Müsahibə
Qurbanov: "Məni hazırda nə "Zalsburq", nə də onların məşqçiləri maraqlandırır"
Ölkəmizi UEFA Çempionlar Liqasında təmsil edən "Q…
Ölkəmizi UEFA Çempionlar Liqasında təmsil edən "Qarabağ" ikinci təsnifat mərhələsi çərçivəsinin cavab qarşılaşmasında sabah Malta "Valletta"sını qəbul edəcək. Futbolinfo.az xəbər verir ki, oyundan bir gün əvvəl matçla bağlı mətbuat konfransı təşkil olunub.
Təşkil olunmuş mətbuat konfransında "Qarabağ"dan baş məşqçi Qurban Qurbanov və müdafiəçi Admir Teli iştirak edib. Qurban Qurbanov oyunla bağlı öncə bunları deyib:
– Sizi yenidən görməyə şadam. "Qarabağ"ın Çempionlar Liqasında evdə oynadığı ilk matçdı. Səfərdə baş tutan qarşılaşmadan sonra hansı çatışmazlıqların olduğunu öyrəndik. Rəqibi yaxşı analiz edə bildik. Səfərdə çox səhvlərimiz oldu. Gözlədiymiz problemlər oldu. Bu da normal haldı. Ancaq yenə də buna hazır idik. Texniki və taktiki səhvlər ola bilərdi. Çünki komandada səhvlər olmaması üçün 4-5 oyun keçirməli idik. Bu oyuna həddindən artıq ciddi hazırlaşmışıq. Rəqib düşündüyümüzdən də ciddi komandadı. Hər bir oyunçumuz bu oyuna ciddi hazırlaşır. Sabahkı oyunda diqqətli olmağa çalışacağıq.
– "Zalsburq"un nümayəndələri sabahkı oyunu izləyəcək. Ola bilərmi ki, buna görə komandanın oyununda nələrisə gizlətməyə çalışasız?
– Mənim səmimiyyətimə yəqin ki, inanırsız. Məni hazırda nə "Zalsburq", nə də onların məşqçiləri maraqlandırır. Fikirim "Valletta" ilə oyundadı. Çünki adi bir səhv, buraxılan qol bərabərliyə səbəb ola bilər. Ona görə hansısa eksperiment aparmağı düşünmürük.
– Zədəli futbolçuların vəziyyəti nə yerdədi?
– Maksim Medvedev sağalsa da, tam gücü ilə məşq edə bilmir. Hələ zədəsi buna tam imkan vermir. O, həkim nəzarətindədi. Bu gün yüngül məşq etsə də, "18-lik"də olmayacaq. Gələn həftədən komandaya qoşulacağını düşünürəm. Rəşad Sadıqovun vəziyyəti isə normaldı. Milli komandada zədə aldıqdan sonra xeyli məşq buraxdı. Buna baxmayaraq, o, da həkim nəzarəti altındadı. Komanda ilə birgə məşqlər etsə də, o da sabahı qarşılaşmada iştirak etməyəcək. Həkimlər ona diqqətli olmağı tapşırıb.
– "Valletta"nı tam analiz edə bilməməyinizin səbəbi nə oldu?
– Əlimizdə material az oldu. Həm də rəqibin heyətində dəyişiklik vardı. Buna görə də son yoldaşlıq oyununa baxdıq. Həmin qarşılaşmada da tam heyətlə oynaya bilməmişdi. Buna görə də komandanın tam oyun üslubunu öyrənə bilməmişdik.