Müsahibə
“Azarkeşlər gördü ki, biz oyunu udduq” – FUTPOLitika
Ramin Dekonun təqdimatında olan “FUTPOLitika” layihəsin…
Ramin Dekonun təqdimatında olan “FUTPOLitika” layihəsinin növbəti qonağı Milli Şuranın sədri Cəmil Həsənlidir. Futbolinfo.az müsahibədən kiçik bir hissəni təqdim edir. Müsahibənin tam mətnini iyulun 11-də www.futbolinfo.az-dan oxuya bilərsiz.
– 2013-cü ildəki final oynundan razı qaldınız?
– Əlbəttə. 2013-cü ildə maraqlı bir oyun oldu və bu maraqlı matçın çox pis bir hakimi vardı. Qələbəmizi əlimizdən aldı. Ancaq bütün azarkeşlər gördü ki, biz oyunu udduq.
– Belə bir fikir də var ki, Cəmil Həsənli 2005-ci ildə təmsil olunduğu komandaya arxa çevirdi. Yəni, AXCP Milli Məclisə getmədi, ancaq siz mandatdan imtina etmədiniz. Buna görə də bəziləri sizi danışılmış oyunlarda suçlayır.
– Dediyiniz oyunlarda mən heç vaxt olmamışam. Heç kənar hakimlər də deyə bilməz ki, hansısa etik normaları pozmuşam. Söhbət sizin və nəzərdə tutduğunuz o dairələrin oyunundan gedirsə, bu, özü də bir oyundur. Mən ideallarıma sadiq adamam. Parlamentə getdim, ikinci çağırışda necə idimsə, üçüncü çağırışda da həmin adam oldum. Çıxışlarımın videoyazıları var, bir hissəsi sosial şəbəkələrdə də yayılıb. Buyurub baxsınlar. Ancaq ötən müddət onu da sübut etdi ki, mən parlamentin tribunasından çox səmərəli istifadə etmişəm. Orada azarkeşlərin maraqlarını ifadə etmişəm. Azərbaycan, xüsusilə müxalif düşərgəsində bir ənənə var ki, adamlar uzun müddət təmsil olunduğu düşərgədən gedəndə oranı yandırıb getmək istəyirlər. Mənim ağlımdan heç vaxt belə şey keçməyib. Parlamentə gedən anda belə düşünənlər üçün çox zaman lazım olmadı ki, bunun fərqinə varsınlar. Görsünlər ki, elə həmin adam oldum. Cəbhə üzvü olanda necə idimsə, elə o formada da qaldım. Mənim üçün bir meyar var– azarkeşlərin haqqı və hüquqları.
– YAP komandasından sizə əsas heyətdə oynamaq təklifi gəlsə, hətta Messinin “Barselona”yla bağladığı müqaviləsi kimi fantastik olsa, bunu qəbul edərsiz?
– Onlar heç futbol oynamağa belə layiq komanda deyil. Bu komandanı ciddi rəqib hesab etmirəm. Olsa-olsa hansısa bir komandanın topdaşıyanları ola bilərlər. Ancaq qorxuram ki, topu da rüşvətlə daşısınlar.