Müsahibə
Kvaratsxeliya: "Neftçi" "Çixura"nı rahat keçəcək"
Tovuzun "Turan-T" klubuna yeni baş məşqçi təyin o…
Tovuzun "Turan-T" klubuna yeni baş məşqçi təyin olunan Badri Kvaratsxeliya ilk müsahibəsini verib. Futbolinfo.az xəbər verir ki, gürcü mütəxəssis komandaya gəlişi, qarşıya qoyulan məqsədlər, eləcə də Azərbaycan futbolu, avrokuboklardakı klublarımız haqda danışıb:
– Öncə Tovuz klubuna gəlişiniz barədə məlumat verərdiz. Bu, necə oldu?
– Açığını deyim ki, mən bu təklifi gözləmirdim. Klub rəhbərliyi mənimlə əlaqə saxladıqdan sonra düşünmədən razılaşdım. Çünki mən Tovuz futbolunu çox yaxşı tanıyıram. Azərbaycan futbolunu ilk dəfə avrokuboklarda təmsil etmiş, çempion olmuş bir şəhərin təmsilçisidi. Perspektivi və potensialı ilə yanaşı bu klubun keçmişi hamıya məlumdu. Azərbaycan futbolunun mərkəzlərindən biridi. Maliyyə sıxıntısı səbəbindən əvvəlki əzəmətini itirsə də, bura bir bulaqdı. Bu perspektivi gördüyüm üçün komandaya gəldim. Burada işləmək mənim üçün şərəfdi.
– Artıq bir həftəyə yaxındı ki, hazırlıq keçirsiz. İlkin təəssüratlarınızı bölüşərdiz.
– Rəhbərliyə komandaya yaratdığı şərait üçün təşəkkürümü bidirirəm. Hələ ki, komandanı formalaşdırmaq üçün çalışırıq. Əsasən yerli futbolçulara üstünlük verəcəyik. Vacib deyil tovuzlu olsun, Azərbaycanın hər yerindən istedadlı gənc futbolçuları komandaya cəlb edib onların inkişaf etmələrinə nail olacağıq. Yerli futbolçuların da arasında perspektivliləri kifayət qədərdi. Əsas məqsəd döyüşkən, mübariz komanda formalaşdırmaqdı. İşlərimiz bu yöndə davam edəcək.
– Qarşınıza hansı məqsəd qoyulub?
– Qeyd etdiyim kimi, ilk növbədə döyüşkən komanda qurmaq istəyirik. Asan təslim olmayan, mübariz komanda yığıb gənc futbolçuların üzə çıxmasına çalışacağıq. Çempionatda isə bacardığımız qədər irəli getmək istəyirik. Məqsədimiz ən az ilk 6-lıqda qərarşalmaqdı. Bizim işimiz bir illik deyil. Gələcəyin komandasını qururuq. Düzdü, gücümüz daxilində şəraitimiz var. Öncə özümüzü sübut etməliyik. İstədiyimiz komandanı toparlayıb, işlərimizi yoluna qoyduqdan sonra Premyer Liqanı hədəfləyəcəyik. Bunun üçün isə dayanmadan çalışacağıq.
– Tovuz təmsilçisinin maliyyə imkanları yüksək səviyyədə olmasa da, bu təklifi qəbul etmisiz…
– Mən buraya pul üçün gəlməmişəm. Mənim də öz məqsədim, ambisiyalarım var. Özümü işimlə sübut etmək istəyirəm. Futbolçularımdan da bunu tələb edirəm. Ambisiyası olmayan, karyerasını düşünməyən futbolçu mənə lazım deyil. Fikirləşirəm ki, özümü təsdiq etmək üçün “Turan-T” ən yaxşı variant idi. Burada həm əsas komandanı qurmaq, nəticələr əldə etmək, həm də uşaq futbolunun inkişafına nail olmaq istəyirəm. Qismət olarsa, elə bu komanda ilə yüksək liqaya vəsiqə qazanıb, orada da uğurlu nəticələr əldə etmək istəyirəm. Bu səbəbdən də buradayam.
– Tovuz Rayon İcra Hakimiyyətinin başçısı Tofiq Zeynalovla görüşmüsüz. O, sizdən nə tələb etdi, nələri müzakirə etdiz?
– O, futbolu yaxından izləyən, rayonunu və komandasını sevən insandı. Komandanı daim yüksəklərdə görmək, Tovuz futbolunun əvvəlki əzəmətini özünə qaytarmaq istəyir. Mənə güclü, daha çox gənclərdən təşkil olunmuş komanda yaratmağı və çempionatda yüksək nəticələr əldə etməyi tövsiyyə etdi. Belə olacağı halda daim dəstək verəcəyini, komandanın yanında olacağını qeyd etdi.
– Uzun müddət Azərbaycanda oynamısız, çalışmısız. Sizcə, futbolumuzda nələr dəyişib? İnkişaf varmı?
– Təbii ki, mənim oynadığım dövrlə indiki arasında böyük fərq var. İndi infrastruktur, şərait, maliyyə hər şey fərqlidi. Komandalara yüksək səviyyəli legionerlər, məşqçilər dəvət olunur. Birinci divizionda çox komandanı tanımasam da, məsələn, mən “Qəbələ”də çalışarkən kubokda “Qaradağ Lökbatan”la qarşılaşmışdıq. “Qəbələ”nin səviyyəsinə hər kəs bələddi, amma həmin oyunda 1-ci divizion komandası layiqli müqavimət göstərdi. İnkişaf var və məncə, getdikcə daha da yüksək tempdə inkişaf edəcək.
– Yəqin ki, “Qarabağ” və “Neftçi”nin avrokuboklardakı son oyunlarını izləmisiz…
– Bəli, hər iki oyuna baxmışam. Açığını deyim ki, “Qarabağ” məni yaxşı mənada təəccübləndirdi. “Zalsburq” Avropanın güclü klublarından biridi. Onların infrastrukturu, şəraiti, maliyyə imkanları qitənin ən yaxşılarındandı. Lakin “Qarabağ” belə güclü rəqibdən çəkinmədən mübarizə apardı. Deyərdim ki, “Qarabağ” tarix yazdı, bu münasibətlə komandanı təbrik edirəm. Komanda əsl çempion kimi mübarizə apardı və layiqli qələbə qazandı. “Neftçi” haqda onu deyim ki, “Çixura”nı rahat məğlub edəcəyini gözləyirdim. Çünki bu iki komanda arasında böyük fərq var. “Neftçi”nin yaxşı baş məşqçisi, səviyyəli futbolçuları var. Məncə, “Neftçi” bu mərhələni rahat adlayacaq.
– Yeri gəlmişkən, “Neftçi” – “Çixura” oyununda qalmaqal yaşanmışdı. Uzun müddət Azərbaycanda yaşamış bir insan kimi münasibətinizi bilmək istərdik…
– Bu, sırf təxribatdı. Əsrlərdi Azərbaycan və Gürcüstan xalqları əla qonşuluq, dostluq, qardaşlıq münasibətində yaşayıblar və beləcə də yaşayacaqlar. Bu təxribatçılar iki dost xalqın bir-biri ilə münasibətini pozmaq istəyirlər. Əminəm ki, müdrik Azərbaycan xalqı bu təxribata aldanmayacaq. Həm azərbaycanlılar, həm də gürcülər belə insanlara aldanmasınlar. Heç vaxt hansısa gürcü və ya azərbaycanlı bu dostluğu pozmağa çalışmaz. Təxribatçıların hamısı layiqli cəzalarını alacaqlar. Dövlət başçıları da bu məsələni diqqətdə saxlayırlar. Gürcüstan höküməti dərhal o insanları tapıb cəzalandırmağı tapşırıb. Belə şeylər yolverilməzdi. Elələri heç vaxt istəklərinə çatmayacaqlar.