Ölkə futbolu
Nişimura kimi Yusifov
Allah üzümüzə baxıb. Azərbaycan Premyer Liqasının …
Allah üzümüzə baxıb. Azərbaycan Premyer Liqasının oyunlarını Yuiti Nişimura idarə etsəydi, əlimiz üzümüzdə qalardı. Yaponiyalı hakim o qədər sözəbaxandı ki, meydan sahibinin, ümumiyyətlə, böyüklərin istəyinə qarşı getmir. Ona görə də inanın, asiyalı referi ölkəmizdə peyda olub, vacib oyunlarda fit çalsaydı, “Neftçi” hər il çempion olardı.
Avropa öz yerində, Asiya və Afrikadakı mundiallardan sonra Braziliyada təşkil olunan dünya çempionatı özəldi. Cənubi Amerika futbolla nəfəs alır və mundialın Çempionlar Liqasının kölgəsində qalmadığına məhz bu qitədə baş tutan oyunları izləyərkən ümid edirsən. Bu yazını qələmə alarkən hələ bircə matç izləmişdim. Ancaq meydan sahiblərinin Xorvatiya ilə oyunu da belə qənaətə gəlmək üçün kifayətdi.
Açılış oyununda hər şey var idi: dinamika, sürət, ustalıq, taktiki gedişlər, əsl azarkeş dəstəyi (heyətə salınmadığı üçün inciməyən Kaka da özünü əsl azarkeş kimi aparırdı), avtoqol, kobudluq, etiraz, emosiya, hakim səhvləri. Bütün bunları daha möhtəşəm edənsə şübhəli penaltiyə rəğmən, güclünün qalib gəlməsi idi.
Son vaxtlar hansı oyundan bu qədər zövq aldığımı xatırlamıram. Favoritin qarşısında ayaq üstə durmağı bacaran, amerikalılara avropalı əzəməti göstərən xorvatlar yalnız Oskarla bacara bilmədi. Rəqibin orta sahədəki səhvlərindən məharətlə yararlanan bu oyunçunun niyə “Çelsi”də Joze Mourinyonun sevimlisi olduğunu da bu oyunun gedişində anladım. Neymar hər nə qədər ulduz olsa da, ilk matçın qəhrəmanı Oskar idi və sonuncu qoldakı mükəmməl zərbəsi də özünə verdiyi mükafat oldu.
Braziliya hamıdan bir baş üstündümü? Qətiyyən! Sadəcə, Niko Kovaçın təcrübəsizliyi və bəlkə də əlinin altındakı oyunçuların potensialı meydan sahiblərinin müdafiəsindəki səhvlərdən yararlanmağa imkan vermədi. Tülküdən ayıq olan Del Boske, Van Qal, Prandelli, Löv və başqalarının eyni rəhmdillik göstərəcəyinə inanmıram. Ona görə də favoritləri dəqiqləşdirmək üçün ən azı ilk turun bitməsini gözləməliyik.
Millimizin baş məşqçisi Berti Foqts da oyunu izləyənlər arasında idi. Onun gələcək rəqibimiz olan xorvatlara hansı qiymət verdiyini bilmirəm. Ancaq hətta Braziliyaya qarşı oyun göstərdi ki, milləti “qrup üçüncülüyü üçün oynayacağıq” deyərək aldatmağa dəyməz. Biz hara, onlar hara… Hələ unutmayaq ki, Nişimuranın sərt və səhv qərarı olmasaydı, bəlkə də ilk sensasiyaya elə startda şahid olacaqdıq.
Yeri gəlmişkən, yapon hakimin qərarını bizimkilər də şərh edib. Ən təcrübəli hakimlərimizdən olan Fariz Yusifov videotəkrara dəfələrlə baxsa da, penaltinin düzgün təyin edilib-edilmədiyini müəyyənləşdirməyib. Meydanda ani qərar verməli oln FİFA referisi epizodu ilk dəfə görərkən Nişimura kimi penalti olduğunu düşünüb, təkrara baxdıqdan sonra isə tərəddüd edib. Onun FİFA hakimi olduğu vaxtlar “Neftçi”nin ardıcıl 3 dəfə çempion olmasının da deyəsən, səbəbi budur axı. Bizim Nişimura adi hakimə çevrilən kimi zivəni “Qarabağ” ələ keçirdi.
CAVAD
P.S.: İlahi, görəsən, Nişimura eyni vəziyyətə görə “Neftçi”nin qapısına penalti təyin etsəydi, Böyükağa Hacıyev neçə il danışardı?