Müsahibə
Yaşar Seyidov: "Möhtəşəm, əzəmətli "Bakı"nı görəcəksiz"
"Bakı"nın vitse-prezidenti Yaşar Seyidovun futbolinfo.az …
"Bakı"nın vitse-prezidenti Yaşar Seyidovun futbolinfo.az saytına müsahibəsi
– "Bakı"da son vəziyyət nə yerdədi?
– Klubun prezidenti Hafiz Məmmədov məsələ ilə bağlı öz fikirini bildirib. Biz də həftənin beşinci gününə kimi futbolçulara olan borcları ödəyəcəyik. Komanda əvvəlki əhval-ruhiyədə 2014/15-сi il mövsümünə start verəcək.
– Problemlər aradan qaldırılandan sonra transferlər olacaq?
– "Bakı"nın hazırda olan siyasəti düzgündü. Öz akademiyamızda olan futbolçuların xidmətindən yararlanmalıyıq. Vüqar Mustafayevin mövqeyində oynayan İbrahim Karbo 500 min dollar alırdı. Ancaq Mustafayev 1000 manat almaqla ondan daha da yaxşı çıxış edir. Vüqar ötən mövsümdə 20 dəfə meydanda olub. Biz İbrahim Karbo ilə də 5-ci yeri tutmuşuq, Vüqar Mustafayevlə də. Məsələ burasındadı ki, azərbaycanlı futbolçuların bacarıqlarını, ustalıqlarını artırmaqla ölkə futboluna xeyir verəcəyik. Uzun illərdi ömrünü futbola həsr edən biri kimi bildirirəm ki, biz əvvəl buraxdığımız səhvləri təkrar etməli deyilik. Öz hərəkət xəttimizi müəyyən etməliyik. Biz bu işin öhdəsindən uğurla gələcəyik.
– Bunu imkansızlıqdan atılmış addım kimi qəbul etmək olar?
– Bu gün heyətin zəifləməsi biri qorxutmalı deyil. "Bakı" 2 ildən sonra avrokuboklara təsadüfi yox, layiqli getməlidi. Təsadüfi transferlərdən qurtulub, öz yetişdirdiyi, komandaya canı ilə, qanı ilə, vicdanı ilə sadiq olan futbolçularla Avropaya getməliyik. Bu, gələn il olmasa da, növbəti ildə olacaq. Onda siz əzəmətli, möhtəşəm "Bakı"nı görəcəksiz. Yaxın günlərdə Hafiz müəllimin bu problemlərin öhdəsindən gələcəyini düşünürəm. "Bakı" əvvəlki əzəmətini geri qaytaracaq. Ancaq fərq onda olacaq ki, bütün çətinliklərə tab gətirmiş futbolçular öz layiqli qiymətlərini alacaqlar.
– Bu müddətə qədər vəziyyətin düzəlməsi ilə bağlı müəyyən tarixlər bildirilib. Ancaq elə də ciddi bir dəyişiklik olmayıb. Bəs, bu dəfə də vəziyyət düzəlməsə?
– Biz artıq çempionatın başlamasına gəlib çatmışıq. Bir neçə gün bundan qabaq "Şahdağ"la yoxlama matçı keçirmişik. Bu gün yeni yaradılmış "Zirə" komandası ilə qarşılaşacağıq. Şənbə günü "Neftçala", bazar günü isə "Mil-Muğan"la yoxlama matçları nəzərdə tutulub. Yaxşı olmayan fikirləri özümə heç vaxt yaxın buraxmıram. Mən bir qədər əvvəl də qeyd etmişəm, amma bəzi adamların xoşuna gəlməyib. Bu gün də təkrarlamalıyam. AFFA-nın prezidenti Rövnəq Abdullayevin "Bakı"nın çempionatda oynamaması ilə barışacağına inanmıram. Bu cür böyük struktura, akademiyaya malik olan və ölkə futboluna xidmət edən bir komandanın çempionatda çıxış etməməsi düzgün olmazdı. Bu məsələlərdə Rövnəq müəllimin "Bakı"ya dəstək olacağını düşünürəm.
– Qış fasiləsində "Bakı" Kiyev "Dinamo"su, Rumıniya "Styau"sı ilə yoxlama matçları keçirmişdi. İndi isə "Neftçala", "Mil-Muğan"… Sizcə, fərq çox böyük deyil? Və bütün bunlar komandanın çıxışına təsir etməyəcək?
– Hazırda "Bakı"nın heyəti yerli gənc futbolçular və müqaviləsi olan legionerlərdən təşkil olunub. Mən də həmin legionerlərə öz xüsusi təşəkkürümü bildirirəm ki, onlar "Bakı"nı tək qoymur. Onlar bununla cavanlara dəstək olurlar. Gənc futbolçular təcrübəsiz olduğu üçün güclü komandalara qarşı oynaması çətindi. Ona görə də tədricən formalaşması üçün belə oyunlar lazımdı. Sadəcə, vaxt lazımdı. Çətinliyimiz odu ki, təlim-məşq prosesi keçmədik. Ancaq nə etməli? Həyata nikbin baxmaq lazımdı. Yaxşı bir el məsəli var: "İgid odu, atdan düşüb, atlana".
EMİN SƏFƏROV