Ölkə futbolu
İŞİD təhkükəsi dindar futbol adamlarımızın gözündə
Özünü İslam dövləti adlandıran İŞİD Suriya v…
Özünü İslam dövləti adlandıran İŞİD Suriya və İraqda ard-arda qətliamlar törədən silahlı təşkilatdı. Bu təşkilat İraq, Suriya, Fələstin və İordaniyanı əhatə edən bölgələrdə şəriət qanunlarına söykənən dövlət qurmaq istəyindədi.
İŞİD-in yayımladığı son xəritə isə Azərbaycanda da rezonansa səbəb oldu. Belə ki, xəritədə təşkilatın Azərbaycan da daxil olmaqla, Qafqaz ölkələrini zəbt edəcəyi göstərilir. Bəs görəsən, İŞİD-in bu addımları doğrudumu? Bu və digər suallarımızı futbolumuzun dindar üzvləri cavablandırdı.
“Bakı” klubunun qapıçısı Aqil Məmmədov İŞİD-in Azərbaycana daxil ola biləcəyinə inanmır: “Xeyr, İŞİD-in etdiklərini doğru hesab etmirəm. Allahın kitabında belə bir şey yoxdu. Sadəcə, onu deyə bilərəm ki, Allahın dinindən səhv istifadə olunur, vəssalam. İŞİD-in ölkəmizə daxil olması söhbətləri boş şeylərdi. Azərbaycan hökuməti belə şeyə heç vaxt imkan verməz”.
Millimizin və “Xəzər Lənkəran”ın müdafiəçisi Rasim Ramaldanov bu mövzu ilə bağlı danışmaq istəməyənlərdəndi: “Bu məsələ ilə bağlı fikir bildirmək istəmirəm. Xahiş edirəm, mənə bu sualları verməyin, mən bu haqda danışmaq istəmirəm".
Dindar insan kimi tanıdığımız futbol mütəxəssisi, təcrübəli məşqçi Ağasəlim Mircavadov İŞİD-in aksiyalarını vəhşilik adlandırır: “Allah heç vaxt heç bir insana icazə verməyib ki, başqa bir insanı öldürsün, o ki, qaldı baş kəsmək ola. Müsəlmanlıqda belə bir şey yoxdu. Məhəmməd peyğəmbərimiz, imamlarımız bizə belə öyrətməyib. Bu, vəhşilikdi. Mən bunu qəbul etmirəm. İŞİD-in Azərbaycana daxil olması barədə xəbər məni niyə qorxutsun ki? Azərbaycan müsəlmanları düzgün yoldadı, ona görə də inanmıram. Bizim xarici siyasətimiz möhkəm əllərdədi. Ona görə də burada qorxulu bir şey yoxdu”.
“İnter” klubunun yarımmüdafiəçisi Elvin Məmmədov hər formada dövlətimizin təhlükənin qarşısını ala biləcəyini düşünür: “Əlbəttə, yanlış addımdı. Fərqi yoxdu, kim olursa olsun, kimin haqqı var ki, insan öldürməyə? Bunlar səhvdi. Yəqin ki, gün gələcək, onlar üçün də təhlükəli olacaq insanlar çıxacaq. Əlbəttə, kiminsə haqqına girmək, kimisə öldürmək doğru deyil. İŞİD-in Azərbaycana daxil ola biləcəyinə inanmıram, çünki bizim dövlətimizdə elə orqanlar var ki, heç onlara imkan verməz ölkəyə daxil olsunlar. Buna inanmıram. Elə bir iddiaları varsa, dövlətimiz onların qarşısını mütləq alacaq”.
Millinin qapıçısı Fərhad Vəliyev tezliklə vəziyyətin düzələcəyini düşünənlərdəndi: “Xeyr, şəriətimizdə elə bir şey yoxdu. İŞİD-in bu addımlarını çox mənfi qarşılayıram. İnşallah, düşünürəm ki, yaxın gələcəkdə hər şey yoluna düşər, sakitləşər. İŞİD-in Azərbaycanla bağlı iddialarına gəlinə, mən nə deyim? Bizim dövlətimiz güclü dövlətdi. İnşallah, belə bir şey baş verməz”.
SEVİNC XANQIZI
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”