Ölkə futbolu
17 qollu 17-ci tur: “Qəbələ” “zirzəmi”də möhkəmləndi
Premyer Liqanın növbəti turu bolqollu alındı və eyni hesablarla bitdi. Şənbə günü 9, ertəsi 8 qol vuruldu. 17-ci tur 17 qolla əlamətdar olsa da, yalnız “Zirə” rəqib torunu silkələyə bilmədi, “Qarabağ”sa ardıcıl 3-cü oyunda məyus olmadı.
“Qəbələ” artıq aşkar autsayderdi. Qonşusu “Səbail”ə məğlubiyyətdən sonra əyalət təmsilçisinin vəziyyəti çox pisləşdi. Baxmayaraq ki, hesabı ardıcıl ikinci oyununda fərqlənən Nikolas Rayselin qolu ilə qonaqlar açmışdı. Fasilədən sonra əla oyun göstərən bakılılar bir anda vəziyyəti öz xeyrinə dəyişdi. Ötən turda “Keşlə” üzərində qələbədən sonra növbəti 3 xal “dənizçilər”i zirzəmidəki rəqibindən 5 “addım” önə atdı.
“Qəbələ” 2020-ci ildə xala həsrətdi. Komandanın heyətində ciddi dəyişikliklər olub və yeni kegionerlər ansambla tam uyğunlaşmayıb. Yəqin ki, relsə düşmək üçün bir qədər səbr etmək lazım olacaq. Elmar Baxşıyev yetirmələrini təcili toparlamasa, sonra gec olacaq.
“Səbail”in də heyəti yenilənib, hətta xeyli zəifləyib. Bununla belə, Aftandil Hacıyev təcrübəlilərlə gənclərin vəhdətindən döyüşkən kollektiv formalaşdıra bilib. Komandada məşqçi işi ilk baxışdan görünür və bu, nəticələrdə əksini tapır.
Şənbə günü qonaqlar qələbə qazanmışdısa, bazar günü meydan sahibləri sevindi və digər matçda da 3:1 hesabı qeydə alındı. “Bakcell Arena”dakı görüşdə qaliblər nəticəyə şübhə yeri qoymadı. “Neftçi”nin baş məşqçisi Füzuli Məmmədov ilk qələbəsinə aqressiv, eyni zamanda baxımlı oyunla nail oldu. İlk dəqiqələrdən topa nəzarət edən komanda “Keşlə”ni meydandan süpürə bildi. Hətta hakimlərin qonaqlara simpatiyası, bir penaltini “görməməsi” də “Neftçi”yə mane olmadı.
Ardıcıl ikinci məğlubiyyət “Keşlə”nin mövqeyini xeyli laxladıb. Komanda ilk “üçlük”də qalsa da, izləyicilər çox yaxındadı. Düşüşün səbəbini araşdırmaq kollektivin öz işidi, lakin futbolçuların mövsümün ikinci yarısına fiziki cəhətdən hazır olmadığını vurğulamalıyıq. Konkret dünənki oyuna gəlincə, məğlubiyyətdə bu amillə yanaşı, heyət yetərsizliyini də rolu oldu. Cəzali Con Kamaranın yoxluğunda məcburən dayaq bölgəsində oynadılan Tərlan Quliyev vəzifəsinin öhdəsindən gələ bilmədi. Ümumiyyətlə, müdafiəylə hücum arasında bağ qopmuşdu, komanda bizi öyrəşdirdiyi kompakt futbolu sərgləmədi.
Yəqin ki, baş məşqçi Tərlan Əhmədov zamanla yetirmələrini bu durumdan çıxaracaq. Bunun üçün təcrübəsi var və belə situasiyaları çox görüb. Bununla yanaşı, komandanın qışda güclənmədiyini vurğulamalıyıq. Yeni transferlər hələ ki, özünü göstərə bilmir və bunun fəsadları görünür.
Görünən odur ki, “Qarabağ” hər nə qədər rəqiblərindən aralansa da, sonadək əsas izləyicisi “Neftçi” olacaq. Bakılılar Roberto Bordinin gedişindən sonra daxili problemləri də yoluna qoya bilib. Azarkeşlərlə barışmaq üçün ardıcıl qələbələr kifayət edəcək. Dünənki matçdan sora bunun işartıları göründü və futbolçular qələbəni azarkeşlərlə birgə qeyd etdi. Yalnız Emin Mahmudov qolundakı kapitan sarğısının məsuliyyətini unudub, paltardəyişmə otağına yönəldi. Güman ki, o, səhvini anlayacaq, umu-küsünü unudacaq, əks halda, sarğı onu daha çox haqq edən birinə veriləcək.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”
- Ölkə futbolu2024-04-23 08:00
“Səbail” “Sabah”a uduzsa…