Ölkə futbolu
Neftçi”də mövqe müharibəsi
Baş məşqçi dəyişikliyi, ardıcıl 2 çətin oyundan …
Baş məşqçi dəyişikliyi, ardıcıl 2 çətin oyundan top buraxmadan 4 xal götürülməsi “Neftçi”də nisbi sakitlik yaradıb. Qələbənin əzəli rəqib olan “Xəzər Lənkəran”la oyunda qazanılması, Qəbələ səfərində isə yaxşı oyunla əldə edilən xal Sadıq Sadıqova rahat nəfəs almaq imkanı verib. Amma…
…Amma klub prezidenti kreslosunda o qədər də rahat otura bilmir. Çünki indi də onu rəhbər postlara kadr təyinatlarına görə sıxma-boğmaya salıblar. Adamı başa düşmək olar, klubda çox adamın gözü var və dövlət büdcəsindən gələn puldan yemək istəyənlərin sayı çoxdu. Onu bir nəfərin qamarlayıb klubda vəzifə verdiyi qohumlarına dağıtması maraqlı şəxslərin ürəyincə deyil.
3 ölkə çempionluğu, 2 ölkə kuboku və Avropa Liqasının qrup mərhələsinə vəsiqə qazanılması Sadıqovun öz yerini toxunulmaz edib. Bu səbəbdən onun kreslosu laxlamır. Düzdü, bu mövsüm avrokuboklarda istənilən nəticənin əldə edilməməsindən sonra vəziyyət qeyri-sabit idi. Ancaq Sadıqov vitse-prezident Tahir Süleymanovun və baş məşqçi Böyükağa Hacıyevin istefaları sayəsində özünü qoruya bildi. Arif Əsədovun hələlik qənaətbəxş olan işi isə Sadıq bəyi rahatlayıb.
Bununla belə, yuxarıda qeyd etdiyimiz kimi, klubda indi də mövqe müharibəsi gedir. Sadıqov ətrafını elə möhkəmlətmək istəyir ki, növbəti uğursuzluqdan da sağ çıxsın. Ona sabah kreslosunu qorumaq üçün yenidən qurban verilməsi mümkün olan kadrlar lazımdı, onu əvəzləmək məqsədi ilə gətirilənlər yox. Məhz bu səbəbdən hətta “Partizan”la səfər oyunu ərəfəsində komandanın düşərgəsində görünən Zaur Axundovun “Neftçi”yə vitse-prezident kimi gəlişi əngəlləndi. Çünki Futzal Federasiyasının prezidenti olan Axundov bura da gələcək rəhbər kimi gəlmək istəyirdi.
İndi “Neftçi”də uğrunda vuruşulması lazım gələn strateji “nöqtə” vitse-prezident postudu. Bu posta müvəqqəti təyin olunmuş Mübariz Xudiyevin Tahir Süleymanovun xələfi kimi nə qədər duruş gətirəcəyi dəqiq deyil. Artıq xəbər verdiyimiz kimi, “ağ-qaralar”ın sponsoru olan SOCAR “Neftçi”yə vitse-prezident təyin etmək üçün namizədlər arasında seçim aparır. İş burasındadı ki, Dövlət Neft Şirkəti tərəfindən təyin olunacaq vitse-prezident həm də klub prezidenti Sadıq Sadıqova nəzarət edəcək. Daha doğrusu, kluba təyin olunacaq vitse-prezident Sadıqovun maliyyədən düzgün istifadə edib-etməməsinə diqqət yetirəcək. Saxtakarlıq, ehtiyac duyulmayan yerlərə vəsaitin dağıdılması halları aşkar olunanda isə bunun qarşısı alınacaq, lazım gələrsə vitse-prezident Sadıqova xələf olacaq.
Xudiyev Sadıq bəyin öz adamı, öz kadrıdı, neçə illərdi icraçı direktor kimi çalışır. Sadıqov onu SOCAR-dan gələcək yeni birisindən daha yüksək tutur, daha çox etibar edir. Bu səbəbdən həm prezident, həm də müvəqqəti təyin olunduğu postda daimi qalmaq istəyən Mübariz bəy yuxarı dairələrdə sözü keçən adam axtarır ki, ona dəstək olsun. Xudiyevin təyinatı ona görə əlveriçlidi ki, Sadıqov komandaya ayrılan pulları yenə istədiyi kimi xərcləyəcək, “Neftçi”də çalışan xalauşaqları, bacanaqlar, oğullar korluq çəkməyəcək. Eyni zamanda Mübariz bəyin sabah nəinki klub prezidenti olmayacaq, hətta lazım olanda mümkün uğursuzluğu üzərinə götürüb istefa da verəcək. Sadıq bəyə də onun kimi, müşaviri Elnur Əşrəfozlu kimi canlı sipərlər lazımdı, daha maliyyəyə nəzarət edən gələcək xələf yox.
Beləliklə, “Neftçi”də daxili təzyiq hələ də yüksəkdi. Komandanın nəticələri yaxşı olduğundan hələlik bu mərəz özünü komandanın sifətində büruzə vermir. Növbəti turda “Qarabağ”la oyunda mümkün xal itkisi çox şeyi dəyişə bilər. Çünki bu oyun komandanın potensialını ortaya çıxaracaq, qış “transfer pəncərəsi” üçün nə qədər büdcə lazım olduğuna aydınlıq gətirəcək. Sadıqovu da narahat edən məqam budur. Axı, komandaya ayrılan pulun miqdarı bəlli olana kimi daimi vitse-prezidentin kimliyi dəqiqləşməlidi.
AĞA
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”