Ölkə futbolu
"Neftçi"nin solğun çiçəkləri
Proqnoz həvəskarı olan dostlarımdan biri şənbə günü z…
Proqnoz həvəskarı olan dostlarımdan biri şənbə günü zəng vurmuşdu. Hal-əhval tutduq, xoş-beş elədik. Mövzuya birbaşa keçməsə də, məqsədini bilirdim. Söhbəti hara fırlatsaq da, axırda “qardaş, “Neftçi” – “Qarabağ” oyununa nə yazaq?” soruşacaqdı. Gözlədiyim kimi də oldu. Lovğalıq kimi olmasın. Gülümsədim, “Qarabağ” udmalıdı, çünki “Neftçi”dən güclüdü” dedim.
Əslində, həmin qarşılaşmaya proqnoz vermək üçün hansısa xüsusi qabiliyyətə, münəccimlik bacarığına ehtiyac da yoxdu. Yetər ki, oyundan əvvəl əlinə xəyali bir tərəzi götürüb, komandaları həmin tərəzinin gözünə qoyasan. Müqayisədə hansı ağır gələcək? Çox hörmətli Arif Əsədov bizdən inciməsin. Eləcə də, hər cür fədakarlığa dözən “Neftçi” azarkeşləri. Hazırkı “Neftçi” solğun çiçəkləri xatırladır. Mövsümün gedişində komandanı qəbul edən Arif bəyin əlində “sehiri çubuq” olmalıdı ki, bu heyətdən çempionluq mübarizəsi apara biləcək komanda düzəldə bilsin. Belə çubuq isə ancaq nağıllarda olur. Fransanın ən güclü komandalarından birini öz “yuvasına” qısılmağa məcbur edən, Hollandiya “Tvente”sini avrokuboklardan kənarlaşdıran “Qarabağ”ı bu komanda necə məğlub edə bilər?
Məncə, Arif bəy məğlubiyyəti hakim səhvlərinə bağlamaqla bir az hissə qapılır. Klub rəsmiləri isə stəkanda fırtına yaratmaqla məsuliyyətdən yayınıb, gündəmi dəyişməyə cəhd edirlər. Tahir Süleymanovla yollarını ayırıb, Elnur Əşrəfoğlunu yanına çağıran Sadıq Sadıqov rahat ola bilər. İkinci kadrı öz işini heç də birincidən pis bacarmır. Elnur bəyin oyundan sonra verdiyi açıqlamaları, “Orxan Məmmədovun Qəbələdə evi yandırılmışdı” sözlərini oxuyarkən belə qənaətə gəlmək mümkündü. Bu nə deməkdi? Yoxsa, klub prezidentinin müşaviri fanatlara ötənilki olayları xatırladıb, nəyəsə işarə vurur? Yenidən kiminsə evi yandırılsın?
Yuxarıda qeyd etdiyim kimi, məğlubiyyətin səbəbini tapmaq üçün tərəziyə əl atmaq kifayətdi. “Neftçi”də bu gün kimlər oynayır? Qapıçı Saşa Stamenkoviçin məşqçisizlikdən və rəqabətsizlikdən əziyyət çəkdiyi göz önündədi. Penalti epiozdunu bir kənara qoyuram. Məgər, ikinci və üçüncü qolda Saşanın səhvi yox idi? Nikolas Kanales meydanda daxil olanda “Neftçi” aut atışı yerinə yetirirdi. Bu həmin Kanalesdi ki, onu böyük ümidlərlə Çilidən Bakıya çağırıblar. Düşündüm ki, Kanalesin oyuna daxil olduğu anda “ağ-qaralar” topu xüsusi dəqiqliklə autdan oyuna daxil edəcək, Şehiçin qapısı qarşısında təhlükə yaradacaqlar. Əvəzində hücumçu heç mövqeyinə çatmamış aut atıldı və top dərhal da rəqibə “bağışlandı”. Cəmisi 12 dəqiqə sonra “köhlən atlar” eyni vəziyyətdən 2-3 ötürməylə Muarrem Muarremi Stamenkoviçlə üz-üzə qoydular və ikinci qol vuruldu. Başqalarını ittiham etməkdənsə həmin epizoda baxmaq, öz müdafiəçilərinizin davranışlarını incələmək daha uğurlu addım deyilmi, əzizlərim?
Üçüncü qoldan əvvəl qayda pozuntusunun olduğu iddia edilir. Həmin epizodun davamında qonaqlar meydanın təxminən 60-70 metrlik hissəsini asanlıqla keçir, Vüqar Nadirov həvəskar komandalarla oynayırmış kimi Stamenkoviçi də geridə qoyur və fərqlənir. Futbol bu deyilsə, bəs nədir? Məlum məsələdi ki, oyunun sonlarından fiziki və psixoloji cəhətdən çökmüş futbolçular əvəzetmələrlə gücünü qoruyan “Qarabağ”a müqavimət göstərə bilmirdilər. “Neftçi” belə acınacaqlı vəziyyətə bu gün düşməyib. “Koper”lə oyundan bəri “ağ-qaralar” haqqında yazdığım, dediyim bütün sözlərin üstündə dayanıram. Problemin kökü isə ondan da əvvələ gedir çıxır. Ta ovaxta ki, Nazim Süleymanov gələcəyin necə olacağını görüb, istefa ərizəsini Sadıq bəyin stolunun üzərinə qoymuşdu. Bu heyət, bu futbolçular solub. Çiçəkləri sulamaq, köklərini gücləndirmək, artıq budaqları qoparmaq lazımdı. Yoxsa, bu “solğun çiçəklər” əhvalınızı hələ çox korlayacaq. Bəhanəylə uzağa getmək olmaz.
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”
- Ölkə futbolu2024-04-23 08:00
“Səbail” “Sabah”a uduzsa…