Müsahibə
"Azərbaycanda ən yaxşı hücumçulardan olmaq istəyirəm"
Futbol üzrə Azərbaycan millisinin hücumçusu Pərdis…
Futbol üzrə Azərbaycan millisinin hücumçusu Pərdis Fərcad-Azadın futbolinfo.az saytına müsahibəsi
– Artıq “Sumqayıt”la razılığa gəlmisiz. Nə vaxt və neçə illik müqavilə imzalayacaqsız?
– Gələn həftə, ötən mövsümdən qalan maaşımı aldıqdan sonra “Sumqayıt”la müqavilə imzalayacam. Müqavilənin müddəti 1 illik olacaq.
– Son mövsüm başa çatdıqdan sonra “Sumqayıt”dan ayrıldınız və Təbrizin “Traktorsazi” klubu ilə danışıqlara başladız. İran təmsilçisinə keçidiniz niyə baş tutmadı?
– “Traktorsazi” ötən il də mənimlə maraqlanırdı. Bu il də onlarla danışıqlar apardıq. Ancaq razılaşa bilmədik. Çünki onlar mənə İran vətəndaşı olacağım təqdirdə müqavilə imzalamağı təklif etdilər. Təbii ki, mən də razılaşmadım. Mən karyerama Azərbaycan vətəndaşı olaraq davam etmək istəyirəm.
– “Qəbələ” və “İnter”in Avropa Liqasının birinci təsnifat mərhələsindəki oyunlarını izlədiniz?
– Ancaq “İnter”in oyununu izləyə bildim. Çünki orada dostum Mirzağa Hüseynpur çıxış edirdi. Onun həmin oyunda qol vurması məni çox sevindirdi. Ümid edirəm ki, o, növbəti mövsüm yaxşı çıxışı ilə fərqlənən futbolçulardan olacaq.
– Premyer Liqanın son çempionu “Qarabağ” Çempionlar Liqasının ikinci təsnifat mərhələsi çərçivəsində Malta “Valletta”sı ilə qarşılaşacaq. Ağdam klubunun rəqibi qarşısında şansını necə dəyərləndirərdiz?
– Ümumiyyətlə, “Qarabağ”ın oyunundan xoşum gəlir. Düşünürəm ki, onlar “Valletta”nı məğlub edəcəklər. “Qarabağ”ın bir az da bəxti gətirsə, Çempionlar Liqasında qruplara qədər irəliləyə bilər. Bundan əlavə, “Neftçi” və “İnter”ə də Avroliqa oyunlarında uğurlar arzulayıram. Klublarımızın avrokuboklarda qazandıqları yaxşı nəticələr ölkə futbolu üçün önəmlidi.
– Bizdə olan məlumata görə, AZAL-la da danışıqlar aparmısız? Onlarla hansı məsələrdə də razılaşa bilmədiz?
– Düzdü, AZAL-dan təklif almışam, amma ilk olaraq “Sumqayıt”la danışmaq istəyirəm. Çünki “Sumqayıt” mənim ikinci evimdi. Amma AZAL-a da hələ “yox” deməmişəm.
– Eşitdiyimizə görə, AZAL sizə az maaş təklif etdiyi üçün onlarla razılaşmamısız…
– Onlar “Sumqayıt”dan bir az çox maaş təklif etdilər. Amma xırda məbləğə görə “Sumqayıt”ı tərk etmərəm.
– Digər klublarımızın transferləri ilə maraqlanırsız. Sizcə, hansı Premyer Liqa təmsilçimiz daha yaxşı futbolçular alıb?
– Açığı, digər klublarımızın transferləri mənə o qədər də maraqlı deyil. Məni öz karyeram daha çox maraqlandırır. Yeni mövsümdə özümü yaxşı tərəfdən göstərib, çoxlu qollar vurmaq istəyirəm. Azərbaycanda ən yaxşı hücumçulardan olmaq istəyirəm. Allaha şükürlər olsun ki, hazırda zədəm yoxdu və mövsümün startından oynaya biləcəm.
ELMAR VƏLİYEV
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı