Ölkə futbolu
"Qarabağ"ın ÇL macərası başlayır
Bu gün UEFA Çempionlar Liqasında ikinci təsnifat mərhə…
Bu gün UEFA Çempionlar Liqasında ikinci təsnifat mərhələsinə start veriləcək. Futbolinfo.az xəbər verir ki, Azərbaycanı qitənin ən nüfuzlu klub turnirində bu mövsüm son ölkə çempionu "Qarabağ" təmsil edir.
Ağdam klubu mübarizəyə birbaşa ikinci təsnifat mərhələsindən başlayır. Bölgə təmsilçisinin startdakı rəqibi Malta "Valletta"sıdı. "Qarabağ"ın rəqibi Maltanın paytaxtı Valletta şəhərini təmsil edir. Malta Super Liqasında çıxış edən bu klub 1904-cü ildə yaradılıb. Adalılar oyunlarını 17800 azarkeş tutumu olan "Ta Qali" stadionunda keçirirlər. Ağdam klubunun rəqibi 22 dəfə ölkə çempionu olmaqla yanaşı, 13 dəfə də Malta kubokunu başı üzərinə qaldırıb.
"Valletta" Maltanın avrokuboklarda ən böyük təcrübəyə malik klubu sayıla bilər. Bu komanda bütövlükdə 78 avrokubok matçına çıxıb. Onların yalnız 10-da qələbəyə sevinən maltalılar 12 görüşdə də heç-heçə ediblər və qalan görüşlərdə məğlubiyyətlə üzləşiblər. UEFA Kuboku (indiki Avroliqa) və İntertoto Kubokunda heç vaxt qələbə sevinci yaşamamış "Valletta"nın ÇL-dəki çıxışını daha uğurlu saymaq olar. Bu turnirdə keçirdiyi 34 matçın 7-də qalib gələn komanda 2 dəfə heç-heçə edib, 25 dəfə məğlub olub.
Maraq üçün qeyd edək ki, nəinki "Valletta", ümumiyyətlə, Malta klubları heç vaxt Azərbaycan klubları ilə avrokuboklarda qarşılaşmayıb. Təbii ki, eynilə "Qarabağ"ın da bu ölkə təmsilçiləri ilə yolları kəsişməyib.
"Valleta" son mövsümdə 51 xalla ölkə çempionu olub. Çempion qızıl medalları ikinci yerdə qərarlaşmış "Birkirkara" komandasını 1 xal qabaqlamaqla qazanıb. "Valetta" son mövsümdə 32 oyunda 24 qələbə qazanıb, 5 oyunda isə heç-heçə edib. Ağdam klubunun rəqibi cəmi 3 oyunda məğlub olub. 32 oyunda rəqib qapılarına 74 dəfə yol tapan valettalılar öz qapısından 21 qol buraxıb.
Komandanı 40 yaşlı yerli mütəxəssis Gilbert Aqius çalışdırır. Futbolçu karyerası zamanı da uzum müddət bu komandada çıxış etmiş gənc mütəxəssis 2012-ci ildən "Valletta"nın məşqçisi kimi çalışır. Bu ilin yayından isə o, komandaya baş məşqçi təyin olunub.
"Qarabağ"ın rəqibi elə də nəhəng təsiri bağışlamır. Bu üzdən də komandamızın "Valletta" səddini keçəcəyinə inam böyükdü. Amma təbii ki, həddən ziyadə arxayınlıq mənfi nəticələrə gətirib çıxara bilər. Buna görə də Qurban Qurbanovun yetirmələri maksimum diqqətli oynamaqla, ələ düşən qol fürsətlərini dəyərləndirməklə, cütün taleyini elə səfər matçında həll edə bilər. Cavab görüşünün Bakıda olması da Ağdam klubunun əsas üstünlüklərindəndi. Belədə "Qarabağ"ın bu şansı əldən qaçırması bağışlanmaz olacaq.
Maraq üçün bildirək ki, "Qarabağ" bu yay heyətlə bağlı elə də ciddi dəyişikliklərə əl atmadı. Elvin Yaqublu ilə Təmkin Xəlilzadəni AZAL-a icarəyə verən Ağdam təmsilçisi çox forma şansı qazanmayan Jaba Dvali, Ulrix Kapolonqo və Nikolas Gelaşvili ilə vidalaşdı. Əvəzində Portuqaliyanın "Maritimo" klubundan Danilo Dias, "Neftçi"dən Tərlan Quliyev və AZAL-dan Cavid Tağıyev ağdamlıların düşərgəsinə təşrif buyurub. Zədə və cəza problemi ilə üzləşməsə, komandamızın bu heyəti qarşıya qoyulan hədəflərə çatmaq üçün yetərli sayıla bilər.
Ağdam klubu bu mövsüm nəhayət qitə miqyaslı turnirlərdə qrup mərhələsinin iştirakçısı olmaq iddiasındadı. Vaxtilə "Neftçi"nin imza atdığı belə bir uğura Çempionlar Liqasında nail olmaq çətin olsa da, ən azı Avroliqanın qruplarına düşmək mümkündü. Bir neçə dəfə qrup mərhələsinin astanasında dayanan "Qarabağ"dan bu mövsüm gözləntilər çox yüksəkdi. Bu mənada komandamızın yeni avrokubok mövsümünə necə start verəcəyi böyük maraqla gözlənilir.
Sonda onu da bildirək ki, avrokuboklarda qazanılan istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, klublarımızın istənilən qələbəsi ölkəmizə 0,250, heç-heçə isə 0,125 reytinq xalı qazandırır. Hazırda Azərbaycan UEFA reytinqində 53 ölkə arasında 30-cu pillədədi və hesabında 9.375 reytinq xalı var. Bunun 0.500 xalı cari mövsümdə qazanılıb ki, bu da "İnter"in Avropa Liqasının ilk təsnifat mərhələsinin hər iki oyununda Moldova "Tiraspol"u üzərindəki qələbəsi sayəsində gerçəkləşib. "Qarabağ" özü isə 6.875 xalla klub sıralamasında Avropanın 199-cu komandasıdı. "Valletta" isə 4.841 reytinq xalı ilə 254-cüdü.
Çempionlar Liqası
İkinci təsnifat mərhələsi (ilk oyun)
15 iyul
21:30. Valletta – Qarabağ
Ta Qali. "Ta Qali Milli Stadionu".
Hakimlər: Adrien Jakkotte, Yohannes Vogel, Stefane De Almeyda, Sandro Şarer
Hakimlər: Adrien Jakkotte, Yohannes Vogel, Stefane De Almeyda, Sandro Şarer
(hamısı İsveçrə).
Hakim-inspektor: Alan Hamer (Lüksemburq).
UEFA nümayəndəsi: Serxio Di Sezare (İtaliya).
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Müsahibə2024-04-29 10:14
“Qalatasaray” rəsmisi: “Azərbaycana layiqli idmançılar yetişdirmək istəyirik”