Ölkə futbolu
"Neftçi" Avroliqada növbəti sınaq qarşısında
Bu gün UEFA Avropa Liqasında üçüncü təsni…
Bu gün UEFA Avropa Liqasında üçüncü təsnifat mərhələsinin ilk oyunları keçiriləcək. Futbolinfo.az xəbər verir ki, Azərbaycanın qitənin ikinci dərəcəli klub turnirindəki çıxışını davam etdirən yeganə təmsilçisi "Neftçi" də növbəti sınağına çıxacaq.
Qeyd edək ki, digər təmsilçilərimizdən biri – "Qəbələ" Bosniya və Herseqovina "Şiroki Briyeq"inə elə ilk təsnifat mərhələsində uduzaraq (0:2, 0:3) mübarizəni dayandırdı. "İnter" isə birinci cəhdində Moldova "Tiraspol"una hər iki oyunda qalib gəlsə (3:2, 3:1) də, ikinci təsnifat mərhələsində İsveç "Elfsborq"u ilə bacarmadı (1:0, 0:1, penaltilərlə 3:4).
Avroliqaya Azərbaycan Kubokunun qalibi kimi qatılan "Neftçi" isə mübarizəyə ikinci təsnifat mərhələsindən başlayıb. Böyükağa Hacıyevin komandası bu mərhələdə Sloveniya "Koper"inə evdə uduzsa da (1:2), səfərdə 2 cavabsız qolla qalib gələrək, mərhələ adladı. Bu mərhələdə isə təmsilçimizin rəqibi Gürcüstan "Çixura"sıdı. Hansı ki, bu komanda Avroliqanın ilk təsnifat mərhələsində Makedoniyanın "Turnovo" klubunu səfərdə 1:0, evdə 3:1 hesabıyla üstələyib. Növbəti qurban isə Türkiyənin "Bursaspor" klubu olub. Hər iki oyunda hesab açılmadığından qalib penaltilərlə müəyyənləşib ki, 4:1 hesabıyla üstün olan "Çixura" "Neftçi" ilə qarşılaşmaq hüququ qazanıb.
"Çixura" 1938-ci ildə yaradılmış klubdu. Adını şəhərin yanından keçən bir çayın adından alan Saçxere şəhərinin təmsilçisi ardıcıl olaraq son iki mövsümü Gürcüstan çempionatında 4-cü pillədə başa vurub. Bakılıların rəqibi son iki mövsümdə Gürcüstan Kubokunun finalına vəsiqə qazansa da, Tiflis "Dinamo"suna məğlub olublar. Bu klubun Gürcüstandakı ən böyük uğuru isə ötən il ölkə superkubokuna sahib çıxması olub.
Bu komanda son mövsümdə 32 matçda 13 qələbə, 7 heç-heçə ilə 46 xal toplamağa nail olub. Qalan 12 görüşdə məğlub olan "Çixura" 56 qol vurduğu halda, öz qapısından 50-sini buraxıb.
Gürcü klubu ev oyunlarını 2 min azarkeş tutumu olan "Central" stadionunda keçirir. Ancaq UEFA bu arenanı tanımadığından, qərb qonşularımız Avroliqa matçlarını paytaxt Tiflisdə yerləşən və 27 223 azarkeş tutumu olan "Mixail Mesxi" stadionunda keçirmək məcburiyyətində qalıb.
Gürcüstan təmsilçisinin avrokuboklardakı ən böyük uğuru elə bu mövsümə təsadüf edir. Ancaq ötən və bu mövsüm Avropa Liqasında vəsiqə qazana bilən komanda bu turnirdə ümumilikdə 8 oyun keçirib və 2 qələbə, 4 bərabərlik, 2 məğlubiyyəti olub. Rəqib ötən mövsüm Samson Fruidzenin başılığı ilə ilk təsnifat mərhələsində "Vaduts"u mübarizədən kənarlaşdırsa da, növbəti mərhələdə İsveçrənin "Tyun" komandasına məğlub olaraq, Avropa məcarasını başa vurmuşdu.
Maraq üçün qeyd edək ki, bu komanda "Neftçi" üçün elə də yad deyil. Belə ki, "ağ-qaralar" bu yay Türkiyədə təlim-məşq toplanışında olarkən "Çixura" ilə iki dəfə qarşılaşıb. Yoxlama matçlarının birində gürcülər 3:2 hesabı ilə qalib gəlib. Növbəti oyunda isə komandalar meydandan sülhlə ayrılıb – 1:1.
Göründüyü kimi, "Neftçi"nin budəfəki rəqibi də təxminən "Koper" kimi komandadı. Heç bir ciddi uğurları olmayan Sloveniya klubu kimi, "Çixura" da müdafiə futboluna üstünlük verib, əks-hücumlarda şans axtarır və komanda oyunu ilə sürpriz etməyə çalışır. Ümid edək ki, "ağ-qaralar" bu rəqibini də mübarizədən kənarlaşdıra biləcək və sensasiyaya imkan verməyəcək. İşə düzgün yanaşma, diqqətli oyun, maksimum güc sərf etməklə bu komandanı mübarizədən kənarlaşdırmaq olar. "Neftçi" cütün taleyinə böyük ölçüdə ev oyununda aydınlıq gətirməlidi. Bu mənada Böyükağa Hacıyevin komandası öz qapısını toxunulmaz saxlamaq şərtilə rəqib qapısına mümkün qədər çox qol vurmağa çalışmalıdı ki, bir həftə sonra Gürcüstanda keçiriləcək cavab görüşündə işi çətin olmasın. Bu, Azərbaycan klubunun tarixində ikinci dəfə Avroliqanın pley-off mərhələsinə vəsiqə qazanması baxımından çox vacibdi.
Sonda onu da bildirək ki, avrokuboklarda qazanılan istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, klublarımızın hər bir qələbəsi ölkəmizə 0,250, heç-heçə isə 0,125 reytinq xalı qazandırır. Hazırda Azərbaycan UEFA reytinqində 53 ölkə arasında 30-cu pillədədi və hesabında 10.525 reytinq xalı var. Bu mövsüm ölkəmizə 0.750 xalı "İnter", 0.750 xalı ÇL-dəki təmsilçimiz "Qarabağ", qalan 0.250 xalı isə "Neftçi" qazandırıb. Ümidvarıq ki, bu gün keçiriləcək oyunda "ağ-qaralar" xal ehtiyatımızı daha da yaxılaşdıra biləcək.
"Neftçi" hazırda 8.075 xalla klub sıralamasında Avropanın 181-ci komandasıdı. Rəqibi "Çixura" isə 3.350 reytinq xalı ilə 320-cidi.
Avropa Liqası
Üçüncü təsnifat mərhələsi (ilk oyun)
31 iyul
20:00. Neftçi – Çixura
Hakimlər: Kristian Balay, Sebastyan George, Ovidiu Artene, Katalin Sorin Popa (Rumıniya).
Hakim-inspektor: Jiri Ulrix (Çexiya).
UEFA nümayəndəsi (Vladislav Xodeyev (Rusiya).
UEFA nümayəndəsi (Vladislav Xodeyev (Rusiya).
Bakı. "Bakcell Arena".
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı