Ölkə futbolu
Bəxtəvər Çixradze
Georgi Çixradzedən danışacam. Dünyanın ən bəxtəvər…
Georgi Çixradzedən danışacam. Dünyanın ən bəxtəvər məşqçisindən. Oturub Azərbaycanın cənnət guşələrindən sayılan Zaqatalada, əlinin altında Keniyadan tutmuş Belçikaya qədər yeddi fərqli ölkədən legioner var. Üstəlik, milliləşdirilmiş alman-türk Əli Gökdəmiri də plovun üstünə aşqara səpirlərmiş kimi onun sərəncamına veriblər. Komanda üçün hər cür şərait yaradılıb.
Bu, mənim iddiam deyil. Kluba prezidentlik edən Anar Bəkirov “Qarabağ”la oyundan sonra verdiyi müsahibəsində belə deyib. Sitat: “Biz nə lazımdısa, etmişik. Komanda əla təlim-məşq toplanışları keçirib. Futbolçulardan heç nə əsirgəmirik. Onlar hərtərəfli qayğıyla əhatələniblər. Hər dəfə heç-heçəyə və qələbəyə görə mükafat alırlar. Maaşlarını da vaxtında veririk. Əvəzini görmək istəyirik”.
Futbolun yazılmamış qanunudu. Bir halda ki, nəticə yoxdu, bütün nəzərlər məşqçinin üzərinə çevrilir. Təsəvvür edin, bir azərbaycanlı məşqçi qonşu Gürcüstanda eyni şərtlər altında üçüncü mövsümünü keçirir və ortada ciddi nəticə sayıla biləcək heç nə yoxdu. Ona bu qədər dözərlərmi? Təsəvvür edə bilmədiniz, sizi yaxşı başa düşürəm. Heç mümkün də deyil.
Sağ olsun, cənab Çixradze. Futbol leksikonumuza yeni termin də gətirdi. “Qarabağ”la oyundan sonra gürcü çalışdırıcı “köhlən atlar”ın “qarışıq heyətlə” oynadığını iddia edib. Özünə sığışdırıb deyə bilmir ki, “Qarabağ” meydana ikinci heyətlə çıxmışdı. Sevindirici haldı, adamın qürur hissi hələ tam ölməyib. Hansısa rəqibin ikinci heyətinə uduzmağından utanır. Bəhanəsi də hazır imiş. Guya, İlkin Qırtımovla Draqan Çeranın meydanda olmaması nəticəyə təsir edib. Qırtımov müdafiəçidi, qadan alım. Maşallah olsun, Vüqar Nadirov 64-cü dəqiqədə hesabı açana qədər “sehirli quşlar” 11 nəfərlə müdafiə olunurdu. Nə oldu belə, “Simurq”un 11 futbolçusu bircə İlkin Qırtımova dəymədi? Onda Berti Foqts dünyanın ən xoşbəxt məşqçisidi. Onun sərəncamında yeddi legionerin meydana çıxdığı “Simurq”un bütün heyətindən dəyərli olan müdafiəçi var.
Adamı çağırıb, deyən yoxdu ki, sən “Qarabağ”la oyunda yeddi əcnəbi futbolçunun xidmətindən yararlanmısan, onların da altısı start heyətdə yer almışdı. Qurban Qurbanovsa ilk dəqiqələrdən cəmisi üç əcnəbi futbolçunu meydana buraxmışdı. Yerlilərin əksəriyyəti bu yay “Qarabağ”a keçənlər idi. Onların da indiyə kimi bir yerdə oynamağa, davamlı oyun praktikası qazanmağı o qədər də şansı olmayıb. “Simurq”un 6 əcnəbisi Cavid Tağıyevin, Namiq Ələsgərovun, Hacı Əhmədovun, Tərlan Quliyevin qarşısında “ikinci skripka” roluna razılaşmış, öz qapılarının həndəvərində topu ora-bura vurmaqla məşğul idilər. Onu da düz-əməlli bacarmadılar. Meydanın “Qarabağ”a aid hissəsinə qədər irəliləməyə qorxan əcnəbilərlə “Simurq” Avroliqaya vəsiqə qazansa belə ordan “böyük qardaşı” “İnter”dən daha biabırçı nəticələrlə üstümüzə qayıdacaq. Avrokuboklarda iştirak üçün Azərbaycana verilən dörd yerdən ikisinin fərsiz qardaşlara qismət olması futbolumuzun fiaskosu olar. Kimə lazımdı avrokuboklara iddialı belə komanda?
Altdan-altdan güldüyünüzü hiss edirəm. Yiyəsinə qismət. Elə Georgi Çixradzenin özü də bu həqiqəti yaxşı başa düşür. Ona görə də Anar Bəkirovun üzünə ciddi görkəm verib, Avroliqa haqqında dediklərini heç vecinə də almır. Əbəs yerə gürcü Çixradzeyə dünyanın ən bəxtəvər məşqçisi demirəm ki. Təqvim də elə bil onun üçün düzəldilib. Bir-birini ilk dəfə görən futbolçulardan qurulan AZAL-ı məğlub edəndən sonra daxili problemlərlə çarpışan “Xəzər Lənkəran” Zaqatalaya gəldi. Bundan yaxşı start harda ola bilər? Ardıcıl alınan üç məğlubiyyət isə Çixradzenin komandasının əsl gücünü ortaya qoymaqla yanaşı, vəziyyəti gərginləşdirib. Qarşıdan isə halva kimi oyunlar gəlir. “Sumqayıt”la “Bakı”nı ud, “qara zolaq”dan çıxdım” deyib, qəhrəmanlar kimi sinəni irəli ver. Turnir cədvəlində vəziyyəti heç də pis olmayan “İnter” də “kiçik qardaşına” əl borcu bir xalı əsirgəməz. “Sonra nə olacaq” sualını verməyə tələsməyin. Allah kərimdi, 3 oyuna 7 xal toplayandan sonra 4-5 oyun uduzub, “yenidən “qara zolağa” düşmüşük” demək də olar. Kimdi səni çarmıxa çəkən?
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”