Ölkə futbolu
Mövsüm başlayır: Əvəzedici komandalar hələ də hazır deyil
2014/15 mövsümün startına sayılı günlər qaldı…
2014/15 mövsümün startına sayılı günlər qaldı. Növbəti mövsümdə hər komanda öz iddiası ilə çıxış edəcək. Premyer Liqada çıxış edən 10 komanda yay fasiləsində öz büdcəsinə uyğun təlim-məşq toplanışı keçdi. Klub rəhbərləri hər zaman olduğu kimi, bu dəfə də diqqəti əsas komandalara yönəltdiyindən əvəzedicilər bir qədər kölgədə qaldı. Əksər klubların əvəzediciləri hazırlığı yüksək səviyyədə keçmədi.
Premyer Liqanın debütantı "Araz Naxçıvan"ın əvəzedici komandası iki ay bundan əvvəl formalaşmağa başlayıb. Komandanın gec formalaşamasının, heyətini hələ tam komplektşdirə bilməməsinin debütantın əvəzedicilərinin çıxışına mənfi təsir edəcəyi dəqiqdi. Bundan başqa komanda ev oyunlarını mərkəzdə yox, Şərur rayonunda keçirəcək. Sözsüz ki, səfər matçları zamanı yol yorğunluğu da iki aydı yığılan komandanın oyununa öz təsirini göstərəcək.
Ötən il birtəhər elitada qalmağı bacaran "Sumqayıt"ın əvəzedicilərinin baş məşqçi postu isə hələlik, boş qalıb. Mehman Yunusovun "Qəbələ" Futbol Akademiyasına məşqçi kimi yollanmasından sonra boş qalan posta sabiq futbolçu Samir Abasovun gələcəyi deyilsə də, hələ ki, bununla bağlı bir xəbər yoxdu. Sözsüz ki, baş məşqçi probleminin həll olunmaması komandanın növbəti çempionatdakı işinin asan olmayacağından xəbər verir.
"Neftçi" və "Xəzər Lənkəran"nı çıxmaq şərti ilə, digər əvəzedici komandalar hazırlığını ölkə daxilində keçdi. "Bakı"nın məlum maliyyə problemləri ucbatından heç əsas komandasının ölkə xaricində yollanmadığını nəzərə alsaq, əvəzedicilərindən söz açmağa dəyməz. Ötən mövsümü 5-ci pillədə tamamlayan bakılıların əvəzedicilərinin növbəti mövsümdə çıxışının ürəkaçan olmayacağı indidən bəllidi.
Saytımıza danışan "Neftçi", "Qəbələ", "Simurq", AZAL-ın əvəzedicilərinin baş məşqçiləri növbəti mövsümə qismən hazır olduqlarını bildirdilər. Digər komandaların baş məşqçiləri ilə əlaqə saxlasaq da, bütün cəhdlərimiz boşa çıxdı.
Elşad Əhmədov, "Neftçi"nin əvəzedici komandasının baş məşqçisi: "İlk toplanışımız Gürcüstanda oldu. Qonşu ölkədə əsasən fiziki hazırlığa üstünlük verdik. Rəhbərlik bizə yaxşı şərait yaratdığı üçün, hazırlığımız da yüksək səviyyədə oldu. İkinci təlim-məşq toplanışını isə Lökbatanda keçirdik. Heyət baxımından problemlərimiz var. İş olan yerdə problemin olması normaldı. Demək olar ki, komandam 75-80 faiz yeni mövsümə hazırdı. "Neftçi" hər zaman çempionluq uğrunda mübarizə aparıb. Yenə də yüksək yerlər uğrunda mübarizə aparmağa çalışacağıq".
Luis Araqon, "Qəbələ"nin əvəzedici komandasının baş məşqçisi: "Təlim-məşq toplanışına iyunun 26-da Qəbələdə başladıq. Ötən illərdən fərqli, bu il Qəbələdə qalmağa üstünlük verdik. Bunun da səbələrindən biri 6 futbolçumuzun əsas komandanın heyətinə cəlb olunması, 4 oyunçumuzun isə U-19 millisinə dəvət edilməsi idi. Ötən ilə nisbətən bu ilki komandamız çempionatda ən cavan komanda olacaq. Bu il əvəzedici komandaya daha çox akadamiyamızdan olan 96, 97, 98 təvəllüdlü futbolçuları cəlb etmişik. Sadəcə, kənardan bir futbolçu transfer etmişik. Komanda hazırlıqlı görünür. Ancaq biz bunu mövsümün sonunda şahidi ola biləcəyik. Əsas məqsədimiz oyunçu yetişdirmək olduğu üçün nəticələr, turnir cədvəlindəki yerlər bizim üçün önəmli deyil. Bir-iki oyunçunun sənəd problemi var. Bundan sonra hücüm xəttini gücləndirəcəyik".
Rövşən Babayev, "Simurq"un əvəzedi komandasının baş məşqçisi: "İki mövsümdü Zaqatalada hazırlaşırıq. Heyət cavanlaşdıraraq üstünlüyü 95, 96, 97 təvəllüdlü olan futbolçulara verdik. Yeni bir komanda yığırıq. Ötən ayın əvvəllərindən bir araya gəldik. 3 yoxlama matçı keçirdik. Hazırda Bakı ilə oyuna hazırlaşırıq. Heyət baxımından elə bir problem yox idi. Biz əsasən yerli futbolçulara üstünlük veririk. Problemimiz Zaqatalada uşaq futbol məktəbinin zəif olması ilə əlaqədardı. Biz də bu problemi aradan qaldırmaq üçün çalışırıq. Bunun üçün zaqatalalı məşqçiləri oxumağa göndərdik. Rəhbərlik tərəfindən problemlər həll olunub. İstədiyim kimi, yoxlama oyunları keçirə bilmədik. Birinci divizion komandaları "Kəpəz", "Turan-T", "Şəmkir" hələ təlim-məşq toplanışına başlamamışdı. Bir komanda olan boşluqları bilmək üçün çoxlu yoxlama matçları keçirmək lazımdı. Biz də rəqib tapa bilmədik. Çalışacağıq çempionatın gedişində bu problemləri aradan qaldıraq. Ən böyük məqsədimiz cavan futbolçuları əsas komandaya bəxş etməkdi. Bu mövsüm əsas komandaya 5 futbolçu verdik. Onlardan ikisi də Zaqataladandı. Yenə də yüksək nəticələr üçün vuruşacağıq".
Mehman Babayev, AZAL-ın əvəzedicilərinin baş məşqçisi: "Yay fasiləsində komandanı yenilədik. 12 yoxlama matçında futbolçuları sınaqdan keçirdik. Təzə cəlb olunan futbolçular öz yetirmələrimizdi. Yaşlı olan futbolçularla bu il vidalaşdıq. Mövsümün sonunda əsas komandaya iki futbolçu vermişik. Onlardan biri 93, digəri 95 təvəllüddü. Məqsədimiz əsas komanda üçün futbolçu yetişdirməkdi. Klub rəhbərliyi tərəfindən bizə şərait yaradılıb. Komanda yeni olduğu üçün qarşıdakı mövsümdə problemlər ola bilər. Vaxtımız az olduğundan yaxşı hazırlaşa bilmədik. Bir-iki oyun çətinliyimiz ola bilər. Tədricən problemlər aradan qaldırılacaq".
EMİN SƏFƏROV