Müsahibə
“90 dəqiqə hələ başa çatmayıb”
Aydın Mirzəzadə: “Təəccüb, təəssüf və eyni zam…
Aydın Mirzəzadə: “Təəccüb, təəssüf və eyni zamanda çox böyük suallar beynimdən keçir”
“FUTPOLitika” – Azərbaycanda indiki siyasi durum, dünya futbolu və sən futbolçu olsaydın…
Onunla vədələşdiyimiz zamanda Milli Məclisin qonaq otağında görüşdük. Sakit, təmkinlə suallarımızı dinləyir və özünəməxsus tərzdə cavab verirdi. Necə deyərlər, siyasətçinin işi elə siyasətdir, orada top qovmaqdır, yaşıl meydançada yox.
“FUTPOLitika”nın budəfəki qonağı deputat Aydın Mirzəzadədir.
– Aydın müəllim qapımıza vurulan qollar sizi də narahat edir?
– Milli Məclisin deputatıyam. Vəzifəm qanunvericiliyin formalaşmasında iştirak etməkdir. Eyni zamanda səlahiyyətimə görə ictimai-siyasi proseslərdəyəm. Həmçinin konstitusiyada seçicilərin problemlərinin həlliylə bağlı üzərimizə vəzifə qoyulub. Deputat seçilən, yaxud siyasətlə məşğul olan hər kəs çətinliklərdən şikayət etməməlidir.
– Deməli, Mili Məclisdə top qovmaq sizin üçün komfortdu…
– Bu, sadəcə olaraq həyatımdır. Mənə etimad göstərilib. Vəzifəmi uğurla yerinə yetirməyə çalışıram. Nə dərəcədə alındığını isə seçkidə seçicilər deyə bilərlər.
– Hansı oyunçuyla Milli Məclisdə yola getmirsiz?
– Milli Məclisin bütün üzvləriylə xoş münasibətlərim var.
– Həyat çox qəribədir?
– Adından göründüyü kimi həyatdır.
– Bəs, futbol necə?
– O da həyatın bir hissəsidir.
– Oyuna çıxmazdan öncə nə edirsiz? Dua, yoxsa məşq?
– Əvvəla, qalib gəlməyin yollarını bilmək lazımdır. Tək həmin oyun üçün deyil, bütün həyatın boyu ciddi hazırlaşmalısan. Bundan başqa, hətta ən zəif rəqibi belə güclü bilmək lazımdır.
– Danışılmış oyunlara münasibətiniz…
– Çox pis baxıram. İstənilən proses şəffaf getməli və ədalət prinsiplərinə cavab verməlidir.
– Ancaq danışılmış oyunlarda sizin də adınız hallanır. Deyirlər ki, deputat kürsüsünü alqı-satqı yoluyla hədiyyə ediblər…
– Hesab edirəm ki, səhv edirlər. Seçkilərim həmişə şəffaf olub. Doğulduğum və uzun müddət işlədiyim Mingəçevirdən deputat seçilmişəm. Seçicilərimlə çox sıx münasibətlərim var. Həmişə siyasi opponentlərimlə açıq olmağa çalışmışam.
– Nyutonun üç qanunu var. Futbolda bu qanunların sayı neçədir?
– Futbolu deyə bilmərəm. Mən siyasətlə məşğulam. Həmişə ədalətli, prinsipial, şəffaflığın tərəfdarı olmuşam.
– Ən yaddaqalan oyununuz…
– Siyasətçinin hər günü əhəmiyyətlidir, bunun məsuliyyətini hiss edirəm və ciddi yanaşıram.
– Azarkeşlərin fiti, səs-küyü sizi qorxutmur?
– Qətiyyən. Cəmiyyətlə, seçiciylə açıq olmaq lazımdır. Mobil nömrəmi Mingəçevirdə hamı bilir. İstənilən adam hər an mənə zəng edib problemini deyir, yaxud da təklifini verir.
– Ayaqla, yoxsa başla vurduğunuz qollar estetik alınır?
– Bəşəriyyətin ortaya qoyduğu və cəmiyyətin məqbul hesab etdiyi üsullardan istifadə etməyə çalışıram.
– Maradona olduğunuz məclisə qədəm qoysa, durub ona yer verərsiz?
– Hər kəsin bu həyatda öz yeri var.
– Kapitanınızın oynundan razısız?
– Əgər mən hansısa bir komandada fəaliyyət göstərirəmsə, bu o deməkdir ki, kapitanın fəaliyyətindən razıyam.
– Baş məşqçiylə mübahisələriniz tez-tez düşür?
– Mübahisənin deyil, həmişə işgüzar müzakirənin tərəfdarı olmuşam.
– Gələn il müqavilənizin vaxtı bitir. Yeniləyəcəksiz, yoxsa istirahətə gedəcəksiz?
– Yaranan gündən YAP-ın üzvüyəm. Partiyadaxili müzakirələrdə növbəti dəfə seçkiyə getmək tövsiyyə edilərsə, qatılacam. Yox, əgər başqa variant seçiləcəksə, hamı kimi mən də Azərbaycanda başqa bir sahəylə məşğul olmağa hazıram.
– Tabloya baxıb böyük rəqəmli məğlubiyyət görəndə necə olursuz?
– Təəccüb, təəssüf və eyni zamanda çox böyük suallar beynimdən keçir.
– Niyə? Təəccüblü olan nədir? Çox güclüyük deyə məğlubiyyəti həzm etmək olmur?
– Azərbaycanın qarşısında sıfır olan dövrü çoxdan keçmişik. Bizi çox kiçik top fərqi ilə uda bilərlər. Azərbaycanın artıq bütün sahələrdə tədricən uğurlar qazanan zamanıdır.
– Ofsayda düşmüsüz?
– Yox. İnsan nə etdiyini özünə hesabat verməlidir. Hər bir işə məsuliyyətlə yanaşmalıdır. Ofsayd o zaman olur ki, sən düşünülməmiş hərəkət edirsən, ya da prosesə hazır deyilsən.
– Dostlarınız, komanda yoldaşlarınız bir şey olanda deyirlər ki, Amerikanın oyunudur. Bəs futbol necə, o da Amerikanın oyunudur?
– Futbol futbolçuların oyunudur. Eyni zamanda sizin fikrinizlə razı deyiləm ki, bir şey olanda bunu Amerikanın oyunu adlandırırlar. Hər bir prosesə məhz proses kimi baxır və qiymət verirlər. Bu, normaldır və hər şeyi öz adıyla çağırmaq lazımdır.
– Bəs, Rusiya ilə Amerika üz-üzə gəlsə, Aydın Mirzəzadə kimə azarkeşlik edər?
– Yaxşı futbola.
– Sizin üçün yaxşı futbol hansı kriteriyalarla ölçülür?
– Gözəl taktiki ötürmələr, qapının yaxşı qorunması, komanda oyunu, güclü müdafiə, gözlənilməz hücum.
– Ermənistanı uda bilərik?
– Biz Ermənistanı həmişə uduruq.
– Ancaq onlar meydanın bizə aid olan hissəsinin 20 faizində top qovurlar.
– Bu müvəqqətidir, oyun hələ başa çatmayıb.
– 20 illik oyun olar?
– 20 il tarix üçün kiçik bir rəqəmdir.
– Futbol isə 90 dəqiqədən ibarətdir…
– Deməli, 90 dəqiqə hələ başa çatmayıb.
Ramin DEKO
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib