Ölkə futbolu
Hamı faciədən danışır
Dünən DÇ-2014-də baş tutan Braziliya – Almaniya y…
Dünən DÇ-2014-də baş tutan Braziliya – Almaniya yarımfinalından sonra hər iki tərəfdən açıqlamalar verilib. Bu oyunla bağlı fikir bildirənlərin açıqlamalarını təqdim edirik:
Pele, Braziliya futbolunun canlı əfsanəsi: "Hər zaman deyirəm, futbol sürprizlərlə dolu qutudu. Dünyada heç kəs hesabın belə böyük olacağını deyə bilməzdi. Bununla belə, 4 il sonra Rusiyada altıncı dəfə dünya çempionu olacağıq. Almaniya millisini təbrik edirəm”.
Miroslav Kloze, Almaniya millisinin hücumçusu: “Mən hələ də nə baş verdiyini anlaya bilmirəm. Hətta nə deyəcəyimi də bilmirəm. Biz həqiqətən də əla oynadıq. Oyuna çox yaxşı başladıq. İlk dəqiqələrdən bütün üstünlüyü ələ keçirdik. Sanki məşq edirdik. Toni Kross topu mənə ötürdü və mənim zərbəm uğurlu alındı. Buna görə çox sevincliyəm”.
Bastian Şvaynştayqer, Almaniya millisinin yarımmüdafiəçisi: "Belə hesabla qalib gələcəyimizi biz də bilmirdik. Rəqibə hörmət etmək istəyirdik, ancaq yenə də qapıya endirdiyimiz zərbələr qol olurdu. Braziliya xalqından üzr istəyirəm. Bu dünya kuboku bizim üçün bir yuxu kimidi”.
Tyaqo Silva, Braziliya millisinin kapitanı: “Bu məğlubiyyət ömrümüzün sonuna qədər üzərimizdə ləkə kimi qalacaq. Əminəm ki, ailəm bu çətin günlərimdə mənə güc verəcək”.
Tomas Müller, Almaniya millisinin hücumçusu: "Braziliya müdafiədə fərqli oynadı. Biz də bu fürsətdən maksimum yararlandıq. Hər kəs Əlcəzair ilə matçdan sonra formadan düşdüyümüzü söyləyirdi. Amma indi bizim haqqımızda yaxşı sözlər deməyə başlayacaqlar. Bu qalibiyyət hər matçda çox fərqli nəticənin ola biləcəyini sübut etdi".
David Luis, Braziliya millisinin stopperi: “Çətin günlər keçirən insanların üzlərini bir az olsun, güldürmək istəyirdik. Ancaq çox təəssüf ki, bunu bacarmadıq. Hamımız məyusuq. Bu sadəcə, bir futbol matçı olsa da, bizim üçün çox önəmliydi. Almaniya matça daha yaxşı hazırlaşmışdı. 26 dəqiqədə 4 qol buraxdıq. Bu oyun bizim üçün dərs oldu. Arzularımızı gerçəkləşdirə bilmədik. Ancaq bir gün Braziliya xalqını çempion olaraq sevindirəcəyik".
Ronaldo, Braziliya millisinin sabiq futbolçusu: "Braziliya mütləq mundialın üçüncüsü olmalıdı. Komandanın yarımfinalda buraxdıqları səhvlər ona baha başa gəldi. Ancaq toparlanmalı və azarkeşlərimiz üçün oynamalıyıq".