I Liqa
“Rəvan” narazıdı: Qərar gülüncdü və məntiqi əsası yoxdu
Ölkə çempionatının I divizionunda son turun “Mil-…
Ölkə çempionatının I divizionunda son turun “Mil-Muğan”- “Turan-T” qarşılaşmasında ev sahibinin etdiyi saxtakarlığın AFFA İntizam Komitəsində hansı qiyməti alacağını hələ dünən xəbər vermişdik. Futbolinfo.az hələ bir gün öncədən yalnız Tovuz klubunun texniki qələbə alacağını, AFFA-ya vaxtında müraciət etməyən “Göyəzən”lə “Rəvan”ın isə imişlilərin məğlubiyyətini görməyəcəyini vurğulamışdıq.
Bu gün İntizam Komitəsinin qəbul etdiyi qərarlarla bizim yazdığımız arasında elə də ciddi bir dəyişiklik olmadı. “Rəvan”la yanaşı, “Göyəzən” də “Mil-Muğan” qarşılaşmasında rəqibin saxtakarlığa yol verməsini isbatlaya bilmədi.
Saytımıza açıqlama verən “Rəvan”ın mətbuat xidmətinin rəhbəri Şamo Quliyev qurumun qəbul etdiyi qərarı gülünc adlandırdı: “AFFA İntizam Komitəsinin qərarı təəccüb və təəssüf hissi doğurur. Qurumun hansı meyarlara, hansı qaydalara əsaslanaraq bu cür qərar qəbul etməsi anlaşılan deyil. Belə deyək, polis oğrunu tutur və məlum olur ki, həbs olunan şəxs daha öncə də anoloji tipdə 30 belə cinayət törədib. Məgər onda oğrunu yalnız sonuncu “qəhrəmanlığına” görə mühakimə edirlər? Bu kimi hallara nəzarət etmək AFFA-nın, PFL-in üzərinə düşən işdir. İndi belə çıxır ki, hər oyundan əvvəl biz rəqib futbolçuların hamısını bir-bir şəxsiyyət vəsiqələri ilə tutuşdurmalıyıq? Harada görülüb bu? Əgər “Turan-T” bu saxtakarlığın üstünü açmasaydı, necə olacaqdı? Təsəvvür edin, mövsüm başa çatır və məlum olur ki, məsələn, çempion komandanın heyətində 5-6 belə futbolçu varmış. Onda nə olacaq? Bizə texniki məğlubiyyət hesabına xal-filan lazım deyil. Tələb etdiyimiz tək şey qayda-qanundur. Bu, məhəllə çempionatı deyil ki. Bəs AFFA, PFL nə üçündü? Onlar klubların qaydalara riayət etməsinə nəzarət etməlidir. Belə çıxır ki, təşkilatçılar hər şeyi başdı başına buraxıb və klublar da “tutulmayan oğru deyil” prinsipi ilə nə istəsələr edə bilərlər. Yenə deyirəm, İntizam Komitəsinin qərarı gülüncdür və heç bir məntiqi əsası yoxdur. Oyunun videogörüntüləri var, zəhmət çəkib izləsinlər. “Rəvan” – “Mil-Muğan” oyununda da Fərid İbrahimlinin əvəzinə Orxan Məhərrəmli 90 dəqiqə meydanda olub”.
Xatırladaq ki, “Mil-Muğan” – “Turan-T” oyununda İmişli klubu 1990-cı il doğumlu Orxan Məhərrəmlinin ad, soyad və təvəllüdünü dəyişərək, 1993-cü il doğumlu Fərid İbrahimli adıyla oynadırmış. Bu məsələnin üstünü isə Tovuz klubunun prezidenti Namiq Məstanov açıb. “Mil-Muğan” – “Göyəzən” (6:1) və “Rəvan” – “Mil-Muğan” (1:1) oyunlarında da eyni hadisə baş verib. Amma nə qazaxlılar, nə də Bakı klubu bununla bağlı vaxtında şikayət etməyiblər. Bu üzdən də İntizam Komitəsi yalnız oyundan sonrakı 24 saat ərzində bu barədə müraciət edən “Turan-T”nin şikayətini əsaslı sayıb.
EMİN SƏFƏROV