Müsahibə
Sxadadze: "Yeni hücumçu almasaq, çox ciddi problemlərimiz olacaq"
“İnter” klubunun baş məşqçisi Kaxaber Sxadadze …
“İnter” klubunun baş məşqçisi Kaxaber Sxadadze ötən gün keçirilmiş AZAL-la yoxlama matçından sonra jurnalistlərin suallarını cavablandırıb. Futbolinfo.az sizi həmin müsahibə ilə tanış edir:
– AZAL üzərindəki 2:0 hesablı qələbəni necə şərh edərdiz?
– Yaxşı oyun keçdi. Çoxlu qol imkanları yarada bildik. Amma həmin epizodların çoxunu dəyərləndirə bilmədik. Ümumilikdə, komandamın çıxışından razı qaldım. Futbolçularımın meydandakı əzmkar mübarizəsini alqışlayıram. Nəticə də, oyun da yaxşı oldu.
– Demək olarmı ki, “İnter” çempionata tam hazırdı?
– Məncə, demək olar. Digər komandalara baxanda, biz təlim-məşq toplanışına daha tez başladıq. Buna səbəb də Avroliqadakı oyunlarımız oldu. Həm təlim-məşq toplanışından, həm də avrokubok matçlarından sonra demək olar ki, “İnter” növbəti mövsümə hazırdı.
– “İnter” Avropa Liqasının ikinci təsnifat mərhələsində İsveçin “Elfbsorq” klubuna uduzdu. Komandanızın bu məğlubiyyətini unuda bilmisiz?
– Bunu tam olaraq unuda bilməmişik, amma çempionat başlayana kimi kimi yaddan çıxararıq. Belə məğlubiyyətləri tez bir zamanda unutmaq asan deyil. Hazırda komandamı psixoloji gərginlikdən çıxarmağa çalışıram. Onları çempionat başlayana qədər tam hazırlamalıyam.
– Çempionatın startına çox az vaxt qalsa da, Avroliqada problemlər yaşadığınız hücum xəttinə hələ futbolçu gətirməmisiz…
– Bizim yeni hücumçuya çox ehtiyacımız var. Bu, çox vacib məsələdi. Əgər hücumçu gətirməsək, Premyer Liqada çox ciddi problemlərimiz olacaq. Axtarışlarımız davam edir. İnanıram ki, gec də olsa, ön xətdəki problemi aradan qaldıra biləcəyik.
– Avroliqa oyunlarında qapını Georgi Lomaya qorudu. Bu oyunda isə qapıçı olaraq Səlahət Ağayev meydana çıxdı. Limitə görə Premyer Liqa oyunlarına onu hazırlayırsız?
– Səlahət çox yaxşı qapıçıdı. O, təkcə limitə görə meydana çıxmır, həm də yaxşı qapıçı olduğuna görə oynayır. Lomaya kimi o da komandamızın bir nömrəsidi. Ümumiyyətlə həm Lomayanı, həm də Səlahəti əsas qapıçı hesab etmək olar. Sadəcə olaraq, Ağayev oyun təcrübəsizliyindən əziyyət çəkdiyi üçün onu meydana buraxdım. O da işinin öhdəsindən layiqincə gəldi. Bundan sonra kim daha hazırlıqlı olacaqsa, çərçivəni ona etibar edəcəyik.
– AZAL-la yoxlama matçınızı “Qəbələ”nin baş məşqçisi Dorinel Muntyanu da izləyirdi. Ola bilərmi ki, ona görə komandanız tam gücü ilə oynamadı?
– Yox, biz avrokuboklarda 4 oyun keçirmişik. Əgər Muntyanu istəsəydi, onların hamısına baxıb, haqqımızda tam məlumat əldə edə bilərdi.
– Axı bu oyunda siz fərqli heyətlə meydana çıxmışdız…
– Düzdü, fərqli heyətlə meydana çıxmışdıq. Oyunun gedişində də az oynamaq şansı qazanan futbolçulara şans verdim. Sırf hazırlıq oyunu idi. Rəqib baş məşqçiyə görə heç nə gizlətmədik. Yenə deyirəm ki, Muntyanu onsuz da avrokuboklardakı oyunlarımıza baxıb.
– “Elfsborq”la oyundan sonra sonra istefa vermişdiz…
– Düzdü, istefa verdim. Amma rəhbərlik yenə qəbul etmədi.
– Azərbaycan futbol ictimaiyyəti sizin komandadan getməyinizi istəmirdi…
– Hamısına ayrı-ayrılıqda təşəkkür edirəm. Son iki ildə Azərbaycanda həm futbol adamlarının, həm də azarkeşlərin dəstəyini hiss edirəm. Avroliqa oyunlarında da bizə kifayət qədər dəstək verdilər. Bu amil bizim məsuliyyətimizi artırır. Çalışacağıq ki, qarşıdakı illərdə onları daha çox sevindirək.
ELMAR VƏLİYEV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib