Ölkə futbolu
"Həmişəcavan" "Sumqayıt"
Son mövsümdə birtəhər Premyer Liqada qalmağı bacaran &q…
Son mövsümdə birtəhər Premyer Liqada qalmağı bacaran "Sumqayıt" artıq növbəti çempionat haqda fikiləşir. Klub prezidenti Kamran Quliyev növbəti mövsümdə "Sumqayıt"ın 9-cu yeri tutmasının uğur sayılmayacağını desə də, adamın heç də rəhbər şəxsə inanmağı gəlmir. Yəqin klubun qarşısına bu dəfə 8-ci pillə uğurunda mübarizə aparmaq vəzifəsi qoyulub.
Amma bu vəzifə də sual altındadı. Çünki indidən növbəti mövsümdə hansı klubun kuboka görə, digər bir komandanın isə çempionluğu təmin etdiyinə üçün Premyer Liqa matçını "Sumqayıt"a qurban verəcəyinə zəmanət vermək olmaz.
Klub prezidentinin qeyri-səmimiliyinin daha bir sübutu var. Kamran bəy daha öncə açıqlamalarında "biz milliyə gənc futbolçular yetişdiririk" desə də, indi vəziyyət tamam fərqlidi. Görəsən, Quliyev yay "transfer pəncərəsi" zamanı komandaya cəlb etdiyi futbolçuların şəxsiyyət vəsiqələrindəki doğum tarixlərinə baxıb? Yoxsa, bundan sonra uzun müddətdi oyun praktikasından əziyyət çəkən Aqil Nəbiyev, yaşı 35-i haqlamış Ruslan Poladov, "Rəvan"ın ı diviziona düşməsindən sonra çarəsiz qalan 31 yaşlı Ramazan Abbasov və karyerasında yalnız bircə də iddialı komandada – "Qarabağ"da oynamağa imkan tapan Tagim Novruzov milli üçün hazıranacaq?
İndi "Sumqayıt" kimsəsiz uşaqlara qucaq açan internat evlərini xatırladır. Karyerasını başa vurmaq üzrə olanlar, əvvəlki komandalarının heyətlərdən ələnərək klubsuz qalanlar "kimyaçılar"a üz tutur. Düzdü, futbolçunun qısa sürən, ağır futbolçu karyerasından sonra istirahətə ehtiyacı var. Ancaq sənayə şəhəri istirahət üçün seçilən düzgün məkan deyil axı.
"Sumqayıt" yəqin ki, yeni mövsümün startına kimi bir neçə transfer də edər. Klub rəhbərliyi komandanı "həmişəcavan" saxlamaq istəyirsə, onların komandaya cəlb edə biləcəyi daha bir neçə futbolçu var. "Rəvan"ın müdafiəçisi Cəmşid Məhərrəmov, AZAL-ın qapıçı Cahangir Həsənzadə, Türkiyə klublarında lazımsız sayılan veteranlar da "Sumqayıt"ın formasını geyinsə, pis olmaz. Klub prezidentinin şəxsi hörmətini nəzərə alsaq, futbolçu karyerasını başa vuran Elmar Baxşıyev də onun xahişi ilə “gənclər şəhəri”nin komandasında 1-2 mövsüm oynaya bilər.
Ötən mövsüm "Sumqayıt"ın gəncləri özlərini sübut etmək, yaxşı tərəfdən göstərmək üçün meydanda canla-başla çıxış edirdilər. Ağsaqqalları Samir Abbasov da onlara meydandan dəstək verirdi. İndi Samirin yoxluğunda klub prezidenti çətin seçim qarşısında qalacaq. Bəs görəsən, Kamran Quliyev "Sumqayıt"ın “Ağsaqqallar şurası”na yeni gələn qocalardan kimi təyin edəcək?
EMİN SƏFƏROV