh Arslan (Korner.az): "Oğuz Çətin indiki vəziyyət üçün bəlkə də ideal variant kimi görünə bilər. Amma mənə görə Çətin "Xəzər Lənkəran"a yaraşmayan baş məşqçidi. "Xəzər Lənkəran" bu qədər iddianın, gözləntinin içindədi və yeni baş məşqçi bunlara cavab verə bilməyəcək. Məncə, fikrimdə yanılmayacam. Mustafa Dənizlidən sonra "Xəzər Lənkəran" rəhbərliyinin daha səviyyəli, daha peşəkar bir baş məşqçi ilə anlşacağını gözləyirdim. Komandanı tanımasına görə ola bilər, amma azarkeşin və ictimaiyyətin gözlədiyi imicə cavab verən biri deyil".
Elsevər Məmmədov (Apasport.az): "Oğuz Çətin indiki halda məncə, düzgün seçimdi. Çünki ən azından son mövsümün ikinci yarısını Mustafa Dənizli ilə birlikdə "Xəzər Lənkəran"da keçirib. Komandanı yaxşı tanıyır. Həmçinin Oğuz Çətinin statistikası yaxşıdı. Komandanı meydana çıxardığı 4 oyunun 3-də qalib gəlib, birində heç-heç edib, məğlubiyyəti yoxdu. Düşünürəm ki, doğru seçimdi. Amma çempionata ən azı 3 oyun yaxşı statistika ilə başlasa, uğur qazanacaq. Əks halda o da postunda çox qalmayacaq".
Həmkarlarımızın fikirləri demək olar ki, üst-üstə düşür. Ümumi nəticəyə gəldikdə, heç kim Çətinin uğur qazanacağına inanmır. Bizə isə yalnız uğur arzulamaq qalır.
RÖVŞƏN ƏHLİMANOĞLU
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı
- Premyer-liqa2024-04-12 20:56
“Sumqayıt”la “Zirə”dən heç-heçə