Ölkə futbolu
Bizə 46 top vuran fransızlar
Sabah bütün Azərbaycanın diqqəti Tofiq Bəhramov adınra …
Sabah bütün Azərbaycanın diqqəti Tofiq Bəhramov adınra Respublika stadionuna yönələcək. Təmsilçimiz “Qarabağ” Avropa Liqasının qrup mərhələsinin ilk qarşılaşmasında Fransa “Sent-Etyen”ini qəbul edəcək.
Ümumiyyətlə, fransızlar bu vaxta qədər təmsilçilərimiz qarşısına 6 dəfə çıxıb. Fransızlarla ilk görüş 1994-cü ildə Türkiyədə baş tutub. Həmin ildə ölkədə ictimai-siyasi duruma görə ev oyunlarını Trabzon şəhərində keçirən futbol üzrə yığma komandamız Fransa millisinə 0:2 hesabı ilə məğlub olmuşdu. Avropa Çempionatının seçmə mərhələsinin cavab qarşılaşmasında fransızlar yığmamızı biabır etmişdi – 10:0. Bu da “Oser facisəsi” kimi ölkə futbolunun tarixinə qara hərflərlə yazıldı.
21 yaşlılarımız da sözügedən seçmə mərhələdə rəqibi qarşısında aciz qalmışdı. Trabzonda və Oserdə baş tutan görüşlərdə bizimkilər həmyaşıdları ilə bacarmamışdı. Evdə və səfərdə 21 yaşlı fransızlar Azərbaycan millisin qapısından hər oyunda 5 cavabsız top keçirmişdi.
2004-cu ildə U-19 millimiz də fransızlarla qarşılaşıb. Makedoniyada keçirilən qarşılşamada millimizin rəqibi futbolçularımıza qarşı insaflı davranıb – 3:0. Avropa Çempionatın seçmə mərhələsi bizim futbolçuların əsl başbəlasıdı. Maraqlıdı ki, 19 yaşlı qızlardan ibarət yığma komandamız da fransız həmyaşıdları qarşısında aciz qalıblar. Onlar kişilərdən ibarət əsas yığma komandamızın “uğurunu” təkrarlayıb. İş burasındadı ki, 2004-cü ildə Litvada keçirilən seçmə mərhələdə 19 yaşadək qızlarımız da rəqibindən 10 cavabsız qol buraxıb. 2009-cu ildə isə evdə keçirilən oyunda yenə qonaqlar üstün olub – 2:0.
Milli komanda səviyyəsində demək olar ki, fransızların qarşısında üzüqarayıq. Bu, hələlik klub səviyyəsində də belədi. Belə ki, Fransa təmsilçisi ilə ilk dəfə üz-üzə gələn “Qarabağ” da həmin dueldən uğurlu nəticə ilə ayrılmayıb. İntertoto kubokunun 2-ci mərhələsində Ağdam klubunun rəqibi olan “Monpelye” “atlılar”a iki oyunda 9 cavabsız top vurub. Evdə 0:3 hesabı ilə uduzan ağdamlılar, səfərdə də qapısından 6 cavabsız top buraxmışdı.
Göründüyü kimi fransızlarla görüşlərdə rəqib təmsilçilərimizin qarşısına əli boş çıxmayıb. Azərbaycanlıları məyus etmək üçün, əlindən nə gəlibsə, onu da edib. Bu vaxta qədər Mişel Platininin həmyerliləri qapıçılarımızı 46 dəfə məyus edib. İş burasındadı ki, bizim heç bir futbolçumuz fransızların qapısına yol tapa bilməyib.
Düzdü, keçmişə nisbətən bu gün futbolumuz müəyyən qədər də olsa, inkişaf edib. Bu inkişafın nəticəsini “Qarabağ” sabah “Sent-Etyen”ə göstərməlidi. Ayağınıza qüvvət!
EMİN SƏFƏROV