“Qəbələ”nin məşqçisindən Xocalı faciəsinə hörmətsizlik

“Qəbələ” uşaq futbol akademiyasıyla bağlı bir neçə dəfə xoş olmayan xəbərlər almışıq. Futbolçulara nəzarətdəki qüsurlar, onların bəzilərinin siqaret aludəçiliyi, qumar oyunlarına meylliliyi və s. haqda bir sıra informasiyalar redaksiyamıza daxil olub. Onların əksəriyyətini isə əldə sübut olmadığı üçün işıqlandıra bilməmişik.

Əslində, indi də nəyisə sübut etmək üçün əldə tutarlı fakt yoxdu. Sadəcə, müəyyən söz-söhbətlər var və onları da hər dəfə klub rəsmiləri təkzib edir. Ancaq bu akademiyada elə adamlar işləyir ki, gəzən şayiələrin həqiqət olduğuna inanmaq istəyirsən. Çünki klubun müəllimləri bu səviyyəli adamlardısa, deməli, uşaqların təlim-tərbiyəsindəki qüsurlar da qaçılmazdı.

“Qəbələ”nin U-16 komandasının məşqçisi Zaur Hacıyevin sosial şəbəkədə paylaşdığı bir şəkil həm də onun işinin necə “peşəkar”ı olduğunun, uşaqlara nəyi öyrətdiyinin güzgüsüdü. Hacıyev avtobusla növbəti oyuna və ya məşqə gedən yatmış futbolçuların fotosunu paylaşıb. Bu fotoda problem ondadı ki, müəllimin yanında bu qədər hörmətsizcəsinə pozlar vermək elə onları tərbiyələndirənin qüsurudu. Zaur bəysə ayıbına kor olmaqdansa, hələ bu fotonu çəkib paylaşıb da.

Əsl faciə isə onun yazdıqlarıdı. Hacıyev bunu xalqımızın ən kədərli günlərindən biri olan Xocalı soyqırımı ilə eyniləşdirib və utanmaz-utanmaz statusunun qarşısında gülüş işarəsi də qoyub. Zaur bəy faciəni bu qədər asanlıqla ucuzlaşdırıb hansısa zarafat mövzusu edirsə, əhsən ona da, ona bu işi tapşıranlara da. Yəqin ki, belə məşqçinin tərbiyə verdiyi uşaqlar sabah ondan da yaxşı “vətənpərvərlər” olacaq.