Premyer-liqa
Ansi Aqolli: "Hər şey meydanda bilinəcək"
"Qarabağ"ın albaniyalı müdafiəçisi Ansi Aqol…
"Qarabağ"ın albaniyalı müdafiəçisi Ansi Aqollinin futbolinfo.az saytına müsahibəsi
– Yeni mövsümdə ilk 3 xalınızı qazandınız. Ümumiyyətlə AZAL üzərindəki 3:0 hesablı qələbəni necə şərh edərdiniz?
– Bəli, yaxşı çalışdıq və 3 xal qazandıq. Bu bizim üçün çox önəmli idi. İndi qarşıda növbəti oyunlar var. Çalışacağıq ki, həmin matçlara da yaxşı hazırlaşaq və qalib gələk.
– Son bir neçə turda xallar itirdiniz. Bunun səbəbi nə idi?
– Bununla bağlı məşqçilərimiz daha yaxşı analiz verə bilər. Bizim işimiz futbol oynamaqdı. biz də çalışırdıq ki, əlimizdən gələni edib, 3 xal qazanaq. Amma alınmadı. Hesab edirəm ki, keçmiş keçmişdə qaldı. Artıq növbəti oyunlarda nə edəcəyimizlə bağlı fikirləşmək lazımdı.
– Son turdakı rəqibiniz AZAL barədə nə deyə bilərsiniz? Rəqib necə təsir bağışladı. Onlar yeni komanda qurub və avrokuboklara vəsiqə qazanmaq istəyirlər. Sizcə, bunu bacaracaqlar?
– Mən dəqiq deyə bilmərəm ki, onlar avrokuboklara vəsiqə qazana biləcək, ya yox. Baxıb, görəcəyik. Amma onu deyə bilərəm ki, AZAL çempionatdakı güclü rəqiblərdən biridi. Onların yaxşı oyunçuları var. Həmçinin AZAL-a yaxşı baş məşqçi rəhbərlik edir.
– Avropa Liqasının qrup mərhələsinə vəsiqə qazandınız. Bu necə hiss idi?
– Əvvəla qrup mərhələsinə vəsiqə qazanan bütün komandaları təbrik edirəm. Allaha şükür edirəm ki, biz də bu şanslı komandalar arasındayıq. Çalışacağıq ki, bu uğurun davamını da gətirəg və qrup mərhələsində layiqli oyun göstərək.
– Qrupda İtaliya "İnter"i, "Sent-Etyenn" (Fransa) və "Dnepr" (Ukrayna)lə qarşılaşacaqsınız. Sizcə, bu rəqiblərdən hansı sizə daha çox çətinlik yarada bilər?
– Ümumiyyətlə qrup mərhələsinə vəsiqə qazanan komandanı zəif hesab etmək olmaz. Rəqiblərimizin hamısı da güclüdü. Amma hər şey meydanda bilinəcək. Əsas odur ki, biz matçlara yaxşı köklənə bilək. Öz oyunumuzu oynaya bilsək, yaxşı nəticə də qazana bilərik.
– Qrupda ilk oyunu "Sent-Etyen"ə qarşı keçirəcəksiniz. Bu oyundan nə gözləyirsiniz? Sizcə, "Qarabağ" ilk oyundan öz gücünü göstərə biləcək?
– Mən dəqiq deyə bilmərəm ki, ilk oyunda qələbə qazanacağıq. Futbolda hər şey ola bilir. Buna görə də futbol çox gözəldi. Onu deyə bilərəm ki, azarkeşlərimiz qarşısında Avropa Liqasının qrup mərhələsində ilk oyuna çıxacağım üçün çox həyəcanlıyam. Komandamın uğur qazanması üçün əlimdən gələnin ən yaxşısını edəcəyəm.
ELMAR VƏLİYEV