Ölkə futbolu
AZAL Türkiyə klubuna qalib gəldi
Yeni mövsümə hazırlıqlarını Türkiyədə davam et…
Yeni mövsümə hazırlıqlarını Türkiyədə davam etdirən AZAL bu gün növbəti yoxlama oyununu keçirib. Futbolinfo.az xəbər verir ki, "təyyarəçilər" Gerede bölgəsində yerləşən “Dorukkaya” otelinin meydançasında yeni mövsümdən Türkiyə Super Liqasında mübarizə aparacaq “Mersin İdman Yurdu” ilə üz-üzə gəlib.
Qarşılıqla hücumlar şəraitində keçən görüşdə AZAL əzmkar qələbə qazanıb. Hərçənd, ilk yarıda ələ düşən imkanlardan faydalana bilməyən komanda fasiləyə yenik durumda yollanıb. Rəqib hissənin sonlarında hesabı açıb. Amma ruhdan düşməyən “təyyarəçilər” ikinci yarıda oyunda dönüş yarada bilib. Əvvəlcə 78-ci dəqiqədə Rəşad Abdullayev penaltidən hesabı bərabərləşdirib. 85-ci dəqiqədə isə Təmkin Xəlilzadə baxışda olan Con Enrike Kordoba ilə divar paslaşmasından sonra uzaqdan baxımlı qola imza atıb. Beləliklə, AZAL 2:1 hesabı ilə qalib gəlib.
Baş məşqçi Tərlan Əhmədov bu görüşdə aşağıdakı futbolçulara şans verib: Ruslan Məcidov (Stanislav Namaşko, 46), Novruz Məmmədov (Eltun Yaqublu, 78), Oskar Klyava, Xuanxo Pereyra, Şəhriyar Rəhimov (Xuanfran, 74), Kərim Diniyev (Təmkin Xəlilzadə, 55), Orxan Lalayev (Laşa Kasradze, 46), Rəşad Abdullayev (Orxan Səfiyaroğlu, 85), Cimmi Duqlas (Viktor İbekoyi, 46), Tomi Kostadinov (Aydın Qasımov, 69), Yosip Maroşeviç (Con Enrike Kordoba, 46).
Xatırladaq ki, Türkiyədəki ilk yoldaşlıq görüşündə AZAL İran U-21 millisi ilə 2:2 bərabərə qalmışdı. Onu da əlavə edək ki, AZAL növbəti yoxlama oyununu iyulun 23-də keçirəcək və rəqib Türkiyə Superliqasının yeni təmsilçisi “Balıkəsirspor” olacaq.