Müsahibə
Güvənc Kurtar: “Neftçi” etiraz etmirsə, deməli, belə bir şey olub”
Dünən “Rəvan”ın keçmiş futbolçusu o…
Dünən “Rəvan”ın keçmiş futbolçusu olan Oke Akpoveta ilə bağlı yazı dərc etmişdik. Sözügedən yazı ilə bu linkdə tanış ola bilərsiniz.(https://futbolinfo.az/xeber/16376/).
Qısa olaraq bildirək ki, nigeriyalı futbolçu ölkə kubokunun yarımfinal mərhələsində “Neftçi” ilə cavab oyununda bir sıra şübhəli hərəkətlərlə yadda qalmışdı. Bundan başqa, onun həmin oyun ərəfəsində 35 min dolları haradan alması böyük maraq doğurur. Futbolçunun oyun alqı-satqısında iştirak etməsi güman edilir.
Bu məsələyə ilk olaraq “Neftçi”dən reaksiya gözləsək də, ilk addım “Rəvan”dan gəldi. Ötən mövsüm “Rəvan”ın əsas komandasında məşqçi kimi çalışan, hazırda “sarı-qırmızılar”ın 19 yaşlılarına rəhbərlik edən Füzuli Məmmədov yazıya belə münasibət bildirdi: “Futbolçu belə bir şey edirsə, o, komandasını yox, öz mənafeyini, şəxsiyyətini satmış olur. Məşqçi kimi oyunda anladım ki, Oke Akpoveta öz bacarığının 1 faizini belə oynamır. Matçdan sonra ayağının ağrımasını deyərək vətəninə yollanması, əlbəttə, şübhə yaradır. Amma əlimizdə tutarlı sübut yoxdu. Məşqçi kimi futbolçunun niyyətini görürəm. Nə məqsədlə pas verdiyini, topa niyə iki toxunuş etdiyini çox yaxşı anlayıram. Həmin qarşılaşmanın ilk 10 dəqiqəsində baş məşqçiyə Okenin əvəzlənməli olduğunu bildirdim. Qarşılaşmadan sonra Güvənc Kurtar mənə haqlı olduğumu söylədi”.
Ötən mövsüm “Rəvan”ı ölkə kubokunun yarımfinalına qədər çıxaran Güvənc Kurtar da məsələyə biganə deyil: “Saytınızda gedən yazıdan xəbərim var. Bizim futbolçumuz belə bir iş görübsə, bu, çox pis bir əməldi. Biz “Neftçi”ni mübarizədən kənarlaşdıra bilərdik. Hətta ölkə kubokunu da ala bilərdik. Məhdud imkanlarımıza baxmayaraq, bu işi bacara bilərdik. Bununla bağlı xəbərlər alırdım. Deməli, təkcə kubokda yox, çempionat oyunlarında da belə xoşagəlməz hadisələr yaşanıb. Təbii ki, bunu sübut etmək çox çətindi. Bunlar doğrudusa, yazıqlar olsun. Bizim haqqımızı yedilər. “Rəvan” rəhbərliyinin sərf etdiyi əməyin hamısı boşa getdi. Çox üzüləsi durumdu. Mənəvi olaraq çox böyük yara aldıq. Bu, bizim karyeramıza da mənfi təsir etdi. Çünki kuboku qazansaydıq, tamam fərqli olacaqdı. Komandanın qazanacağı uğur əngəlləndi. Qarşı tərəfin buna etirazı olub-olmadığını da bilmək istəyirəm. “Neftçi” etiraz etmirsə, deməli, belə bir şey olub. Bu, digər oyunlarda da olub. Qapımızdan keçən qollar ağlıma gəldikcə, belə hadisələrin Premyer Liqa oyunlarında da olduğunu güman edirəm. Çox üzgünəm. Azərbaycan futbolunun inkişaf etməsi əngəlləndi. Dediklərimin də arxasındayam. Uğurlu mövsüm keçirmişdik. Gənc futbolçular yetişdirirdik. Bu hadisə rəhbərliyi də çox üzüb”.
İş burasındadı ki, hələ də “Neftçi” tərəfi məsələyə reaksiya bildirməyib. Görünür, “danışmaq gümüşdüsə, susmaq qızıldı” deyiminə əməl etməklə qazandıqları qızıl medalları sığortalamaq istəyirlər. Bizim yazdıqlarımız sadəcə, ehtimal, versiyadı. Ancaq təkzib olmayanda yavaş-yavaş bunun reallıq olduğunu düşünürsən.
EMİN SƏFƏROV
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- I Liqa2024-05-01 11:25
I Liqada 24-cü turun təyinatları müəyyənləşdi
- Milli komanda2024-05-01 18:44
Milli komandamızın baş məşqçi postuna əsas namizəd bəlli oldu