Ölkə futbolu
"Neftçi"də yeni dəb
"Neftçi"də istefa proqramlarının daha bir seriyas?…
"Neftçi"də istefa proqramlarının daha bir seriyası başa çatdı. Bundan sonra şou başlayacaq. Bununla da olacaq – şou-proqram.
Böyükağa Hacıyevin komandadan göndərilməsi, Tahir Süleymanovun məzuniyyətə çıxması paytaxt klubunda sabitliyin yaranması anlamına gəlmir. Düzdü, Hacıyev getmək istəmirdi. Dəfələrlə dilinin bəlasına düşən məşqçi sonradan verdiyi açıqlamalara görə peşman olduğunu müxtəlif yollarla bildirdi. Amma Hacıyevdən fərqli olaraq, Tahir bəyin çıxış yolu qalmamışdı. Artıq tamaşaçılar onun şousunun dəfələrlə şahidi olduğundan, Süleymanovun istefa verdikdən sonra yenidən kluba qayıtmasını gülünc hesab edirdi. Sonda sabiq vitse-prezident öz abrına qısılaraq, gülüş obyektivinə, ictimai qınağa tuş gəlməmək üçün birdəfəlik getdi.
Amma Süleymanovun budəfəki gedişinin də birdəfəlik olması inandırıcı deyil. Belə ki, o, saytımıza verdiyi müsahibədə dediyi "Gələcəkdə nəyin baş verəcəyini Allahdan başqa heç kim bilə bilməz" ifadəsi ilə bir növ özü üçün ayaqyeri qoydu.
Süleymanovun gedişindən sonra Mübariz Xudiyevin vitse-prezidentin vəzifəsini müvəqqəti icra etməsi də beyinlərdə bir sıra suallar yaratdı. Belə çıxır ki, klub prezidenti Xudiyevi bu vəzifəyə təyin etməklə Süleymanovun yoxluğunun hiss olunub-olunmayacağını yoxlayır. Axı, o, həmişə ortada yeyib, qıraqda gəzən olub. Bugünə kimi icraçı direktor olsa da, kimsə ondan hesab sormayıb, nədəcə ittiham etməyib. Eləcə başını aşağı salıb, “işini görüb”, çörəyini qazanıb.
Bu məqamda Süleymanovdan fərqli olaraq, Sadıqovun şəxsi nüfuzunun mühafizəsinin təşkilində təcrübəsiz olması Mübariz bəyin işini çətinə sala bilər. Növbəti uğursuzluqlarda sabiq vitse-prezidentin yeri görünəcək. Sadıqov yenə hədəf olanda məcburiyyətdən Süleymanovu göndərdiyi üçün dizinə döyəcək.
"Neftçi"dəki digər gülünc təyinat vaxtilə klubun mətbuat xidmətinin rəhbəri olmuş və sonradan komandadan elə mətbuatla bağlı çirkli oyunlarına görə qovulmuş Elnur Əşrəfoğlunun adı ilə bağlıdı. Sadıqov onu flaqmanda daim vakant yer olan, inciklərin, sabiqlərin könlünü almaq üçün saxladığı müşavir postuna təyin edib. Hansı ki, bu postda Əşrəfoğludan əvvəl Böyükağa Hacıyev də əyləşmişdi. Sonradan sabiq baş məşqçi Nazim Süleymanovun torbasını tikib postuna qayıtdı, müşavir vəzifəsi isə boş qaldı.
Qeyd etdiyimiz kimi, klub prezidentinin müşafiri vəzifəsi "Neftçi"də ən lazımsız postlardan biridi və birincisidi. Guya Sadıq Sadıqov müşavirin ağılı ilə oturub-duracaq ki? Bundan əvvəl Böyükağa Hacıyev sözügedən vəzifədə çalışanda Sadıqova hansı xidmətləri olmuşdu ki, bundan sonra həmin missiyanı yerinə yetirəcək keçmiş jurnalist nə edə? O, Sadıqova yalnız mətbuatın təzyiqlərinin qarşısını almaq üçün lazımdı. Keçmiş televiziya işçisinin "Neftçi"də çalışdığı dönəmdə mətbuata qarşı etdiyi rüsvayçı hərəkətlərindən sonra kiminsə haqlı tənqidə görə onun göz yaşlarına acıyacağı heç inandırıcı deyil.
Əvəzində müşavirlik postunun dayanacaq kimi istifadə olunması gizli deyil. Xatırlatdığımız kimi, vaxtilə Böyükağa Hacıyev bu postda çalışdı, sonradan bir daha "Neftçi"yə baş məşqçi kimi təyin olundu. Əşrəfoğlu mətbuat vasitəsi ilə Sadıq Sadıqovu şantaj edərcəsinə "o, sözünün ağasıdı, mənə iş söz veribsəŞ dediyini edəcək" cümləsini əbəs yerə işlətmirdi. Vəzifə üçün səbrsizlənən Elnur bəy bir növ Sadıqovu hədələyərək istəyinə çatdı.
Görünür, buna qədər tərəflər görüşüb, razılaşıbmış. Sadəcə, Əşrəfoğlu vəzifənin rəsmiləşməsi üçün "Neftçi"nin uğursuzluğunu gözləyirmiş. Avropa Liqasındakı uğursuzluq və çempionatdakı ürəkaçmayan oyun vəzifə gözləyənlərin ürəyincə idi. Vədə yetişdi, onlar da öz istəyinə çatdı. Sadıq Sadıqov müşavir kimi işə götürdüyü Əşrəfoğlunu hələ sınaqdan keçirir. Ola bilsin ki, müşaviri başqa ampulalarda da "oynatsın". Ancaq burada daha bir sual ortaya çıxır. Böyükağa Hacıyev klubda qalmaq üçün Sadıq bəyə "dədə" deyirdi. Görəsən, vaxtı ilə klubdan qovulmuş şəxs bu dəfə də eyni aqibətlə üzləşməmək üçün hansı addımı atacaq? Sualın cavabını tapana qədər bir qədər vaxtımız var ki, hazırda klubun mətbuat xidmətində çalışan Gündüz Abbaszadənin taleyinin necə olmasına aydınlıq gətirək.
Sözsüz ki, Əşrəfoğlu "Neftçi"dən qovulduqdan sonra onun yerinə təyin olunan Abbaszadəyə qarşı qisas hissi ilə alışıb-yanır. Heç şübhəsiz ki, Əşrəfoğlu "Neftçi"də mətbuatdan yaxşı anlayışı olan ikinci bir şəxsin olmasını istəməyəcək. Onun Gündüz bəyi zamanla, saman altından su yeridirmiş kimi "vurması" da gözləniləndi. Hər halda son təyinatlar "Neftçi"nin uğursuzluqlarını güdən və bu, baş verdikdə hərəkətə keçən adamların olduğunu bir daha göstərdi. Şəxsi mənfəətini daha üstün tutan indiki "sostav"la Sadıqovun "Neftçi"sinin çox uzağa getməyəcəyi dəqiqdi.
Şou-proqram isə davam edir. İndi gözləmək növbəsi başqalarınındı. Hazırkı heyətin, rəhbərliyin, komandanın… Bunlar uğursuz olanda Hacıyev, Süleymanov və başqaları yəqin ki, yenidən “Neftçi”nin qaranlıq səmasında gözə dəyəcək.
AĞA
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”